🌼الحلقـــ34ـة "القسـ3ــم "🌼
✴🌿✴
خارجة تزرب ،لازمها تخلط في الوقت مع جناة ، تقابلت في الباب مع عبد الجليل جاي يطل على اركان ،سلمت عليه بفرحة وخلت كفو بين كفوفها من غير ماتسيبها " عندي ليك نود حكايات ...اما خسارة... انا توا عندي مانعمل ...ورونديفو ماانجمش نفلتو ...بون مانيش باش نبطى استناني تمشيش تروح "
تبسم بود وهو يمسد على كتفها " رد بالك على روحك ...اما قلي قبل ماتمشي وينو اركان شنوة جوو "
شطحت حواجبها " هوكا خليتو في الجنينة ...وتهنى اركان موش باش ينجمني واذا هو راسو حجر انا راسي حديد "
ضحك عليها وعلى هبالها ...قعد يخزرلها وهي تخرج تجري من غير ماتتلفت وراها ...متأكد انو هاكي وجه مزيف عاطيتو للعباد...عارف انو في داخلها فمة بنية تبكي في الظلام ...مرعوبة ...منسية...موجوعة ...و وحيدة...الله غالب ...موش منجم يعمل شي يعاونها غير انو ياقف وراء ظهرها ويسندو اذا نهار من النهارات خانتها ساقيها وتعبت ...
تنهد و دار قاصد الجنينة ...على تدويرة وجهو خطفت عينو نزهة وهي تحكي مع وحدة من الخديمات ...كانت سيريو و متحمسة في الموضوع ايلي تحكي فيه ...حالتها هاكي...رجعت بيه لسنين ...لذكريات مغروسة كيف الشوك في بالو يستحيل ينحيها ....
🔽🔽فلاش بااااك 🔼🔼🔼
❇نهاية الثمانينات ❇
قدامو كوم متاع كتب وكوم اخر متاع اوراق ...كل شي مفرت وداخل بعضو وماعندوش القدرة ينظمهم ولا عندو وقت يضيعو في ترتيبهم ...صوت طفلة رقيق سألو وحس بخيالها ياقف قدامو " سامحني خويا ...سألت في المكتبة قالولي كتاب الفيروسات النباتية عندك انت ...وانا مستحقتو في بحث "
من غير ما يهز راسو جاوبها" بما انو عندي فمعناها انا مستحقو كيفك...تو وقت نرجعو للمكتبة هزو "
شدت صحيح وما تحلحزتش من بلاصتها " وانت وقتاش تكمل بيه ؟!"
باقي ماخزرلهاش " شهر اخر "
شهقت فرد المرة " وه...وانا البحث حاجتي بيه لغدوة؟! ..."
شهقتها المفجوعة خلاتو بالسيف عليه يهز راسو ويخزرلها...كانت شابة مزيانة ...كل شي منها قد الطرف ...ضاوية شمعة و شعرها مسدل على اكتافها حرير على اقل نفخة هواء يتحرك ...رمشت عينو متوتر وحس معاها بكورون يضربو من راسو لصبع ساقو ...بلل شفايفو بطرفة لسانو وماعرفش شنوة يقول ...بالنسبة ليها عينيها كانو لاهين يلوجو ع الكتاب في وسط اوراقو المفرتة وموش معبرينو ...ماكانتش عارفة انو تحت يدو محلول ولاهي يخدم بيه...سكرو ومدهولها "تنجم ترجعهولي غدوة "
بقات تخزرلو ويدو قعدت ممدودة ،هبطت راسها وحكات بنبرة واطية " انت زادا مستحقو ..." تحمست وقت خطرت ببالها فكرة تخدم لصالحهم الزوز " علاش مانخدموش بيه مع بعضنا ..." جبدت كرسي وقعدت مقابلتو " وهكاكا لا انا نضيع وقت ولا انت "
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Storie brevi★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
