🌾الحلقـــ35ــة "القسـ2ـــم "🌾
🍀❇❇🍀
صوت ضحك سيلين وهي تلعب قدامو خلاه يعمل بون كيف ولا اراديا يتبسم لهاك المنظر،كان من الممكن تكون عندو حفيدة في عمرها لو عرس بايلي يحبها والا ع الاقل كمل عرسو بجناة لكن الله غالب موش كاتبلو يكون بو ولا يكون جد ...الشي ايلي صبرو هو انو هاك البنوتة ايلي دخلت لقلبو من اول ماراها ، من دمو ومنو وينجم يحسبها حفيدتو ...بالاخير هي حفيدة خوه ودمهم دم واحد .
اذا هو مركز بكل حواسو مع سيلين فأركان كان مركز معاه هو ...وبشوفتو سارح معاها تأكد انو ايلي قااال الدم يجبد ما كذبش واحمد كيف عرف بنتو على اول ما راها ماكانش من لا شيء ،الحكاية مربوطة بالمشاعر موش بالعقل ... غريزية تتولد مع البشر وتقعد معاه لين يموت ...طبس راسو و عض شفايفو بندم ،اللعبة ايلي لعبها من اربعة سنين ...كانت على جال المرا ايلي حبها...لقى روحو يتبعها ويبتبت عليها ويحاول يعرف كل شي يخصها...تبع الخيط لاخرو لين وصل لراسو ...وتصدم وقت لقى راسو مربوطة بشدة مع خيوط ماضيه...
خرجو عبد الجليل من سرحتو وهو يسأل فيه " توا بعد مانحيت الغرز وكنترولك نظيف ...باش تحضر لاجتماع ناز الجاي "
هز راسو وخزرلو بشرود للحظات " شنوة قتلي ؟! "
صفر عبد الجليل " اوهووو...بالك مشغووول جملة ...زعمة بشكون " غمزو وضحك وظاهر مقصودو شنية
فهمو اركان ومانجمش ينفي شكو " تولين موش كيف ماتراها...مشاعرها ايلي تكنها ليا عكس ايلي متصنعتو وتشوف فيه "
تنهد عبد الجليل وهو يتفكر في كلام تولين وقت كان راجلها بين الماكينات " ننصحك ماتحكمش عليها بها التخمام هذا...تولين اختارت طريقها ...وانت معاها في ها الطريق...ماتحاولش تتفلسف و تلوج في نقاط ضعف لعلاقتكم "
بالاساس علاقتو بيها فيها عيوب كبيرة واسرار ...واذا ماتكشفتش ها الاسرار ليوم ...غدوة ترجع ضدو ...وتحاسبو قبل الناس الكل خاطرو خبى عليها ...نفخ هواء ثقيل وهو يفرك في شعرو بعصب " سي عبد الجليل ....فمة سؤال نحب نسألهولك ...مانحبكش تجاوبني عليه ...لكن نحبك تخمم فيه "
شاورلو عبد الجليل براسو موافق واستنى يسمعو شباش يقول ، حك اركان لحيتو وخزرلو في عينو " لو ...ماصارش الاكسيدون ...كنت انت ومرتك كملتو حياتكم ..."
تنهد عبد الجليل وشيع عينيه لسيلين " ...عرسي وفى وانا وجناة طلقنا ...قبل الاكسيدون ...يعني ...حكايتنا ماكانتش مربوطة بالحادث "
مااستناش بارشا وقت باش يزيد يسألو " لو ...كان ...عندك صغير...من جناة...كان توا في عمر تولين موش هكا ؟! "
حبست عينين عبد الجليل ومانجمش يرمش لثواني طويلة ...الفرضية ايلي قالها اركان ...كان يفكر فيها قبل لحظات وهو يتفرج لسيلين ...لكن وقت سمعها منو ...حس ايلي فمة تركينة من قلبو تمست ...ومع هاك الاحساس الغامض خير يسكت ومايزيدش يحكي كلمة اخرى ...رجع يخزر لسيلين وخلى عقلو يسرح في حاجات وحسابات ماظهرلها كان وقتها باش تتطغى على افكارو .
🌾 🌾
🍀❇❇🍀
يعدي في الاوراق الورقة في جرة الورقة ،بعد ماقرى كل اسم وثبت في الكوردوناي متاعو مانجمش مايعطيش رايو ، خزر لتولين لقاها متوترة وتستنى فيه يقول اي كلمة يبردلها نارها ،مط شفايفو ورجع نظمهم وحطهم قدامها " ننصحك ...تقدمهم للشرطة...ممكن كلام جناة يكون صحيح...فرصة باش ايلي خطف بنتك يتعرف شكون "
عطات فرضية اخرى " وممكن جناة تلعب معانا في لعبة...انا معادش نصدق حتى حد ...خاصة ايلي عندهم علاقة مع عائلة بالرجب سوى من قريب والا بعيد "
غامر بكلامو معاها قاصد يتستيها " لكن انت ...تتعامل مع عبد الجليل ...وهو واحد من كبارات عائلة بالرجب "
جاوبتو من غير ماتتردد " عم عبد الجليل غير ..."
هز حاجب بحاجب " وعلاش غير "
سكتت وبحلقت فيه بضياع ...سؤال ماتصورتش تتحط قدام ضرورة الاجابة عليه...لكن رغم هذاكا لقات تفسير " وقف معايا بارشا وعاوني ..."
تنهد المحامي ورجع يتفقد في الاوراق قاصد يبدل الموضوع " باهي ...شنوة تحبني نعمل توا بهاذم؟! "
ضربت كفها ع الطاولة " هايل هذا السؤال ايلي نحب نسمعو ...نحبك تثبتلي من ها الاسامي الكل ...واذا لقيت فيهم الزوز ايلي خطفو سيلين ...فمعناها الفاضل وعزوز هوما ايلي خطفو بنتي ....حاجة اخرى...انا مانيش ناسية الاكسيدون ايلي مات فيه بو اركان واذا ها الزويز زادا عندهم يد في موتو...فمولى الكاميون ايلي راه اركان ...اسمو بين ها الاسامي ...اذا نجمنا نوصلولو ...نكونو لفينا حبل المشنقة على رقابيهم وثبتنا التهمة عليهم "
حك جبينو في لحظة تفكير " ينجم يكون...اتو نتبع ها الاسامي بالاسم بالاسم ...واذا صدقت روايتك...فموت عادل كانت جريمة موش حادث عادي كيما يتحكى "
أكدتلو باشارة من راسها ، محمحت قبل ماتسألو " ...حقا سي فريد...شنوة عمتلي في الحكاية الاخرى "
كان عارف قصدها لكن عمل روحو موش فاهم " اما حكاية...بيناتنا بارشا حكايات مدام سويدي "
ضحك باخر كلامو وبدورها ضحكت ،اضطرت توضحلو " في ما يخص ...موضوع التبني متاعي ...عرفت كيفاش صار "
تململ في بلاصتو ومحمح " في الحقيقة ..ما وصلت لشي...التبني ماكانش لا عن طريق السبيطار ولا عن طريق القرية...يظهرلي امك وبوك...هوما ايلي عطاوك لمدام نزهة "
كبست على نواظرها " كنت متأكدة انو امي تعرفهم...واوراق تبني معادش لقيتهم باش نثبت فيهم ونعرف اساميهم ع الاقل ...هاكي علاه نحبك انت تعاوني "
طمنها " قاعد نتبع في ها الحكاية وان شاء الله نوصلو لخيط "
كملت شربت اخر رشفة من عصيرها " ان شاء الله ...وتوا خليني نروح اركان وحدو وزيد عم عبد الجليل قتلو يستناني وانا وخرت بارشا "
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Short Story★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
