🌾الحلقـ35ـــة "القســ4ـــم " 🌾
🍀❇❇🍀
خف ساقيه وهو يطلع التلاثة درجات ايلي قدامو...بزهرو ماكانوش بارشا وماعطلوهوش ...خذى حذرو قد ما ينجم ،غلطة وحدة يعملها تنجم تكلفو حياتو ...بينما اذا عمل ايلي عليه وكمل المهمة كيف ما يلزم ...يستنى فيه عالم جديد ...عالم كيف ماتمناه وكيف ما حب ...دز الباب دوبلاش وطل براسو ...شاف جناة متكية بظهرها ع الكرسي ومادة ساقيها ع الطاولة ايلي قدامها ...تتكيف في سيڨاروها وشاردة معاه في عالم غير عالمها وماهيش شالقة بشي ...الشي ايلي سهل عليه الحكاية ...قدم ناحيتها بخطوات ساكتة ماتنجمش تسمعها ولا تحس بيها ...دخل يدو لجيبو وجبد خيط استيكاي غليظ و اكحل ...مططو بين صوابعو يجرب فيه اذا مازال يتعمل عليه والا لا ...كان بالضبط كيف ما حب ...حاضر يستنى كان في ضحيتو ...زاد قدم اكثر لين ولى وراها بالضبط ...خزر لوجها وهي مغمضة عينها وتبسم ...ها المرا بطبيعتها فاقدة علاقتها بها اادنيا ومهمتو باش تكون اسهل ملي تصور ...
حست بخيال ياقف وراها...حد اخر معاها في البيت ...حلت عينها على كبرها مفجوعة... دوب مارات هاك العينين ايلي تثبت فيها طاح قلبها من بلاصتو وصاحت مرعوبة ...لكن بلعت صياحها وضاع صوتها وق تلف الخيط على رقبتها ودار بيها ...عكس كفوفو و ضغط بيهم على كرومتها ...حاولت تمنعو وتخفف الخنقان وهي تشد الخيط بصوابعها وتجبدو لعل توسعو و ترجع النفس ايلي بدى يتسكر عليها ...تصككت بساقيها بحرارة الروح.. قلبت الطاولة و فرتت ايلي كان عليها ...تنطرت بونتوات السواڨر ع القاعة و تكسر كاس الماء الفارغ لقطايع وكل قطعة مشات لتركينة ...بقات ساقيها تتحرك بقوة وهيستيريا تحاول تمنع بدنها من يدين جلادها ايلي موش ناوية ترحمها .
قرب شفايفو من وذنها ووشوشلها صوت خشين مبحوح " ايلي سرقتو من دار الفاضل وين؟! "
حمار وجها وحست بعظم ڨراجمها يتفتت من الضغط متاع الخيط ...حلت فمها على وسعو لعل تلقط هواء يخليها ترجع تتنفس ...ضغطت كفوفو اكثر واكثر ورجع لتوشويشو " عطيتو لمرت اركان ؟! موش هكا ؟! "
حركت راسها بمعنى لا وعجز لسانها ينطق بحرف ...ايلي صار صار توا ...وهي المتهومة الاولى والاخيرة...وتولين مالازمش تتمس ولا يقرب منها الفاضل ...في لحظتها حست بالندم و تمنت لو ما عطتش الاوراق لبنتها ووحلتها ... حرك كرومتو يمين ويسار جبد اطراف الخيط جبدة قوية رعش معاها بدنها فرد رعشة ...وبدا وجها يزراق بكلو ...ذبلت عينها ومانجمتش تقاوم الرزن ايلي ثقل جفونها ...لعبت بالنار ورمات روحها فيه ...باش تموت ...وتفارق هاك العالم ...وحيدة كيف ماعاشت فيه ...موش باش يبكي حد عليها وموش باش تلقى حد يزور قبرها ويدعيلها بالرحمة...حد ماباش يتفكرها غير انها المرا ايلي تقتلت في بيت وتيل وحدها ...باش تفارق ها الدنيا من غير ماتسمع كلمة امي من تولين ...من غير ما تصارح بوها بحقيقة بنتو ايلي مايعرفهاش ...ماكانش لازم تأجل ولا تستنى الوقت هاكي الكل باش تصارحهم ...المرة هاذي الموت كان اقربلها وسبقها ...هفتت حركة ساقيها وشوية شوية بدات تقل قوتها ...رعش بدنها كآخر محاولة ليه باش يقاوم ...شخرت بين يديه ...وغمضت عينها مسلمة ...ايلي مقدر خلي يصير ..لعل الموت ارحم من هاك العالم .
🌹🍀🌾نهاية الحلقـــ35ــة🌾 🍀🌹
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Короткий рассказ★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
