#أعلان ..
في ضاحيه من ضواحي البلاد و بالتحديد ف المزارع ..
عيلة بعيده كل البعد على ثقافه المدن عيلة قرويه يحكمنها العادات و التقاليد ..
مبدئهم الاول الراجل هوا الآمر و القاضي الوحيد بينما البنت مجبوره انها تعيش تحت سلطته ،
مجبوره انها توافق على اي قرار ياخذوه في حياتها ،
البنت ماعندهش حريه شخصيه او حريه اختيار
مجبوره انها تعيش تحت قيودهم و سلطتهم و الا مصيرها حيكون زيها زي الي قبلها لما حاولن ايتحررن
1 "
جبروني ع اني ناخذه و كنت عارفه ان قرار بابا بس عشان مانقعدش ع ذكريات يوسف او نخش في حاله نفسيه جديده بس محد قالي ان متزوج ، غشوني و ضحكو عليا ،
شفت لمراته و تنهدت ، حرام صغيره رغم نظراتها ليا الا اني شفقت عليها و انا الي مجربه الحب و قهرته ، اكيد حتى هوا يحبها و انجبر عليا واضح من لما سيبني ليلة العرس ، هل حنكمل في زواجي كيف اي قصه و لا للقدر كلمه اخرى ؟ "
2"
ماتجيبش ، عقيمه ، مازلتي ماحملتي فلانه تزوجت بعدك و عندها ثلاثه ، لكي ست سنين ظالمتيه و لا العقم منه هوا
مش مني و لا منه ، نصيبنا كاان هكي ، الشي هذا مش في يدينا كيف حتفهمو ، كلامكم خرب علاقتي كلامكم دمر حياتي ، و لا انا نضحك ع روحي ب حجه كلام الناس
لو حبني كان صبر عليا اكثر ، لو حبني كان دار التحليل عشاني ، لو حبني كان خلا حبنا فوق العادات و كلام الناس ، بس بأختصار هوا راجل شرقي تفكيره ان الي يبيه يديره بدون مانحكي ولا حرف ليش لاني ( البنت ) و البنت عندهم تستعبد و بس "
3"
ليش هوا الحب قماش تفصله كيف ماتبي لا عجبتني القطعه هذي بس بنقص فيها من هنا شويا و بنعدلها من هنا شويا ، لالاه غلطان ياحبيبي انا مش كيفهن و لا عمري حنكون كيفهن
حبيتني و انا لساني طويل و قليله ادب و الي في راسي نديرها مالا حترضى بيا هكي انا مش حنغير اي شي عشان اي حد و مهما كنت تكون بالنسبه ليا "
4"
اها راجل صاحبتي وبنت عمي و تزوجته بس براضها ، هيا الي رضت انها تزوجني لاه عشان تأمن ع ضناها و راجلها من بعدها ، الله يرحمها
ليش تحكو و انتو مش عارفين شن قاعد يصير ، تعذب ف العويل " معايا انتو ف الحوش عشان تحكو " ، سحرت الراجل " اه سحرته بس ب طيبتي و نظافة قلبي مش بالسحر الي تحكو عليه انتو " ، حتجيب عويل من رحمها و تغير عليهم " تعلمو بالغيب ؟ "
مدام مش عايشين حياتي و مش عارفين انا شن عشت و شنو الي مر عليا عشان وصلت للراحه هذ ف ماتحكوش "
... : قصصكن غريبه بس كل وحده خلت لروحها بصمه في حياة غيرها بشكل مختلف ، ضحكت ببصاره مزال في شي اخرى
.... : نحكيلك ع الام الي سحرت ولدها
.... : شفت لملامحها ، تحكي جد انتي
.... : والله
؟؟؟؟؟
__________________________
عادات ، تقاليد ، شرع ، و دين .. هذا مايعنيش انك تستعبد المرأه
مدام ربي خلقها حُره ف هيا لها كامل الحرّيه في قرارتها ، لها كامل الحريه انها ترسم حياتها بما يرضي الله ..
بنت "عار تقرأ ، عار تطلق ، عار تقعد ارمله ، و عار اذا ماتزوجتش " ؟ ، الراجل " يحقله يدير اي شي لان راجل " ؟
في اي دين لقيتو الكلام هذا ؟؟ .
( الرِّجَالُ قَوَّامُونَ عَلَى النِّسَاءِ ) صدق الله العظيم
صح الراجل قيم ع المرآه وصح هوا رئيسها و ولي آمرها ، لكن الاسلام مامنعش من انها تعلم و لا حرم انها تطلق و لا كان عيب ان يتآخر نصيبها او ترمل
ارتقو في فهمكم للإسلام ، حيجي يوم و تحاسبو ع كل حرف مش بس فعل
رواية #خُلقتْ_حُرّهْ
الاعلان غريب شويا بالنسبه للاسم بس مع الروايه حتفهمو قصة كل بنت و كيف قدرت تغير حياتها و قدرها ،
حنتفقو ع التنزيل من توا ، يومين ف الاسبوع " الاحد و الخميس " ♥️ اما التفاعل حنشوف اذا كيف ما وعدتوني او لا ♥️♥️♥️
للكاتبه #ثريا_حسين_حمو ✍✍
#روايات_ويوش_حمو ♥️ .
