تابعوني اذا عجبتكم القصة خالو نجمة
البارت 1
شايف من يكلك رايح اتزوج؟
وتطفه الدنيا بيك ودمعتك تنوج
الكاع اتحسها مرجوحه اعله متن اعرج
واتكل الضيمك يسترسل
شايف من تعوفه وتكعد من النوم
ورمضان الحجي كاضيها بيك يصوم
من مابيك تحجي اشلون بيك اتكوم
ويراد الصوتك عكازة
ام احمد..زينب يمه اذا خلصتي تمشيط كومي حشي علف للهايشه قبل لاتضلم الدنيه
زينب..خليت المشط بالكاع بقوة متعصبه من كلام امي
ادري بس اني بالحوش خو مابس اني؟
والله مساع كملت حلب الهوايش وطبيت سبحت
ترديني ارجع احش واني توني سبحانه؟
ام احمد..جا منو يروح يايمه؟
زينه اختج تدرين ابوج مايخليها تنزل للكأع العصر
ومريم هلحاطه الهدوم تغسل بيهن
زينب..نفخت خدي بملل كارها روحي بسبب تعب العيشه وصعوبتها
لميت شعري وهو مبلل لفيت حجابي وفريته على خشمي لان الجو شته وباردة كلش ومغيمه
نثت العصر خفيف وبطلت مبينه اليوم تغركنه واحنه بيتنه مفطر من كل كتر
بيوم التمطر نشبع ماي
بس الحلو بالموضوع اذا عطشت نص الليل ماتتعب وتروح تشرب لان الماي ينزل على وجهك من فطور الحيطان
رحت جبت عباتي اتحزمت بيها ماطالعه بس عيوني اخذت سترتي لبستها لان بردانه
رحت ل امي سالتها
يمه وين الباذورة احش بيها(المنجل اله يدويه تستخدم لحصد الزرع)
ام احمد..خليتها فوك الحايط لاتاخذها زينه
زينب .طلعت للحايط ادردم بكلبي كلت كون تذبحني بيها واخلص من هلعيشه
راح اعرفكم عن نفسي
اسمي زينب عمري ١٧سنه اني الوسطانيه عندي اخ واحد اكبر مني اسمه احمد عمرة ٢٠سنه
واخوات اثنين زينه عمرها ١٦عدها نقص بعقلها بين قوسين مجنونه لذالك امي اتخاف ادزها للكاع العصر اتكول اولاد الحرام اهواي وهي فهمها على كدها لايسوون بيها شي وتالي تتصخم وجوهنا والوادم ماترحم
يردون بس علج يعلجون بي من ياخذون حلاته يذبو وساعتها عدهم سالفه جديدة تصير ويضلون يعلجون بيها
مريم عمرها ١٢سنه طالبه صف سادس ابتدائي
وضاله بنفس الرحله
مرات امي تبسطها تريدها تقرة حتى تنجح
احمد مبطل نجح للثاني متوسط وبطل
واني بطلت بصف الثالث متوسط
وعندي اخ اصغر واحد بينه اسمه امير عمرة ٨سنوات معوق مشلول
سبب هلشي اختلاف الدم بين امي وابوي مااعرف شنو الاسباب امي اتكول ضربوها ابرة علمود لاتصير تشوهات بس امر الله فوق كلشي
شكلي سمرة بعيون كبار من اضحك عندي خسفه بخدي تصيحولها غمازة مدري رصعه
قبل فترة بت عمي شافت ممثله تركيه اسمها هاندا مدري باندا اتكول اتشبهج
المهم عندي عمام اثنين
الجبير اسمه جابر عندة اثنين ولد
عمي جابر عينه ضيكه كلش ودوم عينه علئ حلال غيرة
وعمي الوسطاني عادل عنده اثنين ولد وابنيه وحدة اسمها غصون مثنى ابن عمي عادل هو واحمد اخوي دوم يمشون سوة ونفس الاطباع تقريبا
واني وغصون تؤم بالروح وحدة وفعلا انولدنه بيوم واحد
مرت عمي عادل حامل بغصون وطلكت الصبح وامي حامل بيه راحت وياها للمستشفئ
امي من شافت مرت عمي تطلك بطنها هاجت
ايكولون البطن الحامل اتغار من تشوف وحدة تطلك كدامها
وفعلا بليل امي طلكت بيه وجابتني
كبرنه اني وغصون سوة مانتفارك ابد
غصون طبعها شخصيتها كلش ضعيفه واتخاف
عكسي تماما السان وارادد امي تصيحلي الوكحه
لان من واحد يسمعني احجايه ارجعها اله بعشرة
أنت تقرأ
فصليتين
Randomجابوها دفع للدار لاديرم ولاحنه ولاصفكه ولادف النعر بالسلف لاهلهلوله لاملكه سألت الناس عن قصه هالبنيه شعجب جارو عليها بغير حنيه ورديت بكلب حزنان من كالولي فصليه لعنت ضلم التقاليد بالف حركه عمرها الاخضر الهرفي بسعر اليابس تحركه احديثه اتكول حوريه برب...
