ما تخبئه القلوب

هدوء في منتهي الدوشه

(الاعوام تغير الكثير تبدل التضاريس واشكالها فكيف تنتظر الا تغير شخصيتك )

المقدمه
طول الوقت بنتكلم مبنسكتش بس كلامنا دايما جزئين جزء خارجي او الظاهر من كلامنا اللي هو المفروض نقوله ومنقولش غيره وجزء داخلي هو احساسنا بجد اللغبطه واللعبكه اللي جوانا الكلام اللي بنخبيه ورا ضحكه ورا نظره بنخبيه في قلوبنا عشان كدا قولت لازم نواجهه ونقوله حتي لو في مجرد صفحتين بيتكتبه بيلخصه كل الكلام اول حاجه هي  التغيير احنا اتغيرنا اد ايه ازاي احنا امبارح مبقناش زي احنا انهارده ولا هنبقي زي نفسينا بكره الظروف اللي بتغيرنا المشاكل والمواقف بتغيرنا الحياه بأمطارها وبرقها ورعدها مبيخليناش زي ما كنا
(لم اعد كالماضي تغير كل شئ بداخلي ،نفسيتي ،تفكيري ،تغيرت بالكامل )

تغيرت لتغير كل شئ حولي لتغير كل شئ بداخلي  او بالمعني الحرفي تغير نظرتي لمن حولي فقد اذلت الستار الذي اعماني عن الحقيقه 
انت اتغيرت طب ايه سبب التغيير ده هو اننا كنا ساذجين ولا كنا عايشين في عالم تاني ولا كنا فاكرين نفسنا علي القمر مش الارض سبب تغيرنا دايما هو الغير متوقع سبب تغيرنا اننا عمرنا ما توقعنا ان مثلا  حد بنحبه يسيبنا سواء يموت او يغدر بينا وبحبنا او صديق قريب منك انهارده وجزء كبير من حياتك او بمعني اصح هو كل حياتك وفجأه تلاقيه سابك وباعك في اول محطه او ان مشكله في عيلتك او وسط اهلك تحصل او انك تفقد حلمك في لحظه وتلاقيه راح لحد تاني او لحظه ضعف تبين كل واحد قدامك علي حقيقته او او او   كل دي حاجات بتهدنا في لحظه بتكسر جزء من جوانا بتفقدنا حته من براءتنا هي مواقف اللامتوقعه اللي بينتج عنها قرارات كتيره مبنبقاش عارفين هي غلط ولا صح ولا حتي هتودينا علي فين دور كدا دايما علي مشاكلك وانكساراتك  هتلاقيها سببها حاجه واحده بس هي حدوث الغير متوقع لما قعدت افكر قولت ليه منتوقعش ليه دايما نخلي المواقف دي تكسرنا بدل ما تقوينا ليه نوقف حياتنا علي حاجه مش ممكن ترجع او حاجه باعتنا بسهوله يعني مثلا واحد حب واحده وسابته عشان غيره او العكس يبدء فقدان الثقه في كل اللي حواليه في كل البنات او لو بنت تفقد الثقه في كل الولاد مع ان لو بصينا هنلاقي حاجه من اتنين يا اما احنا اختارنا غلط او في وقت غلط او حصل حاجه تانيه مجهوله مستخبيه جوا قلب التاتي انه مش قادر يثق مش قادر يحب مش قادر يستعيد قوته وحلمه تاني بسبب كسر قديم مش قادر يخلي الزمن يداويه ويبدء موقف ورا موقف يغير فيك وكل حاجه تقابلك تعيد تشكيلك بس دايما خلي دايما تشكيلك للافضل للاقوي خليك نوع جديد من معدن نادر مفيش حاجه تكسره مفيش حاجه تؤثر فيه وان كل واقعه تقوم منها اقوي من الاول كن انت واخرج افضل ما لديك اخرج من معركه الحياه اقوي ولا تجعل نفسك من ضمن خسائر الحرب