اسكريبتات ل سلمى ياسر

اسكريبت 8

-انت يابني مبتفهمش ؟! قولتلك مبحبكش ، مبحبكش انت ايه !
= انا بحبك
- يا ولي الصابرين ، وانا مش بحبك ممكن ترحمني بقا وتنساني خالص
= مش عارف والله ، انا حاولت انساكي بس مش عارف ومش قادر ، كل ما ببعد بلاقيكي عايشه جوايا ، قاعده جوا قلبي وحالفه ما تطلعي ، انا عمري ما حبيت حد كده فـ اديني فرصه
- مفيش فرص عندي انا مخطوبه اصلا
= بس ايدك فاضيه ومفيهاش دبله
- قاريين فاتحه
= نقراها تاني انا وانتي
- انت ايه مبتتعبش !
= ولله اموت عشان عيونك

سيبته ومشيت ، مبقاش عندي ردود ليه ، رفضته كتير وهو مصمم و يا يكلمني يا يكلم بابا بس انا مش عيزاه .. او مش عايزه اظلمه معايا

< طب قوليله سبب رفضك وهو يا يرفض يا يوافق
- ما انا ممكن اصعب عليه ويعملها من باب الشفقه عليا
< وممكن يكون بيحبك فعلا وعايزك بعيوبك قبل مميزاتك
- الموضوع مش بالسهوله اللي بتتكلمي بيها
< وممكن يكون بالسهوله دي فعلا وانتي اللي مكبره الموضوع

سكت شويه بفكر في كلامها ، هو ممكن يتقببني كده فعلا زي ما انا ! حُبه ليا يوصله للدرجه دي !!

قابلته تاني يوم وانا رايحه الشغل ، نفس كلامه ، نفس تصرفاته ، نفس إصراره عليا !

- طب نقعد نتكلم شويه !
= ياريت انا موافق

روحنا قعدنا في كافيه هادي على النيل ، هو ساكت ومركز معايا ومستنيني اتكلم وانا متردده وساكتة
- اشمعنا انا يا أحمد ؟!
= عشان انتي يا سلمى
- وضح كلامك
= بعيدا عن إنك بتحاولي تبقي جد يعني وانتي اساسا تافهه ، بس انا حبيتك وخلاص ، لو قولت اسباب يبقى مش بحبك ، المفروض لما تقوليلي اشمعنا انا اقولك اسباب حبي ليكي ! لا انا بحبك وخلاص وقعت فيكي كده من غير ما احس زي ما يكون قلبي محبش حد ومحوش الحب ده كله ليكي انتي ، انتي وبس
- ...
= مش عايزك تحبيني بس مترفضيش قربي كده ، انا بتمنى بس ابقى جمبك وانا هخليكي تحبيني
-...
= محدش هيحبك زي ما بحبك بس لو في حد في حياتك قوليلي مع إني سألت وعرفت إن مفيش
- واللي سألته ده مقالكش إني عندي كانسر
= إيه !
- عندي كانسر يا أحمد ومش عارفه فاضلي كام يوم واموت ، شعري بيقع من الكيماوي ، جسمي زي ما انت شايفه كده ، انا بقايا إنسان وشبه ميته
=...
- الموضوع صعب وحاولت كتير ارفض من غير ما اقول حاجة عشان مشوفش نظره الشفقه اللي في عيون الناس وجو الصعبانيات ، انا عارفه إن ده نصيبي واللي ربنا كاتبهولي الحمدلله ، انت تستاهل واحده تكمل مش تموت وتسيبك يا أحمد ، تستاهل تعيش حياتك انت ومراتك وولادك إن شاء الله انا مش هقدر اعمل ده ، انا هموت .. ربنا يعوضك بـ اللي احسن مني

قومت مشيت قبل ما اسمع منه اي كلام ، مش عايزه اصعب عليه ، مش عايزه ابان ضعيفه ، مش عايزه اتكسر