اتجوزت وحش

الفصل التانى

جاهزين؟ و نقول بسم الله.

مازن جمال الحمصانى

وانا راجع الفجر من سهره جامده سكران كالعاده. كنت واخد بنت جميله معايا علي البيت نكمل سهرتنا هناك. مش شايف قدامى من كتر الشرب و طبعا هيا زى غيرها مش بنت بس هوا ده المطلوب انها تريحنى بعد يوم شغل طويل ما بين الشركات و المصانع.

انا من يوم ما خلصت جامعتى وانا اللي بقوم باداره شغل العيله كله مع بابا. حتى وانا بعمل ماجستير اداره الاعمال كنت بدير المجموعه كلها.... يعنى مليارات . شغلنا فى كله حاجه بدايه من مصانع منظفات لحد مصانع الحديد والصلب.

عيلتنا من الاخر اغنى عيله فى البلد و الدول العربيه.

كنا بنستثمر للامراء و الملوك فلوسهم وانا صورى دايما على الصحف و المجلات.

زى ما بيطلقوا عليا "رجل الاعمال الانجح والاوسم."

حياتى كانت دوامه شغل طول النهار و بعد نص الليل سهر و شرب و لما تطلب معايا اخد اى واحده تعجبنى حتى لو كانت متجوزه باخدها و بروح بيها البيت و اطلق العنان لشهوتى. اه اى واحده ليها تمن.

انا راجل صاحب مزاج. والحريم حوليا زى الرز و كله عايز يكون معايا بس انا ولا واحده فرقت معايا.

كنت عبيط وانا صغير وافتكرت ان ممكن الاقى واحده تحبنى لنفسى و كنت فاكر ان فى حاجه اسمها حب.  كنت فاكر ان فى بنات محترمه.

لحد اما شفت البنت اللى بحبها فى حضن صاحبى. صحابى بمعنى اصح.

كانت عايشه دور الشريفه العفيفه. كانت ممثله بارعه اعترفلها.

من سبع سنين فاتوا.

"انت فين يا مازن؟" احمد صاحبى الانتيم و صديق الدراسه كلمنى.

"معلش بقى مش هقدر اسهر النهارده. مسحول فى الشغل مع بابا." ودى حقيقه كنت لسه مخلص جامعه من شهرين و بابا مصمم انى ابقى من اقوى رجال الاعمال فى غضون سنه.

"يا عم هيفوتك شويه حريم جامده. فى كام بنت هيعجبوك. عموما انا واخدهم و طالعين شاليه العين السخنه. حاول تيجى. الطريق مش هياخد ساعه." احمد كان شيطان و بيعرف يغرينى.

"هشوف يا احمد. انت مين معاك من الشله؟" 

"تامر و هانى و الشناوى. هستناك يا مازووون." احمد قفل و عنده امل اجيله.

كنا شله اصحاب و كلنا ولاد رجال اعمال و سرنا مع بعض. بس انا لما حبيت دينا ما قولتش لحد فيهم عنها غير اسمها. لانى حبيتها بجد و كنت شايفها مراتى و عايز احافظ عليها. حتى الخطوبه ما قولتش لاصحابى انى خطوبتى تانى يوم.

كنت ناوى افاجأ الناس كلها بالملاك اللى هتجوزها. 

المهم خلصت شغل و قررت اروح شويه و فعلا فى خلال ساعه الا ربع كنت فى العين السخنه.