طوارئ

الحلقة الاولى

#طوارئ 💉
الحلقة الاولى
.
.
.
-ينبغي أن نجازف احيانًا فنحن لا ندرك حقًا
معجزة الحياة إلا إذا أتحنا لغير المتوقع أن يحصل -🤍
.
.
كنت قاعدة مقعمزه في حوش جدّي نسمع في هرجتهم وراسي مصدددع بكل بابا وماما يتعاركو عالمستشفي وعالحالات و الدكاترة وهكذا

جيت في عيلة كلها دكاتره ومن وانا طفلة نسمع في كلمة " ان شاءالله تكبري وتقعدي دكتور"
"طالعه الباتها دكتوره" زي امها شاطره ...وخوذولكم من الكلام هضا واجد بكل وهكذا

قعدو علي راسي وحتي ما كانش عندي خيار اصلا اني نختار تخصصي😂 تربيت علي اني انا تخصصي طب نبي ولا ما نبيش ماهو مش ب اختياري غصبا عني 🤷🏻‍♀️

كنا ملتمين في حوش عيت جدي يوم جمعة ونهدرزو وانا راسى مصدّع ونبحت فيهم وهما يتناقشو

بابا >> شيمو صبي ديري شاهي
انا >>نعم ؟
عمو خيري >> من لاحس عقلك
انا >> عيب يا عمو هي المستشفي عقبتلي عقل بيش يلتحس😂
بابا >> الشاهي 🙄
انا>> شفت شفت كان غيره عقلي 🙄
عمو خيري>> بشويه عالبنت 😂
بابا>> رايحه مستوهه بكل 😂
ماما >> لا انت الي مركب عليها بنيتي
بابا >> بنيتك بروحك

انا نعيط من المطبخ >> عمو خيري دونك حز حزوز😭😂

//
//

صبيت ندير في شاهي وجتني اروى بنت عمو

اروى >> العيلة اللي كلها شباب هذي🤦🏻‍♀️😂
انا>>باهي اللي عمو  لحّق يجيبك انتي والسوسة زينب لو هكي كان جاني توحد بروحي 🙄😂
اروي >> سمعتي الصدمة اللي سمعتها عالغدا ؟
انا>> لالا ماسمعتش شي "وحطيت البراد ع النار"
اروي >>منير قالو يبي يخطب 🙂
انا>> مستحيل  ماقاليش ! لعند امس كان يحكي معايا !
اروى>> يعني قولك يدير هكي عشان يقهرني
انا>> مشعارفة امتي ح تبطلي الفيلم التركي اللي عايشة فيه بس عنجد بيقهرني 😂😂😂
علي اساس شايلك من ارضك :)
اروى>> مستحيل تحكي حرف كويس ! لازم تسمي بدني

انا>> والله انتي اللي غبية

مع خشت زينب >> شن تحكو
انا>> اطلعي يا سوسة برا
زينب>> مازال راقيلك عشان قتلهم انك ما مشيتيش المستشفي الاسبوع اللي فات وخليتي منير يوصلك حوش صاحبتك ؟
انا>> ارووووووووي طلعيها طلعيها را نخنقهاااا المستفزة 😭😂
اروى>> قردة هذ
زينب>> ح نطلع بس بجوي راه 😌😂

طلعت زينب وطلعت وراها حطيتلهم الشاهي ، بعدها بابا قال انه بيطلع عنده شغل قتله يحطني في طريقة فالحوش  عشان بكرا عندي تدريب بدري
وسيبت ماما وخوتي لصغار يهدرزو غادي

وصلت للحوش وكنت حاسة روحي تعبانه ماقدرتش حتي نحول دبشي خشيت داري ورقدت بدبشي بكل
//
//

-شيماء-
من بات وام معروفين من اكبر واشطر الدكاتره

عيلتي كبيره وعندي عمام وعمات اللي مسافر واللي قاعد واللي يجي واللي مايجيش المهم "خلطبيطه"