تتمة للأحداث السابقة
في تلك الاثناء وسيلة بمجرد سمعوا هدرة سفيان شافو في بعض .. كانت نظرات معمرة فرحة وكون ماشي خافوا الخطة تفسد راهم ناضوا دارو العرس .. اصلا هذا واش كانوا حابين من الاول انه يكمل معاها وينساها
وسيلة ( حكمتله يده وتبسمت ) ريحتني الله يريحك ويرضى عليك دنيا واخرة ياولدي
سفيان ( فوت لسانه على شفافه ورجع يشوف في عينيه امه بعدها زير على سنانه وقال ) الى ماتقبلش امي ودير فيها هكا وتحاول تفرقنا .. عمرها لا تدخل داري ولا تاكل من ملحي
وسيلة ( في ذلك الوقت صارت تحكي مع روحها وتقول هذاك الطالب خدمته هايلة خصني نزيد نرجع عنده ليكمل الخدمة .. ممبعد رجعت من سرحتها وشافت في سفيان ) ريحتني بهدرتك يا ولدي وماتتصورش شعال فرحتني
سفيان ( حس روحه مخنوق .. مكانش حابب هذاك الشيء وفي نفس الوقت حاسس روحه كارها .. التناقض هذا كان مميت .. تلفت ل امه وتبسم معاها ) المهم انتي ريحي روحك هذا الايام .. واذا حبيتي نديك لبوحنفية عند عمتي صفية اقعدي عندها ايام بدلي الجو
ايمان ( حاولت تدخل روحها فالوسط .. ضيقت عينيها وقالت ب دلال ) وانا رح نروح معاها .. بلاك تحتاج كاش حاجة ولا تمرض في وسط الطريق
وسيلة ( سرطت ريقها وقررت تكمل في الخطة هاذيك لحتى كل شيء يكون مستف ) بصراحة الراقي قالي مكلاه هذا الحمامات راهم يزيدوني
ايمان ( حطت يدها على قلبها ) تخافي يزيدو يركبوك جنون وخداخرين .. ديجا هذاك الشيطان خادم السحر الى كان فيك ومزال مانريحوا منه
سفيان (عقد حواجبه ) ماشي قتلو خرج صاي
وسيلة ( دوحت براسها يمين وشمال ) سحر اسود الى دارتهولي المغضوب عليها .. وهذا السحر الاسود مايروحش بالساهل خصه جلسات اكثر
سفيان ( صار يحوس في جيابه على لفون نتاعه ) ضرك نعيط لصاحبي يشوفلي راقي مليح .. على الاقل يمدلك ماء ولا زيت تدهني باه يخرج منك نهائيا
ايمان (عيطت ضربة وحدة) لالا
سفيان (استغرب منها ) وش بيك تقول قتلك نجيبلها طالب
ايمان (حاولت تدارك الموضوع ) تخاف مايخرجش عليها .. خلي غير هذا وصاي وزيد قالنا لوكان تقطعوا علاقتكم مع هاذي البنت احسن يعني
وسيلة ( رجعت تبكي من جديد ) اهئ اهئ .. هاذي من بعيد ودارتلي هكا لوكان تدخل داري وش دير يا ربي سيدي
سفيان ( هبط لعندها وطبع بوسة على جبهتها ) كيما قتلك تبقى غير هيا مارحش تدخل لداري .. ونتي بطلي توسويس كل حاجة غادي تولي بخير
وسيلة (مسحت دموعها ورفعت يديها لفوق وصارت تدعي ) ربي ينجينا منها يا ولدي ويحفظك من كل شر ويبعد كل ولاد الحرام
أنت تقرأ
راقصة في عهدة ظابط / الكاتبة منال منولة
Romanceعندما تلقيك الحياة بقوة .. فترتطم على الأرض وفي تلك اللحظة لن تجد الا الذئاب التى لن تقصر في نهش لحمك دون رحمة اما هي كانت صغيرة للغاية عندما حدث ما حدث كانت مراهقة حلمها قطرة حب كانت لا تعرف اي شء وعندما وقعت في الخطيئة خافت وركضت ولكنها أضاعت طري...
