نظرات جنوبية

البارت 29

اصومُ عنكَ ثم اتضرع اليكَ شوقا
لكي لا اتذكرك فأنا
احتاج ان لا احتاج
اتمنى ان لا اتمنى
اود ان لا اود
لكني اشتاق اليك
بكل ما اوتيت من ضعف 💔..!!

زهرة:
ومر شهر واني ماعرف اخبار اجسار ومادري بيه ..
بس جنت اشوف الستوري مالته بصمت ومااعلق
جان دائما ينزل كعداته وي اصدقاءه، يسوون محاورة شعرية وواحد يجاوب الثاني ..لو يغني لو يقرا موال لأن صوته حلو
واني بس اباوع وانقهر ..
واغار واحرك بروحي لأن تفكيري ياخذني لغير اشياء
اكيد بنية شافته وانعجبت بيه
لو اكيد وحدة علقتله وحجه وياهه ..

التفكير بيه صار مايفارقني لحظة ..بكل وقت اني اشتاقله واشتاق لأيامنا سوه ..
بس مابيدي شي!!
مرات اضعف واحن اله وكلبي ياخذني لمحادثته ..
اكتب وارجع امسح. .بس ماادز لأن منتظرة هو يبادر ..

بيوم ..جنت راجعة من المدرسة
امشي ولازمة دفتر بأيدي ومدنكة ممنتبهة ..
جانت اكو مجموعة ولد يوكفون بركن المدرسة يومية
لو يضلون يفترون يم المدرسة بس حتئ يشوفون البنات
وسمعتهم موزينة والكل متقزز منهم وميريدهم ..

جان طريقي من يمهم وفتت من يمهم
سمعت صوت واحد منهم يكول لأصدقائه ..
(اخذوا الدفتر منها بسرعة!!)

جنت شايلة دفتر فيزياء لان ماعرف امشي وايدي خالية ،  متعودة الزم دفتر وامشي ..

مشيت بسرعة من سمعته يحجي هيج
بس صار اسرع مني وأخذ دفتري مني ..
وكفت ودموعي تجمعت بعيني ..

زهرة: انطيني الدفتر..

الشاب: لايحلوة ماانطي

التفت لأصدقائه بكل وقاحة وكاللهم

الشاب: هه دفتر ذكرياتهه خنشوف شنو كاتبة بيه ام عيون

زهرة:

جان يريد يفتح الدفتر بس مااحس الا دفرة ببطنه ..
رجعت ليورا واباوع ولد غريب!! اول مرة اشوفه
لابس صدرية طبية ونضارات طبية هم
يطلع عمره بنهاية العشرينات!!!
كاموا يتعاركون والولد اجوا اصدقائه وياه والولد الدكتور وحده!!

التمت العالم وفاككوهم ..
راح الولد سحب الدفتر منه بكل عصبية واتقدم بأتجاهي ..

انمار: اتفضلي اختي هذا دفترج
واتمني مرة ثانية تنتبهين ..ومو بس تنتبهين
صرخي ولمي العالم عليهم لتضلين بس ساكتة وتبجين

زهرة: باوعتله وكتله شكراً
ابتسم ورجع يحجي وياهم ويهددهم بالشرطة ..

رجعت امشي وابجي وكل جسمي يرجف ..
اول مرة يصير بيه هيج!! وانحرج وانحط بموقف كلش موحلو كدام العالم ..
بسبب كم مراهق مامتربين ..

وصلت للبيت ومسحت دموعي حتئ لايحس احد ..
بس ماما لاحضت شبيه

ام زهرة: شبيهن عيونج شنو باجية؟!