نظرات جنوبية

البارت 30

راح اختفي شلون السراب الـ بالليل
كلمن بدنيا احلالك واحلالي
ونتفق مانتلاگة مو بس وجوه
لا اجي ببالك لا تجيني ببالي!!!

زهرة:

سديت الخط بوجهه وضليت ابجي، رجع دك مرتين واني ارفض
اخر مرة فتحت الخط وضليت ساكتة ..

جسار: شسويلج وشسوي لكلبي ولروحي؟
تعببببت ..انطيني حل يلاا شسوي!!

زهرة: لاتسوي شي بس انساني

جسار: أنساج؟؟!!

زهرة: جسار اهلي ماراح يوافقون لو مهما صار
حتئ لو بعد مية سنة اعرفهم كلش زين
همه يحبون زواج بنت العم لأبن العم ..وهاي عاداتنا صارلها سنين مو هسه اجي اني تالي وكت اخربها وامشي حسب مزاجي ..

جسار: صدك تحجين؟!!!
معقولة هذا كلامج زهرة
واني الكلت راح تتحمل وتصبر لحد ما الله يفرجها علينا ويقبلون اهلج ..
تاليها تحجين هيج!!

زهرة: اني غلطت وغلطتي انته

جسار: هسه صرت انا غلطة؟!

زهرة: جسار الكلام هوووواي حيل هووواي
وطاقة بعد ماعندي حتئ ابجي ..
اسفة علئ كلشي ..
وهايه راح تكون أخر مرة نحجي بيها لأن تعبت حيل والله

جسار: علئ راحتج ..
تردين تنسيني انسيني يزهرة!!
وانا هم مااريد اخرب علاقة الاهل لأن ابوي يحب عائلتكم وانتم اعزاز عنده لأن بيبيتج اخته .. وماريد اسوي مشاكل بسببي وتصير الطلايب من وراي ..
انسيني والله كريم ..

بس راح اكلج شغلة وخليها ترجية بأذنج

زهرة: شنوو؟!

جسار: راح ابقئ احبج لحد اخر نفس بيه

زهرة:
شهكت وكتله ....اني هم

تنهد وكال ..

جسار: نشوف القسمة شكاتبتلنا ..الله كريم

زهرة: راح اروح!!
تصبح علئ خير

جسار: الله وياج

زهرة:

سديته منه واني احس كلشي بيه أنكسر
جان هو مصدر أمان وحياة ثانية الي
بس اهلي خربوا كلشي!! لأن بعدهم بعادات قبل
والبنت لأبن العم ..
صح بابا واكف ويايه ومايقبل بكلام عمي ابو محمود
بس تاليتي ماأصير الا لمحمود
هه وعاد هو شلون محمود
مايجي بأضفر من جسار ..

جسار الي جان حلم طفولتي والي جان امنيتي وهو فارس احلامي!!
هو الشخص الوحيد الي اتخيله قبل لا أنام!!
هو الي خلاني احس بأحساس حلو وعيشني مشاعر الحب واني صغيرة ..

صارت هسه جروح كلبي منه ..

مااكدر انسئ شلون عافني 3 اشهر بدون مايسأل عليه ولا حتئ يدز رسالة وحدة !..

ادري أذيته وجرحته بكلامي من كتله انساني
بس هاي الحقيقة!!
اني وياه كلشي واكف ضدنا وضد حبنا ..