فصليتي ولكن الظروف.....

البارت الثامن عشر

اسيل

صار ثاني يوم و كمت سويت جسمي و غسلت من الشهرية وتوضيت صليت قريت قرآن شوية ولبست شال اخذت موبايلي ونزلت جانوا متجمعين لان جمعة وعطله رحت كعدت يم زهراء مسوين جمعه مال بنات على صفحه ويسولفن هم ضلينا نسولف شوية هنادي كالت......امشن برا عالثيل نفرش ونكعد نتشمس

ضحكت وكلتلها......بيج كَمل ولج وتريدين تتفلين على هالشمس التسلك سلك

كشت و ابتسمت بخبث كالت.....كل من يعاين الناس بعين طبعه

صاحت بيبي.....ها ول مصكوعه بيج كَمل تعاي حذاي(يمي) افليج

كمزت وكلتلها......يا بيبي والله مابيه جذابة

ضربت بيبي عوجيتها بالكاع حيل وكالت.....خايبه تعاي شمالج خايفه اذا ما بيج ماتعاينيهم هان اخوانج

غمضت عيوني واشرت لهنادي بايدي عود اني اعلمج رحت ذبيت الشال عالقنفه وفتحت شعري نزل على طوله كلهم انصدموا وكاموا يصلون على النبي حتى صفوان مجان عباله هوه بهالطول لان جان مبروم البارحه فصار اقصر بهواي من هسه وقبل من جنت سافره ماافتحه ابد
نزل ووصل جوه ركبتي

كعدت يم بيبي وكعدت تفليني واني اتأفأف واصيح.....بيبيييي والله مابيه نظيييف

ضربتني على راسي بخفة وكالت.....صميي حلكج رح اكفخج خل اعاين زين

من الفشلة طلعت موبايلي وكعدت اباوع
مقابلات مال توم كروز
مندمجه حيل ووعتني ضربة بيبي وهيه تكول.....هاذ شنهو الحلغومه

باوعتلها وابتسمت.....ها بيبي حلو موو؟

اخذت الموبايل من ايدي وكالت......خايبه موش رجال غنبله مااخذتي يل اغمه

ضحكت وكلتلها......بيبي هذاااااا توووم كرووووز نظرة منه للبنات يجلطهن قسم بذات الله اذا خطبني اضل اسبوع صافنة مثل المطي ويودوني للشماعيه

تنهدت بصوت عالي وحسرة سيروان ضحك كال..... اوووووف يمه بس خل ياخذوها عمي حتى لو زبال بس اخلص منها

باوعتله ورفعت حاجبي.....لا عفية خليني يمك اموت بلياك
خااااب دطييييير هو اني اريد اشوف ياهيه التتزوجك اول ماتسمع بسالفتك تطير وتختفي من كدامك

خله ايده على فكه وصغر عيونه وكال.....اي بالله كوليلي سالفتي شو مااتذكرها؟

لزمت خصلة وضليت ابرم بيها باصابعي.....احم احم اكوووولك حبيبي شوكت ت.......

قبل مااكمل كلامي كمز كمزة من القنفة مثل القرد ههههه طفر عليه سد حلكي
اوخر بيها واصيح.....تجي،،،،،،،ني،،،،ونط....لع

سد حلكي قوي وصاح بصوت باكي......كووووله من ورا صفوان اهئ اهئ اهئ وي......

مخليته يكمل وسديت حلكه وصحت....يمعوووود كااافي كااااافي والله مااحجي بعد بس اسكت