تهزمني السمراء وأنا نّد فرسان بقلم الكاتبة أديم الراشد// مكتملة

البارت الرابع والعشرين

« البارت الرابع والعشرين »
.
.
في بيت ثنيان
ثنيان اللي صفق الباب وسكره وهو يصرخ : من عايض ذا من عااااايض وثقت فيك وعطيتك الامان عطيتك شي ماعطيته احد قبلك وهاذي اخر افعالك تستغفليني اناااا ثنيان تستغفليني
الترف اللي كانت مرميه جنب السرير وهي حتى دموعها من الصدمه مانزلت كانت تناظره وهو يصرخ ويكسر وهو حرارة الكفوف ما تحس بها من الصدمه
ثنيان سحب حزام البدله وهو يلفه على يده : انطقي وش بينك وبين الزفت عايض
الترف ما قدرت حتى انا تشيل عيونها من عيونه
وخر ثنيان وجهها بغضب وهو يضرب بالحزام جنبها: اكلمك ردي
ما تكلمت الترف بحرف واحد وكسر حدة صراخ ثنيان دق الباب اللي يفجع
محمد اللي جاء يركض : يبه يبه فيه رجال يقول قل لابوك يجي
ثنيان : انقلع من هناا
مشاعل جات تركض : ثنيان اخو الترف تحت
لف ثنيان وهو يفتح : مييين
مشاعل : صالح
نزل ثنيان وهو متجاهل ألألام اللي يحس بها وراح لصالح اللي كان واقف على نار فالحوش ومعه سلوى
صالح اللي اول ماشاف ثنيان انقض عليه وهو يشده بتيشيرته : وين الترف وييين الترف وش سويت بها يا كلب
ثنيان دفه عنه : اقول وخر وصراخك ذا قصره
صالح: بتطلع الترف والا دخلت انا اخذها
ثنيان : وش جابك انتي وش جاي تدور عليه
صالح : اسمعني زين يا ذا لو يطلع في الترف خدش واحد بس ذبحتك
سلوى: صالح انا بروح اشوفها
دخلت سلوى وصالح دف ثنيان وهو يراقب الباب
كان ثنيان وده يتكلم وده يقول كل شي بس سكت لما حس بدوخه فاجئته وجلس بألم وهو يحس انه بدا يبرد ويحس الدنيا ظلام .................••............
في غرفة الترف
عند سلوى اللي كانت تركض وتدور غرفة الترف وشافت الترف اللي جاالسه جنب السرير بصدمه وركضت لها : الترررررف علامتس الترف
الترف اللي ناظرتهها بصدمه : طقتس طقتس الكلب والله لقول لصالح
مسكتها الترف : لا يا سلوى تكفين لا تقولين شي قولي مدري قولي مدري تكفين
سلوى : والله ما اسكت له
الترف : عطيني عبايتي
اخذت سلوى العبايه والترف اللي للحين ما بكت لبست وهي تحلف سلوى ما تقول شي نزلت وهي تاركه كل اغراضها وراها
صالح اللي اسرع لها : الترف الترف فيتس شي الترف
الترف اللي ما تناظر احد : لا ياصالح
صالح: سوى لتس شي ذا
الترف :لا بس خلنا نطلع
اصرت الترف انهم يطلعون وثنيان اللي اصلا ماكان حاس فيهم كان ألم يهاجمه في كل مكان
طلعوا وركبت الترف وهي سااااااااكته ولا نطقت
صالح اللي كان يسألها وهي ماترد ويتكلم وهي ساكته
اشرت سلوى له انه يسكت وسكت صالح وكملوا طريقهم بعد مده طويله من الطريق والهدوء عام على كل السياره انفجرت الترف تبكي بدون سااابق انذاااار
وهذا اللي فجع صالح وخلاه يقطع الطريق ويوقف على جنب
صالح : الترف وش فيتس وش مسوي بتس هالغبر
سلوى: الترف قولي يالترف
الترف اللي كانت تبكي ولا ردت ومشى صالح لما شاف ان ما فيه فايده ابد
...............••............
في بيت ثنيان
ثنيان اللي للحين بمكانه وهو ماسك راسه
مشاعل اللي نزلت له وهي تبكي : ثنيان وش صاير ليه سويت كذا
ثنيان بعدها عنه وهو يرجع على ورا استند على الجدار وهو مايدري كيف وصل لذا المرحله كانت النيه انه بيصارخ عليها شوي عشان منيره وبيفهمها ان منيره غير لكن صدمته الترف صدمة عمره ابد ما توقعها من الترف ابد للحظه حس بفراغ اجتاح قلبه كله
مشاعل: ثنيان تكفى قوم فيك شي رد علي
ثنيان : دقي لي على عجاج
مشاعل ركضت تدور الجوال وهي تبكي دقت ورد عجاج : هلا بأبو الاربعه
مشاعل: ثنيان يبيك تعال بسرعه
سكرت مشاعل من دون اي حرف زياده
وعجاج اللي تجمد على السماعه وهو مايدري وش صاير بالضبط ركض لسيارته وتحرك بسرعه لبيت ثنيان
................••............
في غرف منيره
منيره اللي كانت تبكي بكل قلبها وهي كلها ندم كيف انها طاوعت ثريا وخلتها توصلها لذا الحاله كيف انها رضت ان ثنيان يظلم وحده ماشافت منها الا كل خير
رفعت راسها على محمد اللي جاء يركض وهو يبكي : يمه ابوي تعبان تحت وعمتي مشاعل تبكي والترف راحت مع اخوها يمه انتي ليش تبكين يمه شوفي ابوي تعبان تحت
منيره حتى بعد ما سمعت ان ثنيان تعبان ما تحركت كيف بتروح له بأي وجهه بتقابله ! ولو درا انها تكذب وش بيسوي فيها
ومحمد يراقبها بحزن وبكى
................••...........
في ديرة الترف
الترف اللي دخلت غرفتها وسكرت الباب عليها وهي للان في بكيه وحده
كيف اصلا بتقنع ثنيان انها مابينها وبين عايض شي وكيف تبي تقول لابوها وصالح ولو ثنيان قالهم اللي فهمهه !
بكت وهي تدري لو قال ثنيان بتدمر وتنتهي حياتها وبتخسر ابوها وصالح وثنيان هذا اذا ما خسرت حياتها
................••............
في طرف ثاني من بيت ابو الترف
عند سلوى اللي كانت خايفه ماتدري كيف تساعد الترف
صالح : اموت اعرف وش مسوي ذا الحيوان
سلوى: صالح اسمعني بشرح لك انا
صالح : وشو وش تعرفين انتي
سلوى : تعوذ من ابليس واجلس واسمعني
جلس صالح وهو خايف من اللي بيسمعه
سلوى : الموضوع انه كنا نكلم الترف ونطقطق عليها يعني تعرف دايم ام عايض ترسل لكم اكل وكذا واحنا قبل تتزوج الترف كنا نقولها ان عايض اكيد بيتزوجك
وقبل امس رحنا البقاله وكنا نطقطق على الترف بينا ونقول انه عايض يعني مجروح وكذا من باب الطقطقه يا صالح مافيه اي شي بس نطقطق ولما كلمنا الترف ......... وكملت اللي صار وصالح عيونه شرار
صالح : انهبلتي انتي وياها انهبلتي وبعد ماتبينه يعصب ويصارخ
سلوى: قلت لك مزح يا صالح
صالح : يلعن ابو المزح الماصخ اللي تعرفينه انتي وهي
صرخ وهو يرمي التكايه : سلووووى لا يكون رايحات لعايض بعد تطقطقون عليييه
سلوى: لا والله بس اخذت نوره لامها رز وطلعنا حتى الترف ما كانت راضيه وكانت برا الدكان انا اللي كنت اطقطق
صالح : لعنت الله عليتس انتي والترف ونوره وعايض معكم الحين لو بوقف بوجهه اوقف بوش لو يجي لابوي ويقوله وش اقول انا
سلوى: صالح انت تفهم يا صالح ولازم تفهم ثنيان هذا الشي
صالح : لا والله وش رايتس اروح اقول ماعليه يا الشايب كانوا يتونسون على عايض
سلوى سكتت وهي تسمعه يصارخ ويهاوش وهي خايفه ان صدق ثنيان يقول لابو الترف ويدفنها حيه
................••............
في بيت ثنيان
عجاج اللي وصل وهو يدق الباب قامت مشاعل ودخلت وثنيان للحين بمكانه فتح محمد الباب وهو يبكي وركض عجاج : ثنييييان ثنيان وش فيك
ثنيان اللي كان معععرق وبااارد زي الثلجه وجهه احمر وعيونه حمرا وشفايفه بيضاء
ثنيان اللي من عصبيته ما كان حاس انه يضغط على جروحه وناسي ألمها ولكن في نهايه الامر نزفت جروحه ولا تحمل
سنده عجاج وهو يرفعه لسياره وكان ثنيان ثقيل على عجاج مره بالقوه ركبه وطار فيه للمستشفى وبعد ما استملوه وعالجوا جروحه صحى ثنيان وهو يحس بألم
الدكتور : ثنيان معي تسمعني
هز راسه ثنيان بإجابيه
الدكتور: قلت لك يا ثنيان الله يهديك ما تتحرك كثير ما تضغط على جروحك باقي جديده ولا تسمع
صد ثنيان وهو يتحرك الدكتور: وين رايح
ثنيان: فك هذا من يدي بخرج
عجاج: خير ان شاء الله وين بتروح يقولك جروحك ألتهبت تخرج وين
ثنيان بغضب : يا تشيلونه بطيب والا رميته انا بنفسي
الدكتور : طيب طيب اجلس لين ينتهي السيروم وبعدها نخرجك
عجاج : ثنيان لا تنهبل واجلس اصلا وش فيك وش خلاك تحرك كذا
رجع ثنيان وهو مغمض بقوه وألم وطلع الدكتور
عجاج جلس : ثنيان وش فيك وش حصل مع مين متهاوش
ثنيان اللي كان مايدري وش يقول بالضبط ( يقول ان الترف تخونه !؟ ولا انها من البدايه ما تبيه !؟ ولا عن عايض اللي كان معها حتى بالمستشفى وهو اللي قدم بلاغ عن منير ولا عن وشو بيقول )
عجاج : بما ان هالحاله جديده معناته الترف فيها
ثنيان اللي ماقاله عن موضوع عايض قاله عن موضوع منيره بس
عجاج : خييييير ان شاء الله انت انعميت خلاص حبيبي محد قالك لا تحب منيره حبها وعزها ولا تسمح لاحد يغلط عليها لكن تروح تطق الترف عشان منيره ضاقت من مشاعل اللي حامل بتوأم والترف قالت لها !! نعم وين عايشين ؟! وبعدين اذا ناسسي بذكرك ان منيره كذا مره تقلب عليك ! من تحت راس اختها وعذرها اللي قالته مب مقنع وانت بنفسك تقول ان منيره والترف متفاهمين
ثنيان اللي ماقدر يسكت : بس الوضع ثاني
عجاج: فيه شي اجل ما قلته !
ثنيان كان صعب انه يقول بس قال : راعي البقاله اللي في قرية الترف
عجاج : وش دخله ذا في سالفتك
ثنيان: اصبر بحكي الحين ، يحب الترف وامس كانت عنده تبي تشوف وش ردة فعله في زواجها
عجاج : هااااه وش تخربط انت تكلم زين
ثنيان : عجاج وش اقولك اكثر من كذا
وقف عجاج وهو يحط يده على راسه : لا تقول انها تخون
ثنيان سحب المغذي بغضب : مدري ياعجاج
عجاج مسك يده بسرعه وهو يحط المناديل عليها لا تسحبه انهبلت انت
نادى الممرضه تركبها من جديد وهو مصدوم حرفياً
عجاج: يمكن انت فهمت غلط
ثنيان: وشلون تنفهم يا عجاج وشلون
عجاج: ماعليه بس انت شرح لي بالحرف وش صار
ثنيان: رحت لها وانا مابي حتى ازعلها بس كنت بهاوشها شوي وبشوف اذا هي مأذيه منيره ولا منيره تتحسس لكن سمعت ... وكمل كل اللي سمعه
عجاج : ثنيان يمكن فيه شي غلط
ثنيان : عجاج لا تجنني وش اللي غلط في ذا
عجاج : انت تقول انها ما قالت شي في الموضوع
ثنيان: يا ليته يا عجاج يطلع غلط ياليته
عجاج : وش بتسويً
ثنيان : مدري يا عجاج احسني احترق احترق والله احترق
عجاج: اصبر اصبر وصالح اكيد بيتصل ويفهم انت ليه سويت كذا
ثنيان : واذا كان صدق يا عجاج
عجاج : لا لاااا لا يدخل الشك براسك انت تدري بها خبله وصاحباتها مخبل وبعدين تذكر ان بيئتهم غير يمكن شي قديم او مافيه شي اصلا
عجاج اللي كان يحاول يهدي ثنيان وهو اصلا مفجوع لكن ما حب انه يظلم او انه يزيد ثنيان قهر
................••............
في بيت ثنيان
وعند مشاعل اللي طلعت وهي متجهه لمنيره كان مشاعل مصدومه ان منيره ما تدخلت
مشاعل دقت الباب : منيره منيييره وينك
منيره فتحت : نعم
مشاعل: منيره شفيك ليه ماجيتي ثنيان تعب وطاح والترف راحت عند اهلها وحوسه وانتي هنا
منيره: وش اسوي يا مشاعل اذا هي غلطت بكيفه هو وياها
مشاعل: ليه وش صار
منيره : انا تعبانه بنام
مشاعل طلعت وهي مو قادره تستوعبها ابد
اما مي ماكان احد بفرحتها وهي تدق وتبشر خواتها على اللي صار
................••............
في ديرة الترف
اما عند صالح اللي ما قدر يصبر ودخل لترف : ارفعي راستس وكلميني
الترف من نبرته عرفت انه عرف لكن وش عرف ومن قاله ناظرته وهي دموعها مغرقه وجهها
صالح : المفروض اني افهم من سكوتس انتس غلطانه وش ذا اللي سويتيه الترف
الترف : مب زي ما فهمت يا صالح والله انه ظظلم وكله مزح وهباله
صالح بغضب: اذا انا فهمت انه هباله وش يفهم ثنيان
الترف غمضت وهي تبكي
صالح : تبكين الحين يالترف تبكين , كان المفروض تنتبهين الحين وش اقوله بأي وجهه بحاكيه واذا قال لابوي حزتها وش يفيد البكي
الترف : تكفى يا صالح ابوي لايدري تكفى
صالح : قومي قومي اغلسي وجهك واللبسي بنطلع قبل ابوي يجي
الترف : وين بنروح
صالح: بنروح ننظف اللي انتم سويتوه ولا تبين نسكت لين يجي ويجيب المشاكل معاه
الترف : واذا ما فهم
صالح بغضب : يبي يفهم يفهم ما يبي يطلق محد ميت عليه
الترف : يعني انت ماصدقت اللي صار
صالح شدها بغضب : انا ربيتتس بيديني يالترف وانا ادري انتس لو تموتين ما تسوين شي يحط راس صالح بالارض قووومي مب انتي اللي تقبلين المذله وتجلسين
وقفت الترف وهي تمسح دموعها لبست وطلعت مع صالح
................••............
فالمستشفى
عند ثنيان اللي كان ساكت وعجاج ساكت انتهى السيروم وقام عجاج وهو يساعده وطلعوا وقفو ا قدام البيت وكان نواف واقف مع محمد وعمر ووجهه واضح انه خايف جاء يمشي بعجله: ثنيان وش فيك يقوولون تعبت
ثنيان : محمد عمر جوا يلا ، مافيني شي تعب بسيط
نواف: وش صار
عجاج : ابد اللتهب جرحه لكنه بسسيط
نواف : تعال ادخل
ثنيان: مابي ادخل بجلس هنا
عجاج اشر لنواف يخليه وجلس ثنيان على الباب بضيق
نواف : اجل انا بروح
راح نواف وجلس عجاج جنب ثنيان بهدوء وهو لاول مره مايعرف يواسي ثنيان بشي
................••............
في بيت ابو محمد
عند محمد اللي كان جالس وابوه نايم على رجله رفع جواله وهو يتصل بواحد من اصحابه واعطاه الرقم بحيث انه يطلع موقع الرقم
رفع راسه وهو يفتح رساله رهام اللي ارسلتها شوق ( ياربي وش عندها رهام تبي تقابلني الله يستر بس )
................••............
عند بيت ثنيان
صالح اللي وقف وهو يدعي ان الله يعديها على خير لانه مايدري كيف بيقول الموضوع
اما الترف تجمدت دموعها اول ماشافتهم جالسين على الباب
وثنيان اللي وقف وهو يناظر بجمود وعجاج كان يناظره ويناظر صالح
عجاج : انا بروح ،انتبه لجروحك
راح عجاج وتركهم
صالح تقدم : ثنيان فيه موضوع لازم تفهمه
ثنيان اللي تحرك بداخله شي غريب ابتعد عن الباب : تفضل ياصالح
صالح اللي انحرج متهاوش معه واخته محوسه الشغله ومع ذلك محترمه
مسك صالح يد الترف ودخلوا للمجلس الخارجي
ودخل ثنيان بعدهم وهو يمشي بهدوء
صالح : اجلس لا تتعب نفسك
ثنيان : مرتاح ادخل بموضوعك
صالح اللي ماكان يدري ان ثنيان طق الترف: انا يا ثنيان قالت لي الترف السالفه كلها وانا اعطيك حق عصبيتك وغضبك لو انا مكانك بسوي مثلك لكن انت فاهم كل الموضوع غلط
ثنيان : تقدر تفهمني وشلون غلط !؟
مسح صالح على شنبه وهو مايدري كيف يصيغ الموضوع لكن ابتداء يشرحه بطريقه تهونه وكل السالفه شرحها
صالح : في نهاية الموضوع انت تعرف كلام الحريم الفاضي ومزحهم التافهه انا جيتك وانا واثق في اختي ما تسوي شي يمس شرفها بغلط يمكن انت ما تستوعب لكن يا ثنيان احنا عيشتنا تختلف عن عيشتكم احنا نروح ونجي ونعرف الصغير والكبير فالقريه وعايض يعرف الترف والترف تعرفه وكلنا اخوان لكن المسألة طقطقة بنات
هذا هو الموضوع ان بغيت افهمه واعرف ان لو يرادوني شك ان هالموضوع فيه شي حقيقي ماسكت وتصرفت قبلك لكن احنا ما نقبل الظلم ولا نقبل العار
ثنيان اللي كان جانب كبيير منه مرتاح ومقتنع وجانب ضايق على الترف وزعلان منها حتى لو هو مزح على شي يمس غيرته كرجل
ثنيان ضغط على عيونه بيده : لا حول ولا وقوة الا بالله ، معليش يا صالح بس ابي احكي مع الترف على انفراد شوي
صالح وقف : انتبه تعيد غلطتك
الترف : صالح لا تروح بجيك
طلع صالح ينتظر وثنيان اللي لف بغضب : ليه ما قلتي السالفه لي امس دامه مزح
الترف بغضب وقوه : لاني ادري كيف بتفكر و وش بتسوي
ثنيان : قصري صوتك !
الترف : ماعندي شي احكي معك فيه وصوتي قصير الموضوع وشرح لك اياه صالح وهذا هو من البدايه لنهايه وحط في عقلك ان مستحيل اسوي هالشي عشان اهلي قبلك ومب انا اللي اتهم بهالاتهامات ولا ادري من حشى عقلك وجيت حتى ما تبي تسمع شي لكن اعرف زين اني ما قلت لصالح انك مديت يدك عشان العشره بينا ولاني فكرت للحظه انك فاهم غلط لكن من الحين اقولك بيني وبينك يفتح الله طلقني يا ثنيان
طلعت وتركته وثنيان اللي ما مداه يفرح انه فاهم غلط الا انه
انصدم من انها تطلب الطلاق وتاكد هنا ان الترف فعلا مظلومه لو وحده غيرها وعندها مثل ابوها مستحيل تطلب الطلاق بالعكس بتطلبه يستر عليها
الترف اللي ضاقت من ثنيان للدرجة انها خلاص معاد همها ابد وش يصير بعد الحين ركبت وهي تحس ان دموعها انتهت
رجعوا للبيت ومن حسن الحظ ان ابو الترف كان مسافر مع شيخ قبيلتهم لمنطقه ثانيه
سلوى اللي كانت تنتظرهم : وش صار
الترف : صار اللي لازم يصير صالح انا معاد ابيه خله يطلقني
صالح طارت عيونه : وشوو ليه وش قالتس وش قلتي
سلوى: ليييش
الترف : معاد ابيه وبس
دخلت وتركتهم صالح لف :روحي وشوفي ليه بتطلق واذا كان قايل لها شي خليني ادفنه حي
نوره اللي دخلت :وش صار معكم
صالح طلع وقالت سلوى: تعالي بنشوف وش فيها
سلوى : الترف وش صار معتس
الترف : بتطلق
نوره شهقت : وش لييه
الترف بصراخ؛ هو بقى لييه بقى ليييه
نوره: هو طقتس !؟
الترف لفت وهي تناظر خدها للي للحين احمر
سلوى: الترف الطلاق مب حل
الترف : اطلعوا بس وخلوني
طلعت سلوى ونوره بعد اصرار الترف اللي انسدحت وهي تحاول انها تنسى وتتجاهل اصلا وتشيل ثنيان من مخها مره .................••............
في بيت ثنيان
ثنيان اللي كان جالس بالمجلس الخارجي وهو يقلب الموضوع براسه وكلام صالح الواثق والترف اللي طلبت الطلاق كان بالنسبه له شي يفجر الراس
مشاعل جات : ثنيان تبي شي اسوي لك
ثنيان: وين منيره
مشاعل: مدري من اليوم بغرفتها وتبكي
ثنيان اللي توقع انها ضايقه على اللي صار بالترف : مابي شي روحي انتي ارتاحي وسكري الباب علي
مشاعل : طيب والترف
ثنيان : مشااااعل
طلعت مشاعل وهي تسكر الباب وانسدح ثنيان وهو يدق على عجاج
عجاج رد بسرعه: هاااه وش صار
ثنيان: طلع كلامك صح
عجاج: وش صار بسرعه
ثنيان حكى وختمها : تبي الطلاق يا عجاج
عجاج : قايلك وانا اخوك لا تسعجل فكر فكر بس هاه وش بتستفيد الحين
ثنيان : وش اسوي الحين
عجاج: الله لا يهينك دور لك حل بسرعه
ثنيان : ياخي وش اسوي انا ابي شورك
عجاج :شوري طال عمرك تقش نفسك وتروح تعتذر منها لا تنسى انك مكفخها
ثنيان : وين كفختها كفين والله ومن ورا قلبي بعد اجل لو مسوي بها مثل مي وش بتسوي
عجاج :المهم انك طقيت
ثنيان : الحين وش اسوي بسالفتها مع منيره
عجاج : تدري انتظر ايام خل القلوب تهداء
ثنيان: شكله والله
عجاج : خلاص انت ارتاح وانتبه على نفسك ويحلها ربك
ثنيان : يلا يلا
................••............
مر اليوم
وثنيان بالمجلس والترف بغرفتها ومنيره بغرفتها والكل ساكن
ومن بكره كان ثنيان جالس على الطاوله والكل يفطر وهو يلف الكوب بضيق
والكل حاس به متضايق عشان الترف
منيره: ثنيان افطر
رفع راسه ثنيان بهدوء وهو يشوف ان منيره اللي تقول مشاعل انها تبكي اليوم جدا قويه وعاديه وحاده اطباع
مشاعل: على الاقل اشرب لك شي دافي وانت جالس كذا
منيره بحده : انتبه لجروحك محد بيفكر اذا اكلت ولا لا ( وكانت تقصد ان الترف ما اهتمت )
رفع راسه ثنيان وهو يناظره بحده: منييييره
منيره : وانا قلت شي غلط !
مشاعل: عمر محمد تعالوا ساعدوني بطلع
قاموا معها ومي اللي تناظر بتخوف : ثنيان اذا ما عندك مانع بروح لاهلي
ثنيان : روووحي يا مي رووووحي
منيره: انا بعد بروح لابوي
ثنيان ناظرها بهدوء وهو يدري ان ثريا عند ابوها : روحي انتي بعد
قام وطلع بضيق ومنيره اللي سحبت جوالها تتصل بمحمد يجي ياخذها
................••............
في بيت ابو محمد
محمد اللي طلع وهو مستغرب ان منيره بتروح وتطلع وثنيان مريض بس ما اهتم لانه وصله رساله بموقع الرقم وفتحه ولكن المصيبه انه كل ما قرب من بيت ثنيان يقرب الموقع
وقف وهو يتصل لمنيره تطلع ونزل يتبع الموقع وووقف فيه عند بيت عمه ورفع راسه محمد بدهشه
ولف على صوت منيره : محمد محمد
محمد لف وهو منصدم ورجع لها : هلا
منيره: يلا وش فيك
محمد : لا لا مافيني شي
ركب وهو عيونه على البيت بصدمه ومر وهو يفكر ولا يسمع من كلام منيره شي
.................••............
في بيت ابو الترف
الترف اللي كانت تصلح لصالح الفطور وهي تعصف بها لحظات غضب وحنين وكرهه مره تحط الحق على ثنيان اللي ماسمعها ومره تحط الحق عليها ومره تقول انها خيره هي اصلا تبي تتطلق
لفت على صوت صالح : الترف اتركي اللي في يدتس وتعالي
تركت الترف وهي تجلس : وش فيك
صالح : للحين تبين الطلاق
الترف : ايه
صالح : الترف اذا ثنيان مسوي لتس شي انا مدري به علميني ولا طلبتس الطلاق عشان هالموضوع مب في صالحتس وابوي بكره بيسأل
الترف : ماهمني خل ابوي يسأل وخله بعد يعصب ويطق وخل الناس تتتكلم اانا مابي ارجع لثنيان عشان كذا فكني منه بسرعه
وقف وهي تكمل شغلها وصالح اللي يشوف الضيق عليها وهو يدري ان فيه شي بس مايدري وشو
................••............
في الديره
عند سلوى ونوره اللي كانو يمشون جايين لترف
سلوى: نوره وش نسوي بذا البنت تبي تتطلق والله ليذذبحها ابوها
نوره: المشكله مب الطلاق االمشكله سبب الطلاق
سلوى : والله لو يدري ليذبحنا جملة كلنا
نوره: كيف تفهم الترف الحين
سلوى: وهي راسها يابس ما تسمع
نوره: وش رايتس نكلم ثنيان
سلوى: يعقب وش نبي فيه ذا الخايس وش نقوله نقول تكفى لا تطلق الترف
نوره: لا يعني بس نقول حتى لو طلق ما يقول السبب لابوها
سلوى: تبيني اهفتس كوع يسبب لتس ارتجاج خبله انتي عشان يقول ايييه اكيد ان فيه شي صدق ويسوي مشكله وانا بالقوه اقنعت صالح انه مزح
شهقت نوره: تهقين انه ياخذ عايض ويحقق معه
سلوى: نوره وش بلاتس صايره فدغى وش يحقق معه الدنيا سايبه
نوره : ادخلي بنحاول نقنعها
دخلوا وهم يحاولون يقنعون الترف اللي كانت رافضه وهي الي انفجرت عند صالح تطلبه انه يطلقها من ثنيان قبل يرجع ابوها
صالح انصدم وهو مو مستوعب طلبها بس دموع الترف عليه غاليه ومستحيل يجبرها على شي
طلع وهو يدور رقم ثنيان وناوي يتصل به
...............••............
في بيت ثنيان
وثنيان اللي كان مافي البيت الا هو ومشاعل
لف لها : مشاعل
مشاعل : سم
ثنيان : بسألك وانتي جاوبي من غير كذب ولف ودوران
مشاعل: ابشر
ثنيان : كيف علاقة منيره مع الترف
مشاعل: حلوه مافيه شي بالعكس متفاهمين
ثنيان: اخر هالايام تحسين بينهم شي
مشاعل : من فتره منيره متغيره صايره عصبيه وبالاخص على الترف بس مدري وش السبب
ثنيان: الترف عمرها غلطت على منيره
مشاعل: قدامي نهائيا بالعكس تحب منيره مره
مسك ثنيان راسه ( يا ربي من اصدق انا )
مشاعل: ليه صاير شي
ثنيان اللي وقف : لا
طلع وهو ينتظر منيره بيشوف وضعها كيف اذا رجعت من بيت اهلها
................••............
في بيت ابو محمد
عند منيره اللي دخلت وهي تشوف بندر اللي مر وهو حتى السلام مارده
ثريا : هلا
منيره: هلافيك
منيره جلست بضيق وقربت ثريا : وش فيك لايكون ذا الزفت ثنيان بعد
منيره: لا هالمره انا
ثريا : وش صاير
منيره قالت لها وضحكت ثريا بفرح : ايه برافو عليك هاذي اختي شفتي كيف انه يعزك مره بغى يذبحها عشان كلمتين بس شفتي
منيره: بس انا خايفه لو كشفني بيذبحني
ثريا : لا تصيرين خبله وش يدريه هو انتي الحين خليك فطينه وقربي منه و غرقيه بالدلع وصدقيني بيطلقها والباقيات بعدها بفتره
منيره اللي كانت غيرتها تحرقها لكن قلبها مو متحمل الظلم لكن وسواس ثريا اقوى من قلبها
................••............
وعند محمد
لللي كان للحين بسيارته وهو يكبر بالموقع ويرجع انصدم وهو يناظر ( معقوله رهااام ، لا لا مستحيل مستحيل )
رفع راسه وكأنه مضروب على وجهه لما تذكر شوق اللي في كل مره تحرقه بنظراتها : لاااا وين يا محمد لا تنهبل وتظلم لا لا مستحيل بس ليش لا شوق هاذي ما تطمن ياربي تكفى لا تمتحني ذا الامتحان تكفى يارب
بس كيف اتأكد كييييف
................••............
في بيت ثنيان
ثنيان اللي كان جالس ينتظر منيره لكن قطع عليه اتصال صالح تردد يرد وهو خايف ان صالح يفتح موضوع الطلاق صمت الجوال وهو يهز رجله يبي بس يتأكد اذا منيره مكذبه على الترف بيصير شي ماصار
منيره اللي بعد امتلى راسها من كلام ثريا رجعت وهي صامله تطلق الترف دخلت هي ومحمد ووقف ثنيان وهو متكتف
منيره: ثنيان ليش جالس بالبرد
ثنيان :ابد انتظرك
منيره ابتسمت وقربت وهي تدخل ذراعها بذراعه : هذاني جيت
طلعت معاه للغرفه وهي ناويه ترتب خطط ثريا لكن سحب ثنيان ذراعه وقفل الباب
ثنيان : بسألك الترف وش تقولك بالضبط وش اللي بقى ما سوته فيك
اختفت إبتسامة منيره : وش جاب طاريها
ثنيان : ابي اشوف وش سوت في ام محمد عشان احاسبها زين
منيره: ما عليك منها عطيتها حقها
.
.
انتهى البارت✨