✨الاسطورة ✨

✨ خرج من الشركة نيشان لسيارتو مسافة طريق كان خارج من سيارتو متاجه للفيلا ... دخل للجناح ديالو خدا دوش خفيف ... خرج من الدوش بفوطة مغطية الجزء السفلي من جسمو الرياضي .... دقائق كان لابس سروال توب فالاسود و قميجة فنفس اللون ... لبس ساعتو الرياضية... و رجع لبس خاتم لي مكيفارقوش على شكل رأس اسد فالابهام ديالو ... رش زوج رشات من العطر الرجولي الخاص بيه ... هز الكونطاك و الفون و تم خارج مغوبش كي العادة..... ركب فسيارة لامبورجيني حمراء ... كسيرا طاير و صوت محركات السيارة كيتسمع صداها فالارجاء... و طبعا زوج سيارات ديال ليكارد تابعينو من اللور ... مسافة طريق كان واصل للمطعم حط السيارة فالباركينغ ... فتح واحد من ليكارد ديالو الباب باش يخرج و حشد من الصحافة خرجو مجمعين عليه و ليكارد بسرعة حاوطوه من كل جيهة ... تا حد متجرئ يقرب منو كولشي كيصور بعاد عليه بعدة امتار .... فنفس الوقت خرجات شمس من السيارة حالة فمها من فخامة المطعم من برا .... معمرها كانت كتحلم دخل فبحال هاد المطاعم لولا ان غيثة و حبيبها من الطبقة المخملية .... رجعات خصلات من شعرها اللور بحكم الرياح لي متحركة تما ... خدات نفس و تمات داخلة ... حتى اثار انتباهها حشد من الصحافة مجمعين على شي واحد..... وقفات كتبركك مصغرة عينيها ... معلية راسها جاها الفضول تعرف شكون هاد الشخص لي هاد الكم الهائل من الصحافة مجمعين عليه و ليكارد كيبعدوهوم ... قفزت على صوت غيتة لي كيناديها دارت لعندها مبتاسمة و بخطوات سريعة وصلات لعندها سلمات عليها ... دارت تاخد نضرة فضولية اخيرة تشوف الشخص لي مكيبانش بحكم الكم الهائل ديال الصحافة حتا جراتها غيثة لي كانت حتا هي فابها حلة ليها مدخلاها للمطعم ... فور ما دخلت حلت فمها من كم هاد الفخامة لي فالمطعم ... كان اللون البني طاغي عليه ... و الطاولات لي عامرين بالاطباق و الكيسان مستفين بطريقة مثالية زائد الشموع و مزهرية ديال الورد كتوسطها الطاولات مستفين فكل مكان و فوتاي بيج محاوطهوم على شكل دائرة و ومخدات سوداء و فيها خطوط بنية مستفين بشكل عشوائي ... جراتها غيثة لطابلة كانت جايا برا على الهواء كان كالس فيها ايوب مع عدة اصدقاء مشتركين بيناتهوم .. كاين لي كتعرفو شمس و كاين لي ماعمرها شافتو ... عقدات حواجبها فاش لمحات سعد حتا هو معاهوم ...