تتمة للأحداث السابقة
في تلك الاثناء تلاقات العيون .. والقلوب خفقت بعنف .. والصمت صار سيد الموقف .. كل واحد منهم كان مصدوم .. واش من صدفة هاذي .. يعني هوما ماتلاقوش قاع وضرك يتقلاو في موقف هكا .. هو خطيبته وهي لوحدها ومريضة وقلبها معمر بالكيات والهموم
ايمان (كسرت الصمت هذاك ) سفيان خلينا نروحوا
سفيان ( رجع من سرحته .. وخلى ايمان وتمشى من اتجاه مسيكة وطبع بوسة على جبهتها ) عمتي واش راكي
مسيكة ( حطت يدها على شعره ) لباس يا ولدي .. وانت واش راك
سفيان ( شاف في مروة ورجع تجاهلها .. وكمل يحكي مع مسيكة ) بخير عمتي رانا عايشين
مسيكة ( صارت تربتله على كتفه ) الحمدلله ولدي
ايمان ( تقدمت ونقزت سفيان ) شكون هاذي
سفيان ( حط يده على ظهر ايمان وتبسم ) خالتي مسيكة نقدملك مرتي .. ايمان وهاذي ام صاحبي شوقي راني حكيلتك عليه
مروة ( حست كي شغل سكين تضرب في قلبها .. وصارت ترجف بالاخص وقت سمعت كيفاه يعرف عليها وكيفاه فرحان بيها ) مرتك
ايمان ( قربت وسلمت على مسيكة ) واش راكي خالتي
مسيكة ( هزت راسها ) بخير بنتي بخير .. اه هاذي مروة بنتي نسيت نعرفك عليها
ايمان ( تقدمت من مروة وسلمت عليها هي الاخرى ) متشرفين
مروة ( سرطت ريقها ) الله يسلمك ختي
مسيكة ( رجعت تشوف مع سفيان وحطت يدها على كتفه ) ليام بلخف تفوت .. غير البارح كنت تلعب مع شوقي قدام الباب وضرك راك راجل الله يايبارك
سفيان ( ضحك بصوت عالي ) راكي تشوفي .. وضرك راني مع مرتي نشوفو فالخواتم ونوجدو لعرس ..دنيا
مسيكة ( ماحبتش تزيد معاهم كثر ) بالبركة عليكم وربي يسخرلكم
ايمان ( صارت تعدل في خيمارها الى كان يزلق ) امين عمتي ولعقوبة لشوقي ول مروة
مسيكة ( خذات نفس طويل ) ايا نخليكم .. تبقاو على خير
سفيان ( تفكر .. في تلك الاثناء تلفت ل ايمان ) مديلي كارت انفي
ايمان ( حلت البوشات نتعها وجبدت واحد ) تفضل
سفيان ( مد الكارت ل مسيكة في يدها .. كان يحب يوري لمروة انه نساها وانها ماتسوى والو وهاهو رايح يتزوج ) هاكي عمتي .. هذا الكارت انفيتاسيون تاع عرسي .. مع انك ماكيش محتاجة عرضة انت امي الثانية بصح معليش و بلاكي تنساي ماتجيش
مسيكة (حكماته عليه وصارت تحط فيه فالصاك) ان شاء الله نجي ومرة اخرى .. بالبركة عليكم وربي يسخرلكم .. تبقاو على خير
أنت تقرأ
راقصة في عهدة ظابط / الكاتبة منال منولة
Romanceعندما تلقيك الحياة بقوة .. فترتطم على الأرض وفي تلك اللحظة لن تجد الا الذئاب التى لن تقصر في نهش لحمك دون رحمة اما هي كانت صغيرة للغاية عندما حدث ما حدث كانت مراهقة حلمها قطرة حب كانت لا تعرف اي شء وعندما وقعت في الخطيئة خافت وركضت ولكنها أضاعت طري...
