#سوق_البالة
للكاتبة #صبا_يوسف
هلاوو يا متابعيني .. شلونكم شخباركم ؟! ..
اتمنى تعجبكم هذه القصة لانها تتحدث عن موضوع مهم جداً ..
سووا منشن لاصدقائكم حته يقرون الرواية ..
لا تنسون التصويت ⭐️ .. والتعليقات على كل فقرة 💬 ..
#قراءة_ممتعة
ألهذه الدرجة أصبحت الأرواح رخيصة ككل شيء فيه مستعمل وعتيق، في كل ركن هنا حكاية عصيبة هم أبطالها لو سُردت على مسامعكم لأنتهت حروف اللغة العربية وقواعدها وهي لا تنتهي. أرادوا العيش بكرامة وسلام فقد أحبوا الحياة ببساطتها، لكن للأسف هنالك من قصد أن يهدم هذا التفائل والحب من قلوبهم وإن يشتتوا ما كانوا يسعون إليه. انا واحد منهم ...
بغداد - 2021.01.21
كعدت من النوم على صوت المنبه، بملل لزمت التلفون ( صرصور ) وطفيته بعدين دزيت رسالة لحب حياتي وطفولتي وبنت خالتي حور
💬
- صباح الخير حبيبتي هستوني كعدت وراح أبدل وأطلع للشغل.
كمت من فراشي ( دوشك ) وتوجهت للحمام، باوعت على نفسي بالمراية، عمري خمسة وعشرين سنة بس ملامح شكلي توحي الى كأني بنهاية الثلاثين من وره التعب.
عفت المدرسة من جنت بالخامس إعدادي بسبب سوء وضعنا المالي حتى أساعد أبوية وأخوية بالشغل، بس بعد وفاتهم صرت أني المعيل الوحيد بالبيت أصرف على أمي وزوجة اخوية المتوفي ، ابوية توفى قبل اربع سنوات واخوية توفى قبل سنة بسبب مرض السرطان وعنده ثلاثة اطفال الي أعمارهم تتراوح من ست الى ثلاث سنوات.
شغلي هو بسطية مال ملابس الأطفال أطلع منها رزقي وأصرف على عائلتي وبنفس الوقت أجمع فلوس حتى ننجمع أني وحور تحت سقف واحد.
غسلت وجهي وتوضيت بعدين رحت لغرفتي فرشت سجادتي وصليت صلاة الصبح، من كملت توجهت للمطبخ لكيت أمي بلكوة تجر بروحها حتى تسوي ريوك، صبحت عليها بهدوء
- صباح الخير.
- صباح النور يمه.
كلتلها بعتب خوفاً على صحتها
- يا يوم كم مرة كتلج لا تتعبين نفسج، هو أنتِ مريضة وعظامج كلها تون عليج.
