#مدحت_وسمر الجزء الثاني
الواد مدحت ده انا مفتقداه اووي الصراحة مسلي ابن الايه عاوز ادخل اطمن عليه يارب يكون فاتح
سمر :واد يا مدحت يا مودي
مدحت :سمر عارفه كنت بفكر فيكي النهارده
سمر : وانت والله هفيت على دماغي قلت ادخل اطمن عليك انت فين كده ؟
مدحت: قاعد مع ماما
سمر: بس أوعى تكون بتتفرج على رعب تعملها ع نفسك خلى بالك
مدحت : لا توبه معدش هيحصل تاني انا اعصابي انهارت بتفرج على فيلم لاڤ استوري بس يجنن
سمر: اها كده ممكن انت عيل طري
مدحت : بس دموعي مش بتوقف
سمر :ليه يا حيلتها مالك
مدحت : البطله بتموت يا سمر وانا قلبي بيتقطع علشانها ومخبيه عن البطل
سمر : يا محنو وماما بتعمل ايه وانت بتعيط كده
مدحت : بطبطب عليا
سمر : ولاااااا انا بكلمك علشان اضحك مش علشان تفرسني انا عندي فرح النهارده دخلت اطمن عليك
مدحت : فرح بجد ومين المطربين اوعي تقولي تامر حسني او عمرو دياب بموت فيهم
سمر : مين يا اختي ده. فرح في الشارع عندنا وجايبين السيد كباكا وفرقه المساطيل فرح شعبي يعني
مدحت : الله نفسي احضر فرح كده بجد ممكن اجي اتفرج
سمر : تتفرج ايه انت اللي هتفرج الناس علينا شيل الفكره دي من دماغك
مدحت : بليز يا سمر مش هعمل شقاوه والله علشان خاطري
سمر : انت عبيط ياض ده انت عاوز تيجي وسط اشقيه البلد كلها ولو حصل حاجه مش هقدر أحميك
مدحت: متخفيش عليا معايا مسدس
سمر : مسدس مايه طبعا ولا خرز
مدحت : يلا قولي العنوان بسرعه هلبس واجي
سمر: يا بن المجنونه تيجي فين هيتعلم عليك يخربيتك
مدحت : يوووه يا سمر متخفيش بقي
سمر: خلاص اكتب عندك شارع النسناس الشقي المتفرع من حاره برغوت وراه جبل المعتيه
مدحت : ده في مصر هنا ؟
سمر : ايوه يا خفيف في مصر صحيح اش عرفك بالمناطق الشعبيه بتاعتنا
مدحت : طب هلبس واجي وللامان ابعتي شير لوكيشن
سمر: حاضر بس ابعتلي صورتك علشان استناك ع اول الشارع
مدحت : حالا هبعتلك سيلفي
سمر : صورتك دي؟؟؟... يخربيتك ده انت احلى مني بكتير كنت خايفه عليك من الرجاله دلوقتي بقي البنات كمان استر يارب
