⛺غربة عشاق⛺

⛺الحلقة 8...⛺

...برغم الغصرات ما تمنيتهاش توفى فيسع رحلتي انا وياه...حبيتها تكون اطول من هكاكا...اما هذيكا الدنيا كل بداية ليها نهاية...بعد ما كنا واقفين اليد في اليد سيبني عبارة قلي كهو وصلنا للاخر...سرات في بدني رعشة برد نعرفها تزورني في المرض...زاد كمل علي كيف قلي:
-نظن كهو وصلنا لوين كل واحد بش يشد ثنيتو وحدو
ان شاء الله تلقى الخير ونشوفو بعضنا في ظروف خير من هكا....
وربت على كتفي كينو يسلم وقدم بخطوات ثابتة ما تزعزعش ولا غزرلي...ايا قلت نلم روحي ونقدم حتى انا....اول حاجة جات لبالي نمركي ستوب وانا حالتي حليلة...وانا غرامي ماكياج و الحمير ما يفارقنيش...
جبدت مرايتي الصغرونة حليت شعراتي فرفشتهم و حمرت...نطبع في شفايفي ونعاود عالمراية و نستوي في شعري...رميت البوند و استويت حوايجي دخلت سوريتي تحت الدجين ونفضت روحي بلقدا واخر لمسة قطرات من عطري اللي ما يفارقنيش...حسيت روحي تفرهدت سطوش الماكياج والبرفان متنفس لي في كل غصرة...حبيت نقول لروحي مانيش في حاجة ليه ولا لغيرو كيما تعودت من اول عمري واقفة لروحي وحدي كيما بش نواصل...وقفت نستنى ماشية جاية....واول كرهبة تجي متعدية كرهبة الحاكم😵😵😵....وووه على عمري اوه....توترت ولبني العرق...
ملا زهر احرف....تلفت لشيرة عبدو نشوف فيه بعد ولا نلقاه قدامي بالضبط....
هو:...كسحت قلبي وودعتها من غير لا نسلم ولا نحكي ياسر...يلزمني نخليها اذا حاب نكمل ونوصل للي في مخي....مشيت خطوتين وما هنانيش قلبي تلفت نطل.
وما راعني إلا المرا تحمر وتغبر والشعرات تسيبوا ثايرين كينها ما صدقت....تستوي في روحها وتنفض واك الشفايف يلمعوا بالروج....ما عجبنيش تصرفها وغزلت عليها ...عيني عدهم بش يخرجوا على هاك الفم واك الشعر...مهرة جامحة وحدها في بلاد الغربة...
بش نرجع نسخسخها كينها ما احترمتش حضوري وااستبهلتني...كبست بونيتي بش نفتقها من بعضها ونهدي في روحي ونعارك اش مدخلني فيها ياخي من عقاب اهلي وامالي؟؟؟...مازلت نحاول نسيطر على روحي وهي لا تلفتت ولا غزرتلي كينها ما صدقت اللي مشيت...عزمت بش نرجع نكبلها سعدها وكرهبة الحاكم جاية تزغرط وهي مش لاهية...جريت وقفت قدامها....
هي: نلقاه قدامي عينيه تقدح نار...ما فهمتش اش رجعو...كلمتين قالهم ما ركزتش اش يقصد بيهم أما من بعد فهمتهم:
-مثل مليح... الحاكم جاي...
وفي لحظات ايديه طوقتني...وحدة لفها على ظهري ولاخرى دخلها في شعري...كبس بيها على راسي بحيث ما نجمش نتملص ولا نبعد...عينيه مركزة على فمي...انفاسو خرجت لاهبة حارة تلفح في وجهي....
صوتو خرج مبحاح مغشش:
-تحمر وتدبغ لشكون؟؟؟...
ونزل بكل غل على شفايفي...في بوسة ملحمية...بدات بغش وبعد تطورت للهفة...لسانو مسح كل اثر للروج كينو مسح لاثار جريمة...كانت اكتساح لي لأول مرة تغزو شفاهي البكر شفايف راجل ...راجل ملي ريتو وانا لابستو ومعنقتو ووصلت لبوستو...ما نجمتش نرد الفعل ندزو ولا نضربو ولا نبعدو...عايشة الدور كيما يلزم مستحلية ومستعذبة اني بين ذراعاتو و يبوس في...نسيت انا وين واش جابني واش كنت ناوية نعمل...عايشة اللحظة بكل جوارحي....نكذب كان نقول ما عجبتنيش ولا ما استطعمتهاش برغم على غفلة...
كرهبة الحاكم تعدات ولا كينهم شافونا...يقلك زوز لاهيين يغرموا في زمانهم...بعد ما فاتت وقتها فقت على روحي من غفلتي وقت قلي:
-مشاوا...ممثلة بارعة أما انت طلعت...وعدى صبعو على شفايفي اللي تنفخت....هاني مسحتهولك...وجرب سعدك حط مرة أخرى لون كيف اكاكا...
مازلت مرهوجة اما استوعبت كلماتو وحشمت على روحي...راهو يقول طفلة مسلمة في روحها للي يجي ساهل تعنيقها وبوسانها...فديت على روحي فدة كلبة وتذكرت احسن طريقة للدفاع هي الهجوم...دزيتو على قوة جهدي :
-مش قتلي مثّل فهمتك واديت دوري كيما يلزم...والتمثيلية وفات توة اش يهمك في نحمر ولا نغبر؟؟؟طير بابا طير محلا فراقك...
وجبدت مرايتي وحميري بش نعاود اللي فسدو...المراية تنطرت جات طروف والحمير في خبر كان قعد كان قاعو والفوقاني بكلو غفصو في يدو...ويزيد يمسحو لكل في سوريتي...ايديه طالعة هابطة تمسح في الروج على صدري....توترت و اعصابي فلتت مني ندزو على أساس بش نطيحو ياخي جبدني من سوريتي جابني فوقو والقفالي تنطرت...جيت كف وغرزة انا وياه فوق بعضنا...سوريتي مهدودة جاب ربي لابسة تحتها محضرة روحي للسقنطري...لحظات تعدات فيسع...تفاصيل وجهو تمسح في قسمات وجهي...
نفخت مالغلب وقمت نلم رغي روحي و نتكلم:
-اسمع نقلك يا اش اسمك...راني مش مالنوع اللي تتصورو وما قمرتش بحياتي بش نجي نتمعشق ولا نبيع في روحي...الشي مكدس في تونس و العروض ياسر....جيت بش نلقف روحي وحياتي قبل لا تزيد تدمر وننقذ أمي...يعطيك الصحة عاونتني بما فيه الكفاية....حد هنا ويزي...مانيش رامية روحي عليك ولا نزيد من مشاكلك...برا ربي يوجهك خير ويسمعنا على بعضنا علم الخير....

✴✴✴✴