⛺غربة عشاق⛺

🔕الحلقة 11...🔕

...رفرفت انفاسو دافية على وجهي...ايديه مكبوسة شاد بيها اكتافي...لمعة خطر في عينيه تنذر في....
هو:...مجنونة ومراجة وجويدة اما عاجبتني...اللي تعمل ولا تقول على قلبي كالعسل...حتى كي تفددني فيسع نتراجع...مانيش فاهم روحي ولا ما نحبش نفهم
في يوم ما بديت هالاحساس اللي يدغدغ وانا مستحلي ومستعذب حتى فقت على رجة زلزال دمرت حياتي وخلاتني نسكر ابوابي و نرمي المفتاح في غرق البحر و نهرب بروحي لبلاد الروم...كيف تذكرت ونخزني قلبي بعدتها وراسي لوطة...
-عام تقول تنجر في روحك...ابعد من قدامي...
بعدت بخيبة امل ما انتظرتش رد فعلو هذا...مش في الكرونيكات اللي قريتهم الكل يدوخ من ريحة الجال دوش ويبوسها و الكاب يطيح...رجعلي شاهد العقل وضربت راسي بيدي نفيق في روحي...نوتوت:
...مجودر زايد...بعد ما فاتني داخل للدوش رجع وشوشلي في وذني:...مخيبك يا جويدة....وضحك وسكر الباب وراه وانا نلوج بش نضربو...
بدلت حوايجي ونستنى فيه يخرج بش نغسل الحوايج وننشرهم يشيحوا علقل نلقى بش نبدل...
انشف في شعري وهو خرج بالكاب لاخر...وووه علي ووه...ظاهرلي انا اللي بش نعمل كيفما في الكرونيكات ونطيحلو الكاب...مخي تبلنتى مالانحراف اللي انا فيه تي كنت عاقلة نشره ومحلاني كلبت....أما هو بيناتنا يهبل اللي ما يهبلش...الريحة سابقتو....سكرت عيني نشم ونستعذب...وهو يتبسم ببلادة ينشف وقلي:
-قوم ولا نهبط الكاب قدامك...
غصيت في ريقي وقمت بالخف داخلة للدوش...قلي:
-اغسلي حوايجي معاك يا مرتي لعزيزة...
سممني بكلماتو رجعتلو نعارك:
-نعم نعم...كذبت كذبة وصدقتها....ملا نغسلك هذي...
بدا يحل في حزام الكاب و يجبد بالمرتاح:
-تغسل ولا نوريك اللي عمرك ما ريتو....
انسحبت بسرعة...في المواقف هذي ما نقدش روحي..
نكذب على روحي ونتفافى...عندي انحراف فكري معاه هو أما تطبيقي يجيب ربي(والله ما فسدتني كان الكرونيكات اللي نقرا فيها...)
دخلت لميت الحوسة وغسلت وخرجت نشرتهم في البركون اللي تابع البيت...معمولة بطريقة كل واحد يستقل بذاتو وحياتو...واحنا تلقاهم عيلة كاملة في بيت منها نوم منها قراية وسهرية منها كوجينة....الله يلعن بو الفقر وسنينو...
رجعت لداخل نلقاه لابس وممدود على الفرش...عيني حوالت...انا ورجل على سرير واحد؟؟؟ويوا عالعربية الفصحى...بلعت ريقي وقتلو:
-عبدو...وانا وين بش نرقد؟؟...هاك تشوف لا كانابي لا والو كيما في الحكايات...
-والله انت الفرجة في المسلسلات لحستلك مخك...
ساعات نحسك ماشي في بالك في مسلسل...اهي راك في الواقع...واقع مر...
-اخطانا مالمرارة...نحب نتمد...
-اتمد على روحك شطر فرش ما يكفيكش جويدة؟؟
-اوو عاد يزينا من جويدة...ما استانستش نرقد بحذا غول...
-بالله بالله...انا غول؟؟؟...ياكل راسك يا رب...هاني بش نرقد وحسك ما نسمعوش...
-عبدوووو...
-مش موجود مش موجود...
داديت داديت قريب نخيط الشمبري ومنها جيت على حنب وتمديت وحريصة اشد الحرص اني نكون عالحرف...مازلت كي بديت نستحلى في طراوة الفرش بعد ما ظهري يبس من بيت الحرقة للشقف للبحر للغابة للمشي....تنهدت وانا نسترجع في ذكرياتي
و ما نفيق كان بحاجة رزينة هبطت علي....وهو يوشوش في وذني:
-هاو الغول بش ياكلك... وبرك علي بكلو حصرني بين ايديه وساقيه تحلحيزة لا...فرفطت ما نجمتش نتحرك ربع حركة...لقيت يلزمني السياسة:
-يزي عبدو والله ما نقصدش....
-عبدو....يقلد في صوتي....شدني الضحك....اش رايك ناكلك توة بالرسمي...الظروف لكلها مواتية...دوش ونظافة وفرش....وانا وياك يا حبي على الفرش ومعانا ربي...اش قلت؟؟؟
نرقل بكلي...يا شومي جاية من اخر الدنيا بش نفسد؟
-بالله ما تفجعنيش....ما تخونش ثيقتي فيك...بالله لا راني مشيت معاك بنيتي وبكل ثقة...ما تفسدهاش.... وزيد تو نعيط ويسمعوني وينقذوني منك...
-يا بهلولة...كي تعيط انت يضحكوا هوما يقولوا مرا عاملة جو هي وراجلها...اسكت اسكت...مش قتلك مخك تاعب...طلعت اعظم من حديدة البوهالية....
وسيبني وتمد ايدو تحت راسو يغزر للسقف ويغني بالشوية:..عالبوهالي يما عالبوهالي عالبوهالي طلق مرته وعطاهالي يما...
هو:...حبيت ندكك عليها والله مش قصدي اللي جا لبالها...سخفتني كي قالت اكاكا.. الثقة الزايدة والنية الطيبة مش باهيين ساعات...وهي بهلولة وحطها ربي في ثنيتي...عاهدت روحي نحميها حتى نوصلها سالمة وتقلي يزي حد هنا بش نمشي على روحي نطقت نطمن فيها خاطر نحس في الرجفة اللي شادتها عالفرش....-ما تخافش مني ...نوعدك نرد بالي عليك ونحميك حتى من روحي....ما تخافش....ايج عندي عربون هالوعد اللي قطعتهولك واثبت اللي انت ماكش خايفة مني....هي:...مترددة ونرعش...الخوف الهستيري اللي شدني مش عادي....كي قال كلامو طمني شوية...مد ايديه يستنى في نجيه...انا وثقت فيه مالبحرما يخوفني شي معاه تكعبرت جيت عندو ولف ايديه علي وباسني من جبيني:-وعد عالحلوة والمرة حتى نخرجوا من ازمتنا #منو

✴✴✴✴