⛺غربة عشاق⛺

🎒الحلقة 13...🎒

...خرجنا صباح بكري نسمة باردة علخر...دوب ما خرجت ضربني البرد تمنيت نزيد نقعد عندهم للدفا... دفا العايلة والمحبة واللمة اللي تحرمت منها...اما المواجهة محتومة والهروب لازم تجيه نهاية...لفيت كبوطي على روحي مليح بعد ما البرد سرى في عظامي و زار تراكن بدني لكل بفعل تذكر نقطة سودا ظلمة في حياتي...تعودت اني نلم روحي وحدي ونخرج ونواجه من صغري...لا بو لا خو في ظهري.... صاكي على ظهري وعبدو الراجل اللي لا يعرفني ولا نعرفو حاميني ويمشي قدامي..راجل بأتم معنى الكلمة خاطر الرجلة افعال مش اقوال...كينو فهم اللي نخمم فيه تلفتلي راجع وشدني من يدي:
-هيا ازرب روحك مريتي العزيزة...  ويتبسم تبسيمة الدك متاعو..ركبنا في التركتور ومشينا...الثنية طويلة وهو مقصرها بالحديث مع رفايلو وانا ساكتة مرة نفهم اش يحكيوا وعشرة لا... النهار قريب يتناصف واحنا مازلنا ما وصلناش...سكت سكت ومنها نطقت:
-عبدو ياخي مازلنا؟؟؟...فديت راني...وتخضخضت... وقتاش نوصلوا؟
-على كيفي انا...هانا نمشيوا احمد ربي لقيت فاش تركب ولا راك هذا الكل مشيتو كعابي نهار كامل...
قحرتلو اللطف...بعد مديدة التركتور وقف ونشوف في عبدو يسلم عليه ويهبط في...وانا نتبهلل ما فهمتش مازلنا في خلا وقفار....سلمت معاه ومشينا نسأل:
-ياخي ويني هالقرية اللي بش يوصلنا ليها؟؟؟
-قلك هي بعد الواد هذا والقنطرة ما تحملش رزن التركتور بالرمورك لازم وحدو بلا بيها بش يتعدى... لذا وفات فلوسنا...ايا للا ذراعك يا علاف ولا قول ساقك...
-مأمون ما اضمرك!!
خلطنا للواد...الما يهدر تحتو والقنطرة طويلة وعريضة وعبدو يكركر في...نمشي ونتمتم وما نحبش نغزر لوطة لندوخ...وصوت الما يصم الوذنين...عبدو يغني:
-الجو جميل وشاعري...
-سعدك أ لطرش...وينو هالجمال والشاعرية...كان من يطيح ترزى في عميرو....
-يعطك سخطة ريحة الأنوثة والرومنسية ما تكسب منها حتى غرام...تو في الطبيعة وعلى قنطرة والماء تحتنا وانت ما تحركلك شي؟
-علاه عبد الحليم وشادية وناقصنا بسكلات وتتم الرومنسية؟؟؟؟
-نسكت خير انا...امشي امشي...
ما قطعناها وعدينا كان ما انا اصفرت ولخلخت... نساني شوية تخرنين عبدو ورومنسيتو...اسمع اسيدك هو طلع يفهملها ههههه...فسدت عليه لحظات الرومنسية كي محرم فؤاد ههههههه...قعدنا نمشيو مشوار في الطبيعة وانا سايي بيلت...نكركر فبعد من ذراعو:
-عبدو والله ظل شجرة هيا نقعدوا تحتو وناكلو سندويتشات ماريا...ماني اخيتك تعبت راني...
نسخف فيه ونذبل في عويناتي ماكانش هو نورمال يقعد يمشي منا لغدوة...غزرلي وسلم:
-امشي اللا...اش عندي نعمل لعمري....
-يخليلي عشيري...
بركنا كلينا وارتحنا مشوار...سألتو:
-عبدو شنوة البرنامج بعد ما نوصلوا؟
-نعديو الليلة كيفما جا ومن غدوة نسافرو بالتران لوين صاحبي...نكنوا عندو ايامات حتى ندبرو سكنى وخدمة....
-وعلاش نباتوا كيفما جا؟؟هيا نمشيو اوتيل....
-بعقلك انت ولا بلاش؟؟بانا اوراق بش نباتوا فيه؟؟ سامحني فيك والله...
-تي ماو شقينا البحر وبتنا في الغابة و بتنا في دار الناس مازال الاوتيل بش تكمل الاحداث كيما الافلام.
-الله يحبس علينا العقل والدين...يا ربي صبر ايوب... هيا قوم نوصلوا قبل ما تظلام الدنيا نلقاوش بلاصة نباتوا فيها...
قمنا وكبسنا شوية حتى وصلنا...هي قرية صغيرة اسمها" سانتا ماريا"...محلاها ومحلا معمارها...بيوت بالقرمود...ثلج متراكم عالجبال وراها...شوارع نظيفة مبلولة...منظر يشره ويرد الروح...شقيناها وبرغم باينين اغراب أما حد لا تلهى بينا ولا ركز معانا...قضينا خبز حاجات شايحة معاه..شريت البسكويت والشكلاطة والشيبس مونتي وخذينا اك الخيمة الصغيرة اللي تتنفخ متاع مخيم ولا بحر وخرجنا...
سايي الليل هبط واحنا بعدنا شوية عالقرية...لبست عبدو في الظلام والخلا...تورش في يدو يضويلنا حتى لقينا قنطرة اخرى فتناها وهبطنا تحتها...نفخ عبدو الخيمة ودخلنا في وسطها وضو التورش عملناها امبوبة...والجو رومنسي علخر وانا وعبدو في قيتون تحت قنطرة....مدينا ناكلو والسكات مسيطر علينا.... تحس الجو مشحون ومتوتر شوية...حبيت نلطف شوية برغم ما نعرش علاش...
-عبدو مش الجو رايق متاع حب وغرام....
-هاو رجعنا للهبال...كان سكت كان خيرلك...
-هاني ديما ساكتة خلي مرة نتكلم ونتنفس...
-اي انت صرفت صرفت مش بش تقلي اش جابك وتحكيلي على روحك؟؟؟تو محسوب فرد مصيبة...
-هههههه لا ما نحصلش...حتى تقلي انت الساعة شكونك واش جابك...
جبد شعل سيقارو وثنى ركبة ومد الاخرى وبدا يحكي
-انا عبد الرحمان من عايلة بسيطة..بابا عامل يومي ما نهار ونهارو وامي تخدم في المعامل.عندي اخواتي زوز بنات اصغر مني،طفل وحيد تعبت دارنا صرفوا دمهم بش نقرا ونوصل و نعاونهم اما كالناس الكل تخرجت وقعدت بطال رضيت نخدم اللي يجي حتى يحلها ربي..حب حياتي زميلتي بنت اكابر تخرجت خدمت وعرست وانا كيما انا ما قدمتش...عبدو البطال

✴✴✴✴