مر ٦ شهور من حادثه اختطاف المولود .. سيرين اتهلكت حزن وبكاء و نواح و الم ولا خبر ولا اثر حتى من احمد وفضل ليها من الجنون شعرة ..
اهلها ما قادرين يواسوها ولا بأي طريقه 😭 بلغو وماف ايي دليل اتحفظت الدعوه وما اتحركت ..
هانيه قاعده في الصفره مع امها وبتتكلم بالتلفون مع هشام اخوها قال ليها بعد الغداء وعلي المغرب كده بجيك نمشي نزور سيرين ونطمن عليها كيف بقت حالتها .. ولازم تطلع من الاكتئآب ده وماف حل الا تنزل للحياه وتمارس نشاطاتها عادي وتشتغل ..ما ممكن تقعد بين ٤ جدران وتفكر في الحصل لمتين يعني ..
هانيه قالت ليه امكن تشوفك انت تغير رايها لانه نحن لما عرضنا عليها الكلام رد ما قادرة ترده علينا شده ما متأثره بالحصل ..
قفلت من هشام اخوها امهم الشمار قتلها عايزه تعرف دي منو سيرين دي
هانيه حكت ليها انها زميلتهم ولدت وراجلها خطف المولود وهرب بره لانه اصلا جنسيته ما سودانيه كندي 😪 وقلبها اتلوع وحالتها حاله يا امي 😢 هي شغاله معانا يعني زميلتي و صحبتي في نفس الوقت وما قدرت اساعدها بشي اهاا حكيت لهشام واقترحت عليه نمشي ليهم امكن جيته تغير رايها امها وابوها واهلها تعبو معاها بالحاله دي ليها ٦ شهور
امهم زعلت وقالت لهانيه حيييي يا اخواني الجنا حاااار ربنا يصبرها ده ابتلاء .. خلاص بمشي معاكم اشوفها امكن اقدر اساعدكم في شي
المغرب هشام غشاهم طلعو امه و هانيه ومشو لبيت سيرين ..
بالورق حق البيت و حق تامين الدكاكين للبضاعه الاتحرقت الاستلمها حسن من احمد .. رجع حسن تدريجيا محلاتهم و رحلو لبيتهم القديم السمح وفرشوه اجمل ما يكون وحساتهم بدت تترتب
.. مشكلتهم قصة سيرين دي وانه ابوهم بقى مقعد و ما ماشي في تحسن بقى هزيل من المرض وكل يوم حالته من سيى لاسواء وبالذات من حزنه علي سيرين بته الوحيده و الحصل ليها
وصلوهم هانيه وهشام و امهم .. استقبلهم معتز وضيفهم في الهول .. وامهم جات مارقه سلمت عليهم بترحاب شديد ونهى برضو ..
هانيه سالت من سيرين قالو ليها راقده الاسبوع الفات الدكتور كتب ليها حبوب حقت اكتئآب بتهدي الزول شديييد وبتنومه بقت لا مع الحيين ولا مع الميتين 😭
نهى دخلت صحتها تقوم فيها وتحنسها تطلع تسلم بس وتجي راجعه ما عايزه تتحرك شبر من السرير وشها شااااحب مصفر لما جاتها هالات وجسمها هزيل جدا زي الورده الذابله 🥀
دخلت ليها هانيه سيرين لما شافتها ابتسمت بوجع ودموعها نزلت هانيه جات قعدت جمبعا و حضنتها وتمسح على ضهرها خلتها بكت زياده وهانيه برضو بكت معاها وتهدي فيها .. يا سيرين ربنا قاااعد ومن اسماءه العدل اكيد ما حيضيع حقك ان شاء الله يا سيرين .. ربنا يثبتك ويقويك ويربط علي قلبك
: يا هانيه بس اعرفه مات ول حي 😭😭😭
لو حي عايش وين ؟ البهتم بيه منو ؟ لو عيان البساهر معاه منو ؟ ده حته مني يا هانيه ما شفته ماشفته 😭😭
سمعوها بره امها قامت تشوفها وقامت معاها ام هانيه و وراهم هشام .. وقف جمب الباب لقى سيرين بقميص بيت عادي وما لابسه طرحه وشعرها منكش وحالتها حاله رجع طوالي بره ..
هانيه لما شافت امها قامت ليها قعدت جمب سيرين حضنتها وتقول ليها بسم الله يا بتي ربنا يهدي بالك ويريحك يا ربي و تملي عينك بيه وتشوفيه يا رب العالمين اثبتي واصبري يا بتي الدنيا دي كلها دار ابتلاء اصبري وبتنولي ان شاء الله كلنا مستبشرين خير وربنا قادر زي ما اختفى منك في غمضه عين يرجعه ليك في غمضه عين ان شاء الله .. بس كيييف انتي بتكوني لما يرجع لازم يلقاك قويه ومنتظراه قومي يا بتي قومي غسلي وشك تعالي .. هشام بره جاء يسلم عليك ويتطمن عليك
قومتها ام هانيه و خلتها تغسل وشها وغيرت هدومها مع نهى ولمت شعرها ولبست طرحه وطلعت
سلمت علي هشام وعينها مكسورة للارض وهشام يعاين ليها بقوه وحزين و زعلان على حالتها بعد قعدو سالها من اخبارها صوتها واطي ومنكسر الحمد لله كويسه ..
دخل يها طوالي في موضوع انها ترجع تشتغل عشان تخفف علي نفسها الضغط الهي عايشه فيه ده ومعتز ايد كلامه وامها وهانيه برضو بدو يقنعو فيها كلهم انها لازم تكون قويه وتشتغل وربنا ما بخلي حقها يروح ..
سيرين ما عايزه تحرجهم وقالت ليهم ان شاء الله بحاول ..
هشام سأل معتز قال ليه هي القضيه حصل فيها شنو ؟
معتز قال ليه اتحفظت وعلى اساسا المشتكين عليه هو والد الطفل و الاصلا هو ما موجود في السودان عايش في كندا وقدر ما حاولنا نتواصل معاه ما لقينا طريقه نوصل ليه وما عندنا معارف هناك وشاكين اصلا يكون غير مكانه ما معروف ..
هشام قال لكن يا معتز لازم كان زول يسافر عديل للموضوع ده ..
