زى العادة كنت قاعده فاضيه مبعملش حاجه لاقيت فجاءه قدامي event عن الوحدة ، قولت اروح يمكن القي حل هناك ،نزلت تاني يوم الصبح ودخلت قاعه كان العدد مش كبير ، معرفش حد فيهم وواضح انهم ميعرفوش بعض ، شويا ودخل المسئول عن event وب ابتسامه بدء كلامه :
- مساء الخير .. انا لا هقول أسمي ولا عاوز اعرف اسمكم احنا انهاردة هنا علشان نفهم يعني ايه وحدة .. بس قبل ما اتكلم نسمع التسجيل دا ..
شغل مسجل وصوت بنت ودا الحوار :
- الو ..
- انا اسفه لو كلمت حضرتك فى الوقت دا بس انا عاوزه اتكلم مع حد ميعرفنيش ولا اعرفه ممكن ..؟
- إتفضلي وانا سامعك..
- انا لوحدي ..
- وبعدين ..
- هو دا بس انا حاسة بوحده بتزيد كل يوم عن اللى قبلها ، مش حاسه بسعادة ، مفيش حاجه بتحصل بتفرحني كل حاجه بتبقي عاديه ولا ليها تأثير ،وحاسه بخنقه وبوجع مش عارفه أسبابه ، وصداع دايم معايا ومهما اخدت مسكنات مبيروحش ، روحت كشفت وعملت إشاعة طلع مفيش حاجه ومع ذلك كل يوم بليل الصداع بيزيد ومش بعرف انام .. هو انا مريضه نفسيه..؟!
- ناقص تقولي عندك إكتئاب..؟!
- أعراضه دى ، صداع وارق وخنقه والاحساس بالوحدة..
- أممم.. بصي الاكتئاب دا مش سهل تشخيصه كده زى ما إنتي قولتي ، ايوه من أعراضه صداع وارق ولكن أمراض تانيه بتكون أعراضها كده .. لكن نتكلم عن الوحدة الل انتى فيها دى ..انتى بتقولي انك لوحدك ..؟!
اتنهدت : ايوه ..
- اختيارك ولا غصب عنك ؟
- كان دا الحل الاحسن ..
- يعني إختيارك ..؟
- مش عارفه بجد إختياري ولا انا أساسا عايشاها من
زمان وانا مكنتش حاسة ..!
قفل المسجل ورجع اتكلم معانا :
- طبعا قولتوا انها مريضه إكتئاب ..انا هطلب منكم تسمعوني وتحددوا إحساسها دا ايه واحساسكم إللى بسببه تواجدتكم هنا ايه ..
الوحدة إحساس بشع ولما بنستسلم له بيفترسنا ويبقي إحساس بالوحدة وبعض الاضطرابات النفسية ك الاكتئاب ، والوحدة عائق مؤكد لحرمان من السعادة مهما كانت وفقدان الرغبه فى الاستمرار ، ومنكرش ان التخلص من الاحساس بالوحدة أمر مرهق وصعب جدا لكن يتوقف ع الشخص اللى يشعر بالوحده ..!
مبدئيا كده فى نوعين من الوحده ، الاولي ب إختيارنا وبقرار خالص منا ودا إسمها إنعزال ودا الإنسان بيقرر ينعزل عن الكل وبيكون سعيد ب إنعزاله دا وراضي وعايش ولا يعاني بأي اضطرابات نفسية بالعكس بيكون متصالح جدا مع نفسه ، والنوع التاني وهو الوحده ودا شعور سلبي بيحسه الإنسان ويبقي مصاحب ل الاكتئاب وكل إنسان تايهه عن نفسه معرض له ..
هتسألوني ايه أسباب الوحده ؟
هقولكم أسباب الوحدة تختلف من شخص لتاني، وقبل ما تعرف علاج وحدتك ايه لازم تعرف ايه سبب الوحدة من الاساس ..
- ازاى ؟
- ف ٧ أنواع من الوحدة إللى بيشعر بيها الانسان
١- لما تتنقلي لمكان جديد ، شغل او بيت جديد او مدرسه او كليه ..اغلب الناس بتفرح وتحس بالتغيير لتغيير المكان ومقابله ناس جداد ، لكن مع البعض الاحساس بيبقي مختلف ، إحساس عدم الراحه لا بالمكان ولا بالأشخاص الموجودين وهنا تجد الاحساس بالوحدة انك غريب عن المكان دا ..
٢ - إختلاف فكرك عن المحيطين بيك ، يعني مثلا تكون ذو فكر مختلف وأفكار مختلفه عن الموجودين حواليك ، أو ليك هوايه ومفيش حد من إللى حواليك متوافق معاك فى الفكر او يشاركك هوايتك ..بالتالي هتحس بالوحدة وسطهم..
٣- إفتقادك لعلاقة حميميه من الأشخاص المحيطين بيك، علاقتكم علاقه سطحيه مهتمه بالمظهر وبس سواء حواليك أصدقاء او عيلتك او معاك شريك مفتقد معاه الاحساس بالوجود مشغول وبعيد فبالتالي هتحس بالوحدة..
٤- مفيش حاجه او حد فى حياتك تهتم به ويحتاجك دايما يحسسك بالمسؤؤلية وانك مهم عنده ، ف اغلب الأشخاص اللي بيحسوا بالوحدة بيتجهوا لتربية حيوانات كالقطط والكلاب والعصافير ف وجود الحيوانات دى فى حياتهم بيزيد من إحساسهم ب المسؤؤلية والرعاية و وان غيرهم محتاجهم فمبيحسوش بالوحدة ..
٥- إنشغال المحيطين بيك عنك ، مهما كانوا كتار حواليك هتحس انها علاقه عادية سطحيه مش علاقه حقيقية ، إنشغالهم فى حياتهم الخاصه او عندهم أصدقاء تانيه أكثر قرب منك ليهم او بدءوا حياه جديدة ارتباط وأصبحوا غير متاحين زى الاول ..مشهد إجتماعي اتغير فجاءه ب إختفائهم وبالتالي حسيت بالوحدة..
٦- فقدان الثقه .. يعني موقف يحصل بينك وبين شخص ما صديق مثلا وصعب تثق فيه زى الاول رغم انكم بتتكلموا عادي بس فقدان الثقه وصلك لمرحله انك موجوده فى علاقه صداقه او حب غير مريحه وانك لوحدك ..
٧- رغبتك فى الهدوء .. انت ممكن تكون وسط مجموعه كبيره من الأشخاص نشطيين ودايما فعاليات وانت مفتقد وقت قليل للهدؤء ومفيش حد متفهم إحتياجك دا ومفيش حد عارف ان اكتر حاجه تحبها انك تكون فى مكان هادي مع شخص بتقرأ كتاب او تشرب قهوتك او تتفرجوا ع فيلم ..
ولمجرد معرفتك بنوع الوحدة إللى عايشاها ببساطة هتقدر تركيز وتوصل لحل ولعلاج وحدتك بسهوله بدون تعقيد ..
- وهو اصلا فى علاج للوحدة ؟
- هو اكتر منه علاج هو عادة تقدري تتخلص من الوحدة وتهرب من شبح الاكتئاب..
وهما ٥ عادات بسيطه جدا
١- الرعايه والاهتمام .. مش ليك لا انت امنحهم لغيرك سواء شخص او حيوان او نبات ، ودا لان الاهتمام والرعاية بالآخرين بتعمل لغه تواصل بين الاتنين وبيعزز الشعور بالسعادة وبالتالي مش هتحس انك لوحدك ..
٢- التعود ع التواصل ، متستناش حد ببدء يكلمك ابدأ انت يعني مثلا فى الشغل اتكلم مع زمايلك عن أحوال الشغل والمستجدات ، فى المدرسه او الجامعه اتكلم واسال عن المحاضرات ، أو لما اشتريت كتاب اتكلم عن رايك واسمع رأي غيرك ..هكذا مره ع مره هيبقي فى تواصل ومش هتحس بالوحدة
٣- حاول تكون متفتحه ذهنيا ، اغلب إللى بيحسوا بالوحدة بيرفضوا اى صداقات جديدة فى حياتهم ودا بيعزز وحدتهم ؛ فبالعكس التعارف ع أصدقاء جدد متوافقين الاهتمامات والحياه بيبعدك عن إحساسك بالوحدة ..مجرد تعرف شخص بيحب فيلمك المفضل دا هيفرحك وهيحسسك انك مش لوحدك ..
٤- متجبرش نفسك ع تقبل وضع غير مريح ليك ، بمعني متقعدش فى مكان غير مريح ، متكملش فى شغل غير مريح ، متتكلمش مع ناس غير مريحين، متعملش حاجه غير مريحه ليك ، والقصد غير مريح غير مريح نفسيا لانك كل ما هتجبر نفسك ع تصرف او كلام غير مريح ليك دا هيعزلك اكتر عن الناس وعن نفسك وهتأذي نفسك اكتر ..
٥- بين الفتره والتانية اسأل نفسك انا محتاج ايه فى حياتي ، أصدقاء جداد ، إهتمام من أهلي واصحابي، علاقه حب سؤالك لنفسك ب ايه الل محتاجاه يعتبر مواجهه لمشاعر الوحده اللي مسيطره عليك وهتمنعك من التشتت وانك تجازف وتدخل تجارب تأذيك اكتر ..
وأخيرا وليس اخيرا اشغل وقتك حتي لو ملقتش حد معاك ، الحياه متغيره واللى معاك انهارده يا عالم حياته هتحدفه فين ،، مش بتعيش العمر لوحدك لكن هيجي وقت وهتلاقي الل يقتحم حياتك ويندمج معاه بمنتهي الاريحية لكن فى وقته سواء صديق او حبيب ، والاهم اندمج مع نفسك بلاش تنفصل عنها لان وقتها هتكون مشتت وتايهه وببساطه هتأذي نفسك ، راضي نفسك وصالحها وصاحبها .!-
فى النهايه عاوز اقولكم مجرد فهمنا الشئ المفقود فى حياتنا هيكون من السهل معالجته بالعادات دى او عادات تانيه إحنا هنكتشفها طول ماإحنا غير مستسلمين للحاله وعاوزين نعيش ..!
إعتبروها إسكريبت وأتمني يعجبكم 💙
