الدكتورة أسيرة الزعيم 🔫👩‍⚕️

الحلقة 3

دخلت عندو لقاتو حاط راسو بين يديه وقفت عند راسو و هدرت : بون موسيو ماكس كيما راك تشوف بلي تعرضت لحادث قوي بزاف و كان غ....
قاطعها بحدة و هو يشوف للفراغ قدامو: واشنو هو الحل!؟؟
سرات قشعريرة من النبرة الحادة لي في صوتو و قالت : الحل انو لازم تقعد تداوم حتى تبدا الذاكرة تاعك تولي تدريجيا لانو راك فاقد العامين اللخرين من حياتك .
شاف فيها ماكس و هدر: و كيفاش نداوم ؟
جوري: راح تجي مرة في كل  الأسبوع لهنا و نتفحص الحالة لي راك راح توصللها
ماكس : مرة كل أسبوع!!! الحاجة الأولى و طلع يدو في وجهها مارانيش فارغ شغل باس نجي لهنا دائما و الحاجة التانية شكون لي دارلي العملية؟
جوري بعدم فهم: انا..
ماكس و هو يوقف : يعني انت السبب و انت لي راح تلقاي الحل هذا فاقرب وقت و الا...
جوري: لالا مليح و يزيد يهدد و الا واش ؟؟ والا واش قول راني نسمع فيك ....
سكت حتى دنات ليه عند وجهو طلعت يدها تستفز فيه كانها تخلف تارها: الحاجة الأولى درتلك العملية ماشي حبا فيك لانى منعرفكش même pas و انما خرجت من  عملية كانت تعني بزاااف تعرف واش معناها تعني بزاف يعني بين الحياة و الموت و جيت درتلك العملية تاعك لانو الحالة تاعك كانت متسمح لحتى شخص من غيري يستكلف بهاد العملية و لي درتها في وجه استاذ احمد لي مقامو عندي في مقام بابا  و لوكان شفت حالتك كيفاش كنت متهدرش هاد الهدرة و الحاجة التانية واش تكون انت باش تهددني  واحد كيما انت انا منديرلوش قيمة
ماكس باستفزاز: هه متعرفيش شكون انا ....مالا ريحي عاقلة لانك متعرفي والو على واش نقدر ندير ليك و لي كيما نتي و دار عطاها بظهرو
جوري؛ باين بلي مازال معرفوكش بيا مليح و انو حياتك كانت تحت غلطة وحدة من يدي يا.....موسيو ماكس .و خرجت
دار يشوف في الباب و الدهشة في وجهو جامي واحد هدر معاه بهاد الطريقة كبفاش اليوم طفلة لحجم اليد تحداتو و تحداة جبروتو و العظمة تاعو
تبسم باستهزاء و قال: انت لي راح تخسري في الاخير يا الدكتورة الشاطرة دخلتي ارضي بيدك .... و كمل يطم في حوابجو و جاه الفضول باش يعرف عنها كلشي
اما جوري لي راحت للمكتب تاعها و هي مقلقة منو و من طريقة الهدرة تاعو مي كانت واثقة من نفسها و من الهدرة لي هدرتهالو تبسمت بفخر و قالت: الا ما تطلب السماح ..
كمل رفد حوايجو و راح عند احمد طبطب و دخل
أحمد: موسيو ماكس اتفضل
قعد و هدر: لازم تبعتلي طبيبة للقصر
احمد و فهم قصدو: أوكي دوك نشوفلك كاش ممرضة ترافقك
ماكس باستهزاء: نونو نسحق طبيبة و لي دارتلي العملية بالظبط لانها هي المسؤولة على الحالة تاعي
احمد: موسيو ماكس لوكان نقدر مي راهي احسن دكتورة جراحة عندنا منقد....
قاطعو: نسحقها في القصر تاعي غدوة صباح و ادا ماجاتش نتفاهمو غمزلو و راح .
جازت جوري على المرضى تاعها و سخصت الحالات تاعهم كامل حتى عيطلها احمد
راحت عندو و هدرت: نتمنى نكون كملت خدمتي و كنت عند حين ظنك
احمد بابتسامة: وي دايما محسنة ظني ربي يبارك فيك مي عندي طلب صغير لوكان تنفذيهولي نكون ممنون ليك يا بنتي
جوري: انعم واش هو غير الخير!
احمد:  خير يا بنتي خير . سكت و كمل هدر : لازم تروحي تخدمي في القصر تاع ماكس مدة قصيرة باش يتعافى .
هدرها و شاف فيها وجهها ملامحو باردة و مستفزة و حادة في وقت واحد : كاين غير انا!!
احمد: لا مي هو طلب هكدا
جوري في نفسها: طحت في يدي يا موسيو ماكس الا ما ندمك راح نقبل الطلب و نثبتلك انو انا اقوى من واش راك شايف علابالي بلي درت هكدا باش نخسر مي ماشي جوري لي تخسر .
شاف فيها احمد ساكتة عرف انو رايحة ترفض الطلب نهائيا و عرف انو التهديد راح يصرا يصرا من عند ماكس تقبل الواقع و هدر بتنهيدة: عرفت جوابك بنتي معليه ماشي بسيف عليك تخدمي خدمة ماشي مرتاحة فيها و حبط راسو بفقدان امل
شافت فيه جوري و ضحكت : و شكون قال رفضت
أحمد طلع راسو بزربة : يعني..يعني..
جوري: انعم ايه قابلة و وقفت : مالا انا نروح نوجد روحي و نريح شوية مي قولي برك العنوان
احمد: غدوة نبعتلك شوفور
جوري: لالا ماكاله نروح بطونوبيلتي
أحمد: جوري بنتي الله يفرحك  كيما فرحتيني
جوري؛ آمين يا ربي امين. و خرجت عيطت في التلفيون: الووووو
ميار: وييييييي
جوري: خدعتيني مع كاش وحدة ياك خااااينة وياااااا خيااااانة صحبتي
ميار: هههههههههه بلعيه خلاص كرشي
جوري: واش حلوفة واش راكي
ميار : و الله غير الحمد لله يا ربي و أنت
جوري: الحمد لله قوليلي وين راكي؟
ميار: في الدار علاش
جوري؛ راهي  12:30 واحد تص ساعة نلقاك واجدة نروحو نفطرو
ميار: مسقسيتينيش ادا فطرت
جوري: منشقاش نسقسيك باسك مام تكوني فطرتي تزيدي تاكلي ماشي حاجة جديدة
ميار: هههه اوكي ايا اومبعد..
خرجو البنات فطرو و راحو دارو شوبينغ و شراو حوايج و حكات جوري لميار واش صرالها و إنها رايحة باش تكمل الحرب تاعها و تثبت روحها قدامو كملو و رجعت ميار للدار و جوري راحت لدارهم
دخلت للدار لقات يماها في الكوزينة دخلت عندها : ماماا
دارت يماها ( لامية): اه جوري بنتي جيتي
جوري: لالا واحد العشر دقايق نكون هنا
لامية: جايحة
جوري: ماما راهو هنا بابا حكيم؟
لامية: وي علاه
جوري؛ نروح نبدل و تجي نحكي معاكم في سوجي مهم
لامية: غير الخير
جوري: خير خير ايا امبعد و طلعت
________________
في جهة أخرى تحديدا في قصر كبير مخدوم بواحد الدقة و الامتياز نادرا وين تشوف قصر بهاد الجمال قاعد في المكتب تاعو حاط رجل فوق رجل و يجبد في الهواء من السجارة تاعو ...دقايق و يدخل عليه صاحبو: اييييه مليح المزاج في بلاصتو على سلامتك خو
ماكس: الله يسلمك واش ماكش تبان
سام: راني مع الخدمة
ماكس: ربي معاك
سام: قريب ان شاء الله تولي معانا قريب ان شاء
ماكس: نتمنى.... و الصحافة ما لحقهم حتى خبر ؟
سام: لالا وصيت احمد في السبيطار ميهدرش و طبعاخاف و لزم الصمت
دارلو ايه براسو
سام: و كيفاش فترة العلاج واش ديرلها
ماكس: راح نجيب طبيبة لهنا
سام: او خليني نشوفلك طبيب مليح
ماكس بضحكة شر : لا كاين احسن طبيبة متخافش
سام  و هو يعقد حاجبو  : على واش راك ناوي
ماكس: على كل شر و ضحك.........
سووو الحلقة تاع اليوم خلاصت نتمنى تكون عند حسن ظنكم و نتلاقاو في بارت جديد ❤🌀