انا إنسانة ليا عالمي الخاص وحياتي الخاصة، لا شبه حد ولا بعمل زى حد علشان كده دايما الكل باصصلي اني مختلفه عنهم بحس اني جايه فى زمن غلط او المكان الغلط، فى الجامعه كنت ببص لتصرفات إللى حواليا أغلبهم هدفهم انهم يرتبطوا وفعلا بيرتبطوا وانا بكون لوحدي ودا لاني مش عاوزه ارتبط ودا مش غلط بس انا مش بحب القيود والوقت دا قيود رايحه فين ونازله فين ومتروحيش من غير ما تقوليلي لا انا كفايه عليا قيود أهلي المستحملاها بالعافيه لان مفيش مفر ..
خلصت الجامعه وقولت أشتغل لكن محبتش اشتغل بشهادتي انا اساسا درست تخصص مش حباها كمان اشتغله باقي عمري ، فكنت بدور ع شغل ارتاح فيه ابقي صاحيه من النوم وانا مبسوطه انا نازله الشغل ، جربت كتير ومرتحتش ، أهلي شافوا اني مش نافعه فى شغل يبقي تتجوزي ، انا مش عاوزه اتجوز يا ناس ، "ليه ايه السبب إللى قدك معاهم عيال بصي حواليكي " بحاول اوصلهم مش شرط اللى حواليا اتجوزوا يبقي لازم اتجوز انا مش مستعده المسؤؤليه دي وهما كانوا فاكرين اني بحب ،، احب ؟! انا اساسا معرفش يعني ايه حب حتي الل فى الروايات والأفلام بقول خيال ومبصدقهوش ولا حصل قولت ياااه نفسي اعيش كده .. كنت بقول مين دا اللى هيرضي ويوافق يعيش مع واحده زي ..كانت أهم مطلباتي اعيش زى ماانا عايشه فى حياتي واللى بعمله ، أهلي وكل إللى حواليا عيشي براحتك لكن فى بيتك ، زنهم كان اصعب حاجه تمر عليا ومبوظالي حياتي .. الراحه اختفت ، قولت اراضيهم واوافق ومن تاني يوم ابتدأ تحديد مواعيد اشوف عريسان او بمعني اصح نتفرج ع بعض .. قابلت كذا حد واتكلمنا لمن مش مرتاحه..فكره ان انا قاعده مع شخص علشان هدف وهو الجواز غير مريحه ، اعرف منين انه صادق يعرف منين انى صادقه حتي لو اتخطبنا ف خلاص مفيش فرصه غير لما نعيش مع بعض.. أغلبهم مان اعتراضهم ع طريقه حياتي بنام طول النهار وأسهر طول الليل وفى الل كان عاوز نفطر سوا وفى إللى هيعيش فى بيت اهله وغيرهم يعني كل الإقتراحات غير مريحه من وجهه نظري .. طلبت من أهلي ريست ..ادوني فتره راحه وبعدين نكمل.. وافقوا وقتها كنت بدور ع شغل علشان طول ماانا قدامهم بيستعجلوا فى موضوع الجواز وعاوزين يلحقوني قبل ما اعنس ويقولولهم الناس بنتكم العانس راحت بنتكم العانس جت ..
روحت مقابله شغل وخرجت قعدت فى كافيه مسكت الموبيل قولت اتصل بحد من صحاباتي كلهم متجوزين ومين إللى تسيب بيتها وعيالها علشان تنزل دلواقتي..دا لما بنتقابل بيبقي بخطه بقبلها ب اسبوعين او شهر ويا تتم او لا .. أمري لله قعدت لوحدي طلبت مشروب ، شويا ولاقيت شاب قرب مني وبيكلموني:
- انا كنت بشبه من اول ما دخلتي قولت لا مش معقول
طبعا انا استغربت من الدخله دى وقولت مش وقتك ايه الجو دا ..
- فى حاجه حضرتك ..؟
لاحظ وشي قلب وبسرعه :
- واضح انك مس فاكراني .. انا حمزه جاراكم او اقصد كنت جاركم فى الشقه الل قدامكم فى عماره سيدة عيشه ..
حاولت افتكر : حمزه مين .. مكنش فى حد ساكن قدامنا غير طنط كريمه وبنتها روان وأخوها
- وهو انا أخوها..
- يا سلام ..
- طيب استني
طلع موبيله واتصل برقم وقعد يتكلم مع واحده وقال اسمي ولاقيته بيقولها :
- كلميها وفاكريها علشان فاكراني بعاكسها
مسكت الموبيل وبتردد: الو
- ازيك يا وحشه كده تنسي روان دا احنا كنا طول الليل بنسهر مع بعض وفى الدرس لما مستر حليم طردنا علشان لاقانا بنغشش بعض ..
فجاءه افتكرت : رواان .. وحشاني والله ..من وقت ما عزلتوا من ١٠ سنين وعلاقتنا بقت فيسبوك واخبار عن بعد
- مااحنا سافرنا مع بابا ومكنتش عارفه اوصلك بعد ما عزلتوا انتم كمان والله الفيسبوك دا من غيره كنا تهنا
- والله وحشاني
- وانتى جدا .. حمزه اوعي يكون ضايقك
- ها .. لا ابدا ..
خلصت كلام معاها حمزه فضل واقف . مبتسم وباصصلي : ممكن بقي اقعد ولا لسه مش فاكره..
- لا اتفضل ..
قعد : انا افتكرتك من الصور الل مع روان شكلك متغيرش كتير
- لا اتغير كتير ..
- لا متغيرش ..
- انا ادري
- تمام ..
- انا كنت هنا فى مقابله شغل وانتي
- وأنا كمان ويارب اتقبل
-- ان شاء الله
- عن اذنك لاني اتأخرت
- إتفضلي
رجعت البيت ونسيت المقابله والموقف دا كله .. اسبوع وجالي ايميل من الشركه اتقابلت وهستلم الشغل لكن اسبوعين تدريب وبعدها استلم الشغل رسمي .. نزلت التدريب وكنت وقت الراحه اكون فى كافيه لوحدي مقدرتش اتصاحب ع حد لكن كتير كنت بصادف حمزه ، قعدنا مع بعض كذا مره ولا طلب رقمي ولا حتي الايميل واكتفينا بصداقتنا إللى بتكون ربع ساعه فى الكافيه نتكلم وبعدها كل واحد فى حاله ..علاقه مريحه بدون ضغوط ولا مسؤولية .. فى يوم اتقابلنا:
- عامله ايه فى التدريب؟
- تمام .. هانت كلها يومين ومش هشوفهم
- جميل شغل البيت بتحبي قاعده البيت
- مش الفكره بس انا حياتي كلها ليل وكنت بدور ع شغل يناسبني واول ما لاقيت انهم محتاجين مصممين جرافيك ومن البيت يعني اخلص شغلي وابعته ليهم بالايميل لاقيتها فرصه حلوه جدا ..
- فعلا جو الليل دا مختلف جدا عن النهار ..هدوء وراحة عالم تاني
- شوفت .. وكمان هيبقي سهري بمبرر علشان أهلي يسكتوا ويىحموني شويا من زنهم ع الجواز
- انتي رافض نهائي ؟
- لا بس مش لاقيه الل يتقلبني كده او يفهم دماغي ، يعني يفهم ان علاقتنا اكبر من زوج وزوجه وان ليا حياتي زى ما هسيبله مساحه لحياته .. مهم سيبك مني دلواقتي انت صحيح ليه متجوزتش لدلواقتي ؟
- يعني ممكن تقولي ملقتش إللى ارتاح معاها او احس وانا معاها فى البيت بالراحة من غير ضغط ولا مسؤؤليه ..انام براحتي واصحي براحتي يعني انا بنام طول النهار وبسهر طول الليل لو مفيش شغل ولو اروح شغلي وارجع البيت انام ،اكل اى حاجه مش شرط حتي انا مبحبش اكل اى حد اتعلمت اعمل اكل و مش حابب إحساس الأجبار مجبر اكون معاها فى كل حاجه يعني علاقتنا تكون مختلفه
- والله انت لقطه فى منك اتنين ؟
ضحك: هتعملي ايه والتاني؟
- هتجوزه طبعا..
وفجاءه وبدون مقدمات : وتتجوزي التاني ليه والاصل موجود
ضحكت : يا راجل
- يعني لو اتقدمت هتوافقي عليا ولا هترفضيني زى السابقون ..
لاحظته بيتكلم بجد: بتتكلم بجد ؟
- مينفعش اهزر فى كده ..
من غير ما احس وافقت وفعلا قابل أهلي ووافقوا وبعد شهر اتجوزنا ..حياتنا كانت زى ماانا عاوزاها ،حمزه سايبني اعمل الل عاوزاه لا محسسني بضغط ولا بوظلي حياتي الل عايشاها وكنت عايشاها بهدوء ..مرت فتره وكنا يعتبر عايشين مرتاحين ..انا متجوزتش حمزه عن حب لكن اتجوزته لاني لاقيت الراحه اعيش معاه عن غيره متفهم شخصيتي وحياتي .. و رغم اختلافي انا وحمزه فى حاجات فى طريقه حياتنا لكن حمزه كان بيتقرب لحياتي .. كتير وانا سهران والمفروض انه ينام علشان عنده شغل الصبح اتفاجئ داخل عليا وانا بشتغل فى الرسومات ومعاه اكل او عصير او قهوه وانا بكون وقتها فعلا محتاجه حاجه منهم .. وانا بتفرج ع حاجه مختلفه عن ذوقه كان بقعد يتفرج معايا ويتحمس ويقوم يعمل لينا فيشار او سندوتشات وعصاير :
- الفيلم دا جميل جدا
- بس دا مش ذوقك يا حمزه اقصد مبتحبش النوعبه دى خيال علمي وكده ..
- حبيتها معاكي عادي
إجابته فجائتني .. مع الوقت الحاجات الل كنت بعملها لوحدي زى السهر او الفرجه ع الأفلام او الاكل علشان لغبطه نومي لاقيت حمزه بيشاركني فيها من غير ما اطلب ، وبقيت بهتم اسأله عن شغلي او اى مشكله تقابلني نقعد وكان بيسمعلي اكتر ما بيتكلم وبيقترح عليا حلول .. الغريب هنا فى يوم رجع حمزه من الشغل العصر وكنت فى المطبخ :
- صاحيه لدلواقتي ؟
- لا نمت وشويا لسه صاحيه
- ليه فى حاجه ؟
- ماهو لاقيت مفيش غدا تتغدي لما تيجي نسيت اعمله امبارح بليل ..
- عادي يا حبيببتي كنت هاكل اى حاجه ..روحي كملي نومك
- لا خلاص انا فايقه وبعدين المكرونه بالجمبري تتاكل سخنه مينفعش تتسخن ..
- ومين قال كده ؟
- انا .. يلا غير همومك علشان ناكل مع بعض
- بجد ..
- لا بهزر ..يلا بقي
دخل غير همومه وقعدنا ع السفره الطبق كلن شكله يشهي لكن حمزه كان بيبصلي انا :
- مالك ؟
- مش مصدق انك بتتغدي معايا .. دا من القلائل لما يحصل كده بيبقي معندكيش شغل
- عادي يعني مش انا مراتك الله .. وبعدين يلا دوق المكرونه قبل ما تبرد و ..
فجاءه مسك ايدي وباسها : تسلم ايدك
- هو انت دوقتها اصلا ..
- كفايه انك وقفتي وعملتيها لأنك عارفه انا بحبها
اتحرجت لانه عرف انا عملتها مخصوص علشان هو بيحبها :
- طيب يلا كل وقولي رايك بجد
ابتدينا نأكل ونتكلم ونضحك وبعدها دخلنا المطبخ روقناه مع بعض وحمزه عملنا ٢ شاي بالنعناع وخرجنا فى البلكونه شربنا الشاي ودخلت اكمل شغلي وهو دخل ينام .. حسيت بفرحه لان حمزه كان مبسوط ..مع الايام فجاءه لاقيت نفسي بحاول اظبط يومي ونتغدي مع بعض لما يرجع من الشغل .. ولما بيتفرج ع حاجه اقعد معاه ممكن ميكنش نوعي المفضل من الأفلام لكن وجودي معاه كان إحساسها مختلف كلامنا مع بعض ونحلل الأحداث كان فى جو شيق بيحصل بينا ..
مرت سنه وحياتنا مستقره وشبه بنشارك حياه بعضينا من غير إجبار ولا ضغط ع الطرف التاني بالعكس كان فى متعه وسعاده وفى احتفالنا بمرور سنه ع زواجنا :
- مرت سنه
- وإن شاء الله وانتي معايا هتمر سنين كتير
- مزهقتش ولا تعبت
- انتي زهقتي ولا تعبتي ؟
- لا بالعكس منتهي الراحه
- يبقي الحمد الله انا نجحت
استغربت: نجحت فى ايه ؟
- انتي فاكره اول مره اتقابلنا؟
- ايوه ..
- كنت متعمد اقابلك ؟
اتفاجئت: نعم ..؟
- انا فى مره روان وهى عندنا كانت بتكلمك وافتكرت جيرتنا وفتحت الفيسبوك فضول مش اكتر وبدأت كل يوم من غير ما احس افتح صفحتك واشوف جديدك وعرفت من روان حاجات عنك من غير ما تحس وانتي ب منشوراتك كمان ..مع الوقت لاقيت إحساس شاددني ليكي اعرفك عن قرب وبالاخص لما عرفت من روان ان انتي ممكن تضعفي وتقبلي تتجوزي اى حد متقدم .. قولت ليه مبقاش انا اى حد دا وخصوصا انك مش محتاجه تدخلي علاقه حب علشان تتجوزي انتي محتاجه علاقه تفاهم يديكي مساحتك وحياتك بدون ضغط فشوفتك واتكلمنا ودخلت تحدي ان من غير قصد ولا ضغط عليكي لو محبتنيش زى ما حبيتك او تعبتي او زهقتي القرار يرجع ليكي وقتها ..
اتفاجئت جدا : يعني كنت قاصد ؟
- صدقيني لا ..انا كل تصرف عملته معاكي كان تلقائي مني ببقي عاوز اعمل كده .. ببقي عاوز اشاركك حياتك .. شغلك واقولك رأي واشجعك ، اتفرج معاكي اشاركك لحظاتك ،،انا بحبك ودا كانت طريقتي اعبرلك عن حبي ..
- انا فعلا مكنتش حابه ارتبط نتيجه علاقه حب علشان معرفش اصلا ايه حب او مسمحتش لحد أحبه ،لكن لما عشت معاك وبقربك لحياتي الل خليتني احس انك حد مهم تشاركني كل حاجه اكل وتتفرج ع افلام ونتناقش ونتكلم ونضحك ..اصحاب اكتر من زوج وزوجه حسيت وقتها يعني ايه حب .. واختلافنا كان ممكن يكون عائق لكن انت دوبت جبل التلج وقربتلي ومن غير قصد خلتني اقربلك وزى ما انغمست فى حياتي انا كمان عن سعاده وبحريه بقيت احب اشاركك حياتك .. كنت الزوج والصاحب ، فى الاول اتجوزتك بعقل واشتريت راحتي لكن الوقت اكدلي اني بحبك لدرجه ان حبيت يكون معايا ووسطنا حته منك ..
- بتقولي ايه ؟
مسكت ايده وحطيتها ع بطني : انا زى ما اتفقنا كنت مأجله الاطفال لوقت ما نحس اننا فعلا هتقدر نكمل مع بعض لكن خلاص انت هتبقي بابا بعد ٧ شهور كده وواثقه انك هتبقي أعظم واجن أب فى الدنيا ، لأنك زى ما قدرت واحتويت امهم بحبك هتخليهم اسعد الناس
- انتى إللى هتكوني أعظم ام .. رغم تفكيرك الغريب والمختلف لكن هتخليهم يفكروا صح وميقلدوش حد والاهم يثبتوا نفسهم لنفسهم .. بس فى حاجه
- ايه ؟
- مش متخيلك مكعبره كده فصلان ضحك
- مكعبره فين دا .. اوعي تقولي كده لا لا انا مش هكعبر
- لا اسمعي مني دا انتى بتفترسي الاكل ودلواقتي هيبقي دابل تحبي اجبلك اسكوتر علشان تتكعبري ولا بتحبي تتدحرجي ..
- بس يا حمزه بس مجرد التخيل فصلني
حضني وقالي : والله لو بقيتي ايه انتى نصيبي وحياتي وهتفضلي اجمل ما شافت عيني..
الاختلاف مش دايما بيكون حاجه غلط او عيب ، الاختلاف زى ما بيكون عائق يبعد بين الاشخاص بيكون أوقات وسيلة تقرب االاشخاص لبعض دا لو الأشخاص حاولوا ..!
إعتبروها إسكريبت وقولولي رأيكم 💙
الشير جميل وبيفرح 💙
