تجميع الحلقات الخاصه

الحلقه الخاصه 6

الحلقه الخاصه 6

يامساء الفل كل سنه وانتوا طيبين..... الحلقات الخاصه انا عن نفسي حابه الفكرة جدا وبقول فيها مشهد من كل روايه من رواياتي وابطالي اللي بحبهم... اللي متلخبط ومش حابب براحته خالص وياريت بدل تعليق مالوش داعي ميقراش ويكتفي بنهايه الروايات.....! انا بحب طبعا رايكم ولكن ياريت نكون ناضحين ونقول رأينا في الأحداث والابطال ومواقفهم مش في قراري اكتب ايه ومكتبش ايه... لاني اكيد مش هرضي الكل

(الابطال اللي هتظهر.... ولاد سليم وحور من جبل الجليد..... ولاد بدر وفريده من بعد البدايه..... ندي وآدم من القاسي.... مراد وندي من لم أعد تلك الحمقاء.... أدهم وغزل من مهووس بك ياصغيرة.... جواد وزهرة من ستكونين لي..... همس وعمر من حب اسود)

تجمعت الدموع بعيونها وهاجمته بشده ; لييه..... لييييه تعمل كدة فيا بعد كل اللي عيشته.....
لا ليه سبتها كل السنين دي عايشه وفي الاخر جايه تاخد ابني مني زي مااخدت اللي قبله....!
انتحبت فريده وهي تصيح بقهر : اللي قبله...! فاكرهم يابدر ولا نسيت ولادي اللي المجرمه دي كانت بتقتلهم
غص حلقها بشده بينما تتابع : لو انت نسيت انا عمرى ماهنسي...
عمري ماهنسي ولادي اللي ماتوا علي ايديها
ضغط بدر علي أسنانه :فريييده كفايه اسكتي
صرخت فريده بانفعال : مش هسكت يابدر مش هسكت....!
مش هسكت الا لما تقولي سبت ايمان عايشه ليه بعد كل اللي عملته...!
مقدرتش يافريده مقدرتش اقتلها
واشمعني هي قدرت تعمل كده فيا
فريده اهدي وخلينا نتكلم بالعقل
مفيش عقل هو فين العقل....بعد السنين دي اكتشف انك بتكذب عليا
مكذبتش يافريده
كذبت لما قولتلي انها خرجت من حياتنا ومش راجعه تاني
وده اللي حصل
وايه اللي رجعها.... ايه اللي رجعها بعد كل ده
رجعت تاخد ابني مني..... ابني اللي ربيته كل السنين دي
محدش هياخد فارس
هتاخده يابدر زي مااخدت مني اللي قبله..... هتاخده بعد اللي قالته ليه واللي فارس سألنا عنه....
ظل بدر صامت بينما يموج صدره بالاختناق فهو بين شقي الرحي.... لايستطيع ان يتحمل وجعها وجروحها التي ظنها باتت ماضي وانتهي وبين عدم قدرته علي تذكيرها له بكل هذا الماضى
هتفت فريده بأتهام : كل اللي بينا السنين دي في كفه واللي عملته في كفه...... عمري ماهسامحك ابدا يابدر علي الصدمه اللي عيشتها لابني..... دفعته في صدره بغضب وتابعت ;بسببك فارس هيبعد عني
بسببك هيكرهني.......  ابني اللي شاف اننا كذبنا عليه طول السنين دي... حرام عليك.....
حرام عليك.... ليه تعمل كدة فيه
هنا انفجر بدر بينما ظلت تضغط عليه وليس وكأنه هو الاخر ضحيه مثلها بل موقفه هو الأسوء ليهتف : كفايه يافريده..... كفايه
: لا مش كفايه.... فارس هيكرهني ويبعد عني وتقولي كفايه....
حاول امساك يدها وتهدئه ثورتها : مين قال إنه هيبعد عنك
نظرت اليه بضياع ;امال هيعمل ايه بعد ماعرف ان امه لسه عايشه... وياعالم قالتله ايه عني وعنك
قال بدر وهو يهز راسه : بطلي يافريده اللي بتعمليه ده..... فارس مش عيل صغير ويعرف يحكم كويس
رفعت حاجبيها بتهكم  ; يحكم.... ؟!
وانت شايف انه في مكان يقدر يحكم فيه اصلا
..... امه اللي فاكرها ماتت فجأه ظهرت لا وكمان بتقوله انك حابسها كل السنين دي  تقدر تقولي هقوله ليه عملت كدة.... نظرت اليه وتابعت : فارس لازم يعرف الحقيقه كلها
هز بدر راسه وقال بحزن  : محدش هيقوله حاجة انا هتكلم معاه
نظرت له فريده بانفعال : هتقوله ايه
قال بدر وهو يحاول بصعوبه السيطره علي اعصابه فلم يحسب حساب ابدا لهذا اليوم ; هتصرف وهقوله اي حاجة وانتي برا الموضوع
قالت فريده بغل وقهر : فارس لازم يعرف كل حاجة 
هز بدر راسه : لا مش هيعرف ومش هتقولي حاجة
هزت فريده راسها وانسابت دموعها : لا هقوله هقوله كل حاجة..... هقوله امك شيطانه مش انسان
..... امك كانت تستاهل القتل...  هقوله انها كانت بتحب عمك وعملت فيا كل ده عشان اتجوزني وهي لا....! لو انت ناسي اللي عملته انا مش ناسيه مش ناسيه انها كانت بتحب هاشم ومش ناسيه ولادي الي دفعوا تمن الحب ده.... لو انت ناسي ولادي اللي موتتهم واحد ورا التاني وحرقت قلبى انا مش ناسيه لو انت ناسي انها كانت معاك وبتحب اخوك انا مش ناسيه...
احتقن وجهه بدر بالغضب ليزمجر بها : فرررريده... كفايه...!!
تابعت الضغط عليه لتكمل : مش كفايه فارس هيعرف حقيقه امه..... هقوله امك كانت خاينه وعمرها ماحبت ابوك اللي كانت وخداه كوبري عشان توصل لعمك
استغفلتك سنين وانت قابلتها علي رجولتك انت حر
انصدمت ملامح فريده حينما انفلتت أعصاب بدر من عقالها ورفع يده عليها الاول مرة لتتسمر يداه في الهواء مزمجرا بغضب شديد حينما ادرك فعلته : قولتلك كفااااايه
هتفت بعدم تصديق ; بترفع ايدك عليا يابدر
: انت اللي وصلتيني لكده
زمت شفتيها لتقول يصوت مختنق بالدموع : مش انا..... انت اللي وصلتنا لكده لما حبيت  تكون بطل..... رفعت اصبعها وتابعت : بس مش علي حساب وجعي يابدر.... لو مقولتش لفارس الحقيقه هقولهاله انا...!
انتفضت علي صوت الباب الذي كاد ينخلع من مكانه بينما يصفقه بدر خلفه...!
..........
.....