في ليلة من ليالي الشتاء الباردة .. غزا الجو نوع من السكون غير المعتاد .. نسمات باردة تتجول في الشوارع كأنما تبحث عن آدمي كي تبعث فيه ريح من هبوبها البارد ...
قطع هذا السكون ضجيج وصخب آت من بيت حاج جمعة ..
( هي ياااا ناااااس هااا النايمين ليها شنو الحراممممي ... الحرامي سرقنااا )
في جهة أخرى في نفس هذا الحي كان الرجال خارجين من المسجد بعد أن أدوا فريضة الفجر ... تعالت قهقهاتهم وهم يتسامرون الا أن قطع عليهم صوت :
( هييي يا ناس شبشبي ختيتو هنا مشى وين ؟ دا كلام ايه !)
وصوت آخر ( هوووي يا نااااس انا برضو ما لاقي نعلاتي دا كلام شنو ؟ )
تزاحم الناس في التذمر ..بعضهم من ضحك على الموقف خاصة أنه يتكرر بين الحينة والأخرى ..وبعضهم من نسى حرمة المسجد وأخذ يسب ويلوث فاه بألفاظ بذيئة.
قطع كل هذا الصخب صوت شيخ الجامع حاج منير وهو يقول بصوت يخالطه الغضب : ( خلاص يخوانا ماف داعي للكلام الشين ترا كل يوم والتاني ياهو يا شباشبنا ماف يا زول فينا مسروق ..الكلام الكتير ما ليه داعي العندو حل يقولوا والما عندو يفتح الله بلااش كلام فاضي )
وافقه حاج النور مؤيدا : ( فعلا الراجل فيكم يمسك لينا الحرامي دا ما ممكن كل يوم والتاني سارق زول فينا )
وتتالت الشكاوى ...
- أنا نعجتي رابطها في العريشة الصباح صحيت لقيتها ماف
- أخير أنت أنا قروش البضاعة خاتيهن تحت المخدة صحيت الصباح لقيتهن ماف
- لا لازم نخت للحرامي دا حد ما ينفع كدا
- يا جماعة الزول مننا وفينا يعني إستحالة مسافة صلينا دا نجي نلقى شبشب ماف لحق متين يخش ويسرقهن ؟
- فعلا بعدين شكلو زول بخش البيوت دي وعارف ايي حاجة حتى حتات بندس حاجاتنا
- والاسوء من كدا بكشف حريمنا يوم داك تلب على غرف الحريم سرق دهبهن كلو وطلع
- خلاص يخوانا نتفق من هسي انحنا نعملو كمين عديييل
- ايي والله فكرة
- نحن موافقين
اتفق أهل الحي أن يقوموا بعمل مصيدة للص الملعون ...وسط كل هذا الحماس شرد حاج منير بأفكاره وكأنما يريد أن يقول لهم لا فائدة من هذه الخطط ولكن اكتفى بالصمت ... انفض هذا الجمع بابتسامات خبيثة متوعدة للص بأشد العقوبات ...
و رجع كل رب منزل إلى داره وأخذ يوصي أهل بيته بأن يحذروا من هذا الملعون لأنه يتجول بينهم ..وكل له خطته في الإمساك باللص ... أخذ كل واحد يحلم بأنه أمسك باللص ستكون سيرته في فيه كل الحي وسيكون البطل المنتظر ...
تسابق الشباب في الإمساك به ونسج الخطط أكثر من الشيب خاصة أن هدفهم إبهار حاج النور
فحاج النور لديه بنات من أجمل نساء الحي ...قيل أن جمالهن لا يقاوم..ولجمالهن الفائق أصر عليهن والدهن حاج النور ألا يخرجن الا للضرورة
----------------
( في احدى الاسطح ) ...
-حرررم أكون ماسك الحرامي ود اللذينة دا وأعرس بت من حاج النور
- أحلم ساي يا أخوي ماف زول ماسكو غيري أنا من هسي ما أعرف اعزل ياتا فيهن كل واحدة فايتة التانية سماحة
- ههه عشم إبليس في الجنة ..اصبروا كان ما أكون قابضو أنا إلا يبقى خشمكم ملح ملح
تعالت قهقهات الشباب وهم يتحدون بعضهم البعض ... تناسوا أن الشمس بدأت بالشروق حتى فاجأتهم ... لم يسع الواحد فيهم إلا أن يتوكل على مشاغله وينسى أمر اللص
