ومن الحب ما قتل (مكتملة)

استطلاع راى

تعديل

طيب انا طبعا اخدت كل اقتراحتكم بعين الاعتبار و و حبيت اوضح حاجه

اولا انا مش حمسح الروايه دلوقتى خالص لسه قدامى شويه على ما اعدل فيها و امضى معاهم العقود و ابدء بالنشر هناك و الحذف هنا،  يعنى لسه شغلانه حتاخد وقت لا يقل عن شهر يمكن وقتها يكون الابليكيشن عمل التعديلات اللى مضايقه الناس فى التعامل معاه و كمان تكون روايتى اشتهرت اكتر من كده

ثانيا بالنسبه للتعديلات بتاعه الروايه انا كنت ناويه اعمل تعديل فى احببت طريدتى عشان تكون فى  نفس مستوى السرد بتاع الباقيين لكن مش حعدل حاجه فى الاحداث عشان الناس اللى بتقول لا متعدليش حاجه و انا مش حعدل فى روايه لاجلك نبض قلبى غير الاخطاء الاملائيه بس

ثالثا بالنسبه للمفاجأه اللى كنت بحضرها هى عباره عن بارت هديه لاحببت طريدتى بعد التعديل و نوڤيلا لاجلك نبض قلبى و فى النوڤيلا دى حتلاقو مفاجآت تانيه حتبسطكم اوى

رابعا للناس اللى بتقول ان تطبيق دريمى مش بيحمل للقراءه اوف لاين،  احب اقولكم انه بيحمل عادى اوف لاين و انا بالفعل محمله اكتر من روايه و بقراهم اف لاين عادى، يمكن بس انتو مش عارفين تحملوها ازاى... نفس فكره التحديث الاخير بتاع الواتباد اللى معظم الناس مش حباه
بس انا حوريكم ازاى تتعاملو معاه و صدقونى مش حمسح الروايه الا لما كل الفانز يكونو مبسوطين و موافقين على نقلها

خامسا انا حفضل انزل الروايات الجديده على الواتباد و الفيس يعنى المتابعين ليا حيفضلو يتابعونى عادى واتباد و فيس بوك زى ما انا

سادسا انا اخدت قرار بخصوص روايه اقتحمت جنتى بالنشر غير الحصرى على دريمى يعنى حنشرها هنا و هناك مش حتتمسح

سابعا و اخيرا للناس اللى بعد كل الخطوات دى ما تحصل و تلاقى نفسها برده لسه مش مرتاحه اكيد ححل لهم الموضوع وقتها حل جذرى و مريح جدا جدا و هو تحميل الروايات الموجوده على دريمى pdf بس طبعا ده حيكون اخر الحلول لانى لسه مش جاهزه للخطوه دى

و فى النهايه انا عمرى ما حكون مبسوطه لو خسرت اى حد منكم لانكم عيلتى فعلا و ده مش تجميل دى حقيقه

بحبكم جدا و اتمنولى التوفيق ❤

♕♕♕♕♕♕♕♕♕♕♕♕♕♕♕♕♕♕♕♕
قرائى الاعزاء
دلوقتى انا محتاجه اتكلم معاكم فى حاجه مهمه جدا لانى بعتبركم عيلتى و بحبكم جدا و الله و شرف ليا انكم من المتابعين ليا و انا عمرى ما كنت حوصل لاى حاجه لولا دعمكم

دلوقتى اكيد كلنا سمعنا و عرفنا تطبيق دريمى بتاع الروايات

هو تطبيق زى الواتباد كده بالضبط مخصص للقراءه بس الفرق بينه و بين الواتباد كذا حاجه و حقولها لكم بكل شفافيه

1/ دريمى تطبيق بيقدر مجهود الكتاب و بيديهم مقابل مادى نظير تعبهم عكس الواتباد و الفيس بوك اللى بدون مقابل

2/ التطبيق جديد علشان كده مفيش منه غير النسخه الانجليزيه بس القائمين عليه بيوعدو انهم حيعملو منه نسخه باللغه العربيه لسهوله التعامل عليه و غالبا حتتوفر بعد العيد

3/ فى كتاب كتير جدا و مشهورين انتو اكيد بتقرو ليهم منزلين رواياتهم هناك

4/ تطبيق دريمى بيديكم تاسك زى مهمات كده كانها لعبه تقدرو تجمعو منها فلوس تفتحو بيها الروايات اللى بمقابل مادى زى مثلا بيديلكم تاسك انكم تدخلوه يوميا مقابل 5 بونص و هكذا

5/ تطبيق الواتباد بيتيح للقراء تقييم الروايه عن طريق الفوت و الكومنتات عكس دريمى بالكومنتات بس

( و هنا موضوع الكومنتات فى حد ذاته ميزه و عيب فى نفس الوقت،  اقولكم ليه؟  لان فى اوقات كتير التعليقات مش بس بتكون سلبيه لا و كمان بتكون جارحه و اوقات كتير بقفل من الكتابه و من الموضوع باكمله بسبب التعليقات المحبطه و احيانا كتير بفكر جديا انى ازيل كل الروايات و اتوقف عن الكتابه لكن بتراجع بسبب تشجيع الفانز بتوعى و انا فعلا بكون مبسوطه جدا بتعليقاتكم و غالبا برد عليها كلها لانى بحب التفاعل و ده بيكون دليل انكم عايشين احداث الروايه بمشاعركم يعنى لما بلاقى حد بيشتم فى شخصيات الروايه بسبب مواقفهم ده بيحسسنى انكم عايشين الاحداث و متأثرين بيها و كل اللى بيكون مطلوب من القارئ انه يقيم بدون تجريح )

5/ و اخر حاجه ان تطبيق دريمى للاسف بيطلب مننا ككتاب ازاله الروايه من على الواتباد و الفيس بوك عشان تكون حصرى ليهم و الا لو صممت على النشر الغير حصرى حيكون المقابل المادى رمزى

فانا قدامى حلين و حسيبكم تختارو منهم لانى مش حابه حد يزعل منى

الحل الاول / انى اسيب الروايات زى ما هى واتباد و فيس بوك و انزلها على دريمى و اقبل بالمقابل الرمزى و ده حيكون ارضاءا ليكم 😳

الحل التانى / انى اقبل بازاله الروايات من على الواتباد و الفيس بوك بس اكيد حعمل حاجه للقراء بتوعى فى المقابل و هى انى حعمل تعديل فى الروايات للاحداث و طريقه السرد و الافكار اللى كنت مختصرها عشان الروايه متكونش كبيره اوى و غالبا ده حعمله قبل ازاله الروايه و اكيد حتيح الفرصه لكم انكم تقروها تانى قبل ما اشيلها

و فى حاجه كمان و هى الروايات اللى بتكلم عنها احببت طريدتى و لاجلك نبض قلبى و اقتحمت جنتى و برده عشان محدش يزعل النوڤيلا و الحلقات الخاصه للروايتين اللى كنت ناويه افاجئكم بيها حنزلها فى الواتباد و الفيس فى ملف جديد و مش ححذفهم

انا زى ما عودتكم دايما انى باخد رايكم فى كل حاجه و برده ححترم رايكم فى الموضوع ده فارجو الرد و شكرا جزيلا ليكم

مع حبى
زعيمه مافيا الروايات😉
اسماء عادل المصرى