_متفتكرش ان شوية الحاجات اللي بتدخل في قلبي دي هتخليني انسي منة بتاعت الساحل
_او شرين بتاعت الجونة
_و بعدين يا أخي انت ليه نشاطك كله بيكون في البحار فاكر نفسك قـُبطان ولا ايه يا يوسف
_يلا خد الحاجات دي وامشي من هنا اطلع بيهم علي اي مكان
_يعني أمشي بجد! يعني مش عاوزة الشيكولاته اللي بتحبيها ده انا جايب منها تلاتة
_اوعي تفتكر أني هضعف قدام الشيكولاته
ده انا مضعفتش قدام عنيك الخضرا دي
_طب بمناسبة عيوني الخضرا دي موحشتكيش يا ياسمين
_اه.ايه اكدب يعني؟ وحشتني بس انا لسة فاكرة كل حاجة
__انتِ قلبك اسود بقا
_لا انت اللي قلبك كبير _بس مفيش واحدة غيرك جواه
_ طب ومنة بتاعت الساحل
_دي حاجة ملهاش لزمة كنت اعرفها قبل ما اشوف القمر
_وشرين بتاعت الجونة؟
_دي واحدة هبلة .سمحيني بقا؟!
_انت بجد جايب تلاتة؟
_وانتِ بجد هتسمحيني عشان الشيكولاته!
_والله مش الشكولاته بس اما اشوف الشنطة الأول؟
_تتجوزيني يا ياسمين؟!
_هتجبلي شيكولاته كل يوم!؟
_هجبلك
_هتتفرج معايا علي شركة المرعبين المحدودة و ربانزل و ملكة الجليد و الجاسوسات و سبونج بوب؟
_قولتيلي عنوان منة في الساحل أيه؟
_يوووسف!
_قلب يوسف و روح يوسف. يوسف عشانك يبيع نفسه مش بس يتفرج علي كارتون.
_يعني مش هتحس بملل؟
_لا أصل انتِ هتتفرجي لوحدك عليهم
_وانت؟
_هتفرج عليكي. ها تتجوزيني
_قولتلي بابا قالك الفرح أمتا ؟
_بحبك
_بحبك
.....
مها محمود
