💕أنت قلبي٢💕

الحلقة ٩٥

#انت_قلبي٢
#بوسي_مصطفى
_____________
الحلقة ٩٥

في شقة سيف..
ملك : انا اقعد معاكي هنا و اروح بالليل..
مليكة : يعني يا مامي عايزة تسيبني في الظروف دي؟
ملك : على فكرة أنا اللي بكلمك!
ابتسمت مليكة لـ ملك.
سهر : مليكة يا حبيبتي أنا شيفاكي كويسه اقعد معاكي
طول النهار و اروح ابات في البيت.
مليكة : يعني محدش عايز يبات معايا؟
ملك : دول كلهم كام ساعة بس يا مليكة و هجيلك الصبح
أو مامي على حسب ما تحب.
سهر : حبيبتي جوزك بيرجع تعبان من شغله و محتاج يستريح.
مليكة : خلاص براحتكم.
بتقعد سهر جنب مليكة : عارفه يا حبيبتي إنك زهقانه
علشان الاجازة هتقضيها في البيت بس احنا معاكي
هنا و مش هسيبك غير لما سيف يرجع من الشغل.
ملك : دا أنا هقعد معاكي لما تزهقي مني و تقوليلي روحي.
سهر : هعملكوا حاجه سخنه تشربوها.
ملك : تسلم ايدك يا مامي الجو فعلاً برد النهاردة و محتاج مشروبات سخنه تدفينا..
سهر : حاضر يا حبيبتي.
ملك : تسلم إيدك يا ست الكل.
ابتسمت سهر و دخلت  المطبخ..

مليكة : تعالي هنا بقى قوليلي ايه الحكاية بالظبط؟
ملك : حكاية ايه؟؟
مليكة : عمار ابن عمتك.
ملك : ايوه ماله؟
مليكة : يعني بقى مهتم كده فجأة و بيتصل كتير دا ملفتش نظرك لحاحه؟
ملك : لأ.. و بعدين أنتِ مش مفروض تعبانه ادخلي استريحي يا مليكة.
مليكة : الظاهر إني عندي فراغ فعلاً.
ملك : ثواني بقى علشان مامي بتتصل.
____________

في المستشفى...
علياء بتبكي : أنا واقعه في عرضك يا دكتور خليه يسيبني في حالي.
كريم بتنهيده : طب قومي يا علياء و متعمليش كده تاني.
علياء تقوم من الأرض : اعتبرني بنتك يا دكتور هتقبل عليها كده؟
كريم : لا طبعاً و مين قالك إني هسكت؟!
علياء : أنا مش عايزة  غير إنه يسيبني في حالي حتى البيت عندكم معنتش دخلاه  تاني مش هخرج من بيتنا نهائي.
كريم : مين قالك الكلام دا؟
أنتِ هتيجي و هتقعدي مع ماما و مفيش حاجه هتتغير
و متقلقيش من الموضوع دا أنا هتصرف.
علياء : لأ أنا خايفه اجي عندكم
معلش متزعلش مني يا دكتور بس أنا معنديش حد يوقفله
و اخاف ينفذ تهديده.
كريم : أنا قولتلك متخافيش مش هيقدر يعملك حاجه
و لا انتِ مش واثقه فيه؟
علياء : العفو يا دكتور أنا عارفه إن حضرتك
مبتقصرش علشان كده جيت اشتكيلك من علي.
كريم : بكره تيجي و متفكريش في الموضوع ده اعتبريه منتهي.
علياء : متشكره قوي يا دكتور.
_____________

صديق علي : اشمعنه البنت دي اللي معلقه في دماغك
ما البنات كتير سيبك منها علشان دي هتجيبلك مشاكل و أنت بتقول إنها جايه من طرف ابن عمك.
علي : يا ابني البت دي أنا اعرفها من أيام ما كانت بتدرس
في المدرسة الفنيه اللي قصاد المدرسة اللي بابا شغال فيها.
صديق علي : اوبااا دا من زمان بقى.
علي : ايوه هي في الأول لما شافتني حسيت إنها معجبه بيه حاولت اكلمها عملت فيها إنها مؤدبه و كده و كنت نسيتها بس
لما شوفتها بقى في بيتنا افتكرتها و لما حاولت وكلمتها فكرت اني هتقدملها.
بس أتقدم ايه يا ابني دلوقت و انا لسه بدرس مجنونه دي!
صديق علي : خلاص سيبك منها.
علي : مش عارف أنساها خلاص علقت في دماغي و في نفس الوقت مش هقدر اتقدملها انا عايزها كده معايا لحد
ما ارسي على حل.
صديق علي : يبقى حبيتها
بس ازاي بتحبها و بتفكر تأذيها بالشكل دا؟؟!
بصراحه تفكيرك غريب.
علي : أنا مش هعملها حاجه دا مجرد تهديد بس علشان
تفضل معايا.
صديق علي : ازاي تفضل معاك و تحس بالأمان و انت مهددها بالشكل دا؟
دي ممكن تروح لباباك و تقوله على كل حاجه ووقتها ابوك ممكن يطردك من البيت.
علي : هي اجبن من كده.
صديق علي : بتستغل ضعفها صح؟!
أنا مش معاك في اللي بتفكر فيه
و كده هتفتح على نفسك أبواب مش هتقدر تقفلها ابوك
من ناحية و دا طبعاً اللي معاه المصروف
و ابن عمك اللي هيوقف معاها و هيبقى شكلك وحش قوي قدام الكل سيبك منها لو عايز نصيحتي و برضه براحتك
يا صاحبي.
علي : أنا مروح البيت سلام.
__________