اسكريبتات بقلم اسراء محمد ❤️

اسكربت 10

_ حبيبي عاوزه اخد رايك في حاجه
_ امممم
_ البس بكره الفستان ده ولا ده
_ اي حاجه
_ ما انا محتاره ها ساعدني انهي ده ولا ده
_ يا هنا انا مابفهمش في حاجات البنات دي
_ طيب خلاص ماتزعقش هختار انا
_ ماشي
_ طب بص كده يا سيف  ، انهي تليق اكتر الجزمه دي ولا دي
_ يوووه بقي يا هنا  ،  انا زهقت
_ في ايه سيف انت مش طايقلي كلمه ليه
_ ما انتي كل شوية ده ولا ده  ،  طب اللون ده ولا ده  ،  انا مليش خلق للكلام ده يا هنا
_ خلاص انا غلطانه اني باخد رايك  ،  اديني سكت
_ ماشي
_ بقولك ايه يا حبيبي  ،  عيد ميلاد صحبتي فاضلو يومين فأنا عاوزاك تنزل معايا ننقي هدية ونجيب لبس ليا وليك علشان نروح العيد ميلاد
_ ايه يا هنا في ايه انتي مابتعرفيش تعملي حاجه لوحدك ماتنزلي تشتري الي انتي عاوزاه لوحدك
_ لا بعرف بس انا بحب اشاركك كل حاجه في حياتي  ،  هي دي حاجه تزعلك
_ اه تزعلني اعملي الي تعمليه علشان انا مليش خلق  ،  كل حاجه انزل معايا شوف معايا نقي معايا ايه
_ انا بعمل كده علشان بحبك وبحب اشارك معاك كل حاجه بعملها حتي لو كانت تفهه
_ ما انا كمان بحبك بس انتي عارفه اني مابحبش كده  ،  انا ماشي سلام
_ يا سيف استني بس
_ لا انا مروح

سبني ومشي  ،  انا هنا 22 سنه ومخطوبه لسيف بقالي سنه بس نحب بعض بقالنا 5 سنين ،  وانا بحبو اوي وبحب اشاركو كل حاجه حلوه بعملها حتي لو كانت تفهه  ،  معرفش ليه هو بيضايق  ،  فضلت قاعده سرحانه وبفكر ليه عمل وكده  ،  وبعد شويه روحت البيت  ،  وطلعت تليفوني ورنيت عليه كتير جدا ماردش  ،  فضلت ارن عليه اكتر من عشرين مره وهو ماردش وبعدين التليفون اتقفل ،  استغربت جدا  ،  انا معملتش حاجه لكل ده  ،  صحيت تاني يوم روحت الجامعه ووانا في الطريق لقيتو بيرن عليا  ،  رديت  .

هنا  :  ايوه يا سيف
سيف  :  هستناكي في كافيه.......  بعد الجامعه
هنا باستغراب  : ليه
سيف  : عاوزك في موضوع مهم سلام
هنا باستغراب  : سلام

استغربت طريقتو جدا  ، من امته واحنا بنتقابل بعد الجامعه  ، ديما بيجيلي البيت ونقعد نتكلم لما يكون في موضوع مهم  ، روحت الجامعه ومكنتش مركزه في حاجه كنت بفكر هو عاوزني في ايه  ، خلصت محاضراتي وروحت الكافيه الي قالي عليه لقيتو قاعد مستنيني  ، قعدت قدامو واتكلمت بابتسامه  .

هنا بابتسامه  : ها يا سيدي اديني جيت عاوزني في ايه بقي  ، وبعدين ما انت لما بتكون عاوزني بتجيلي البيت وبنقعد نتكلم في الي احنا ع.......  ، هو انت ماسك الدبله كده ليه

لقيتو ماسك الدبله في ايديو ومش لابسها  ، استغربت جدا اول مره مايكونش لابسها  .

هنا باستغراب  : هو في ايه يا سيف
سيف بتنهيده  : هنا احنا لازم نسيب بعض
هنا  : ايه؟! نسيب بعض وده ليه
سيف  : لاسباب كتير  ، انا استحملت كتير بس خلاص مش قادر اكمل
هنا  : لا ثواني انا عاوزه افهم  ، اسباب ايه دي
سيف  : يا هنا انتي عاوزه حد يعمل معاكي كل حاجه  ، كل حاجه اعملي يا سيف  ، انزل معايا يا سيف  ، ده ولا ده يا سيف  ، لا يا هنا انا مش هستحمل كده انتي مابتعرفيش تعملي حاجه لوحدك يبقي اكيد مش هتعرفي تشيلي مسؤليه بيت وعيال
هنا بصدمه  : لا انا بعرف اعمل لوحدي بس انا بحبك وبحب اشاركك اي حاجه بعملها  ، ده مش معناه اني ضعيفه او مابعرفش اعمل حاجه لوحدي ده علشان بحبك  ، هو انت بتسمي ده عدم مسؤليه
سيف  : اه يا هنا عدم مسؤليه وانا بصراحه عاوز واحده تعتمد علي نفسها وتعرف تشيل بيت
هنا  : لو بتسمي ده عدم مسؤليه تبقي غلطان ده اسمو حب بس تقريبا انت ماتعرفش يعني ايه حب  ، وكملت وهي بتقلع الدبله  : دور علي الي انت عاوزها  ، الي تعتمد علي نفسها وماتزهقكش ولا تقولك انزل معايا وهات معايا  ، دبلتك اهي يا استاذ سيف والي بينا انتهي سلام