#البارون
"كلها تكبر و انتَ چنك غبشة
الله تلالي بعيونك شمس !
كۣۗہرآر آلَعۣۗہرآقۣۗہيۣۗہ🐆.ۦ𓆩“̯🤞😐“̯𓆪.tt
#البارت ٤٤
********
درر
محد بالبيت بس اني وعمتي أمير بقى بسيارته والمرة تفضلت بالاستقبال اني كمت اصفن ذولي شبيهم
قدمت الضيافة والمرة متعجبة بيا وتباوعلي من الطول للطول ومنبهرة
- ما شاء الله ام رفعت بنتج عبالك وردة مفتحه الله يحفظها الج
عمتي ماانتبهت لكلام أم أمير وعبالها تكوللها جنتج لأن متعودبسة الناس تمدحني كدامها
المرة بدأت تسأل بيا شكد عمرج ومن هالسوالف
-: أم رفعت إحنا نسوان ونفتهم على بعض واتمنى الشي الراح اكولج ياه مايضايقج
ام رفعت-: تفضلي خيتي
-: إحنا علاقتنا بيكم جديدة ومو كلش نعرف بعضنا وامير كذلك ومن كاللنا على بنتكم لا هو ولا إحنا نعرف إسمها بس هو شايفها وعاجبته وكال لو هي لو مااتزوج بس الصار مو هالة الي شايفها وعاجبته بنتج الثانية وأتمنى تتفهمين الوضع وأنتم ناس مثقفين وان شاء الله يكون شي عادي
ام رفعت-: جنتي مرت رفعت هاي يمعودة شتحجين إنتي لايسمعج واحد ونشتهر
-:جنتكم!!!؟؟
درر-؛ اي خالة وهو صدك شافني مرة بس جان المفروض تتأكدون مايصير هيج يعني لنفرض هسة رفضتوا هالة شنو ذنبها البنت هم راح تفكر شنو بيا اني ورفضوني ومن غير الرياجيل الي راح يصير بينهم زعل
-: إحنا نعتذر صار سوء فهم وان شاء الله احجي وي أمير وافهمه
راحت المرة وعمتي راسها كام يوجعها انطيتها حبوب دلكته الها مافاد حتى روحتنا للسوك خربت ضلت عمتي تطحن بنفسها من التفكير
درر-: عمه شني سالفتج ماصار شي والولد أمه تحجي وياه ويوافق ويسكت عادي تصير
ام رفعت-: شلون اذا ماوافق
درر-: أي لا يوافق وشنو يعني ضالة عليه
ام رفعت-: ولج راسي راح ينفجر
درر-: اوف
عمتي خافت من المشاكل وخصوصا إذا رفض أمير هالة بعد ماشافها والشي الثاني شلون اذا عرفوا الولد جاي يخطب الجنه واويلي إذا رفعت يعرف
عمتي خابرت ام امير اني يمها افرج برجليها
ام رفعت-: عيني ام امير لا تجيبين طاري لأحد ماناقصين مشاكل
ام امير-: لا حبيبه صدك جذب ماصايرة شني السالفة وان شاء الله الأسبوع الجاي نجي ونخطب بنتكم هالة
جنت أسمع ام امير شتكول وأشوف ملامح عمتي ابتشرت بس من نبرة ام امير حسيت أكو شي غلط لأن مبينه إنسانه مجامله وتلفلف الناس بلسانها أتمنى ماتكون منافقه
سدت الخط منها
درر-: ها ارتاحيتي هسة مو كلتلج كل مشكلة والها حل بس إنتي دخيل بختج بسرعه تتوترين
ام رفعت-: حقي اتوتر غير بنتي باجر ان شاء الله من تصير عندج بنية راح تشوفين اللوعه مالتي من كل شي تكومين تخافين عليها
درر-: اوف يعمه يابنيه
ام رفعت-: لاتفقدين الأمل ربج كريم إنتي اقري هذا الدعاء واستمري عليه
درر-: ونعم بالله العلي القدير
عمتي ركبت الغدا واني ساعدتها اجه عمي ومحمد وزينب من الزيارة
انتظرنا هالة ورفعت على مااجو مدينا السفرة تغدينا
وبكعدة شرب الجاي عمي موبايله دك
أبو أمير خابره علمود يحددون موعد الخطوبة
ومستعجلين
ابو رفعت-: يابة ترا الجماعه خابروني ومستعجلين ويريدون راي البنية
هالة جانت كاعدة وتكرص بامها تكوللها كوليله موافقه
ام رفعت-: هالة عدها إمتحانات وخاف يصير عليها ضغط
هالة-: لا ماكو إمتحانات منو كال
عمتي حجت وياها بهمس
ام رفعت-: اثكلي عيب امشي لغرفتج خليني احجي وي ابوج
للعصر بعد ما بيها مجال بهاليومين تصير الخطوبة
عمتي كالتلي خلنروح للسوك هسة لأن باجر مانلحك
رحت اني وعمتي وهالة حتى نشتريلها كم شغلة
وشلعت كلبنا مايعجبها العجب ومناه ذوقها موحلو كل شي أحمر تختار وهم الناس ذواقه وعلى أي شي يعيبون
بين مانفتر شفت غيداء وأمها يم محلات البدلات رف كلبي تبقى غيداء صديقه طفولتي ومن شفتها يم البدلات هي وأمها عرفت إنها راح تتزوج ضليت اباوع من بعيد لحد ماهي شافتني وابتسمت
أجت عليا هي وأمها شايلة خشمها
كبل حضنتني وكامت تبجي
غيداء-: لج مشتاقتلج وين رحتي شلونج شنو صار وياج وين عايشه هسة
أهل المحلات كلهم يباوعون عليها شلون تبجي أمها تباوعلي صفح عمتي وهالة صافنات مايدرن شني السالفه
درر-: اني بخير إنتي شلونج
غيداء-: اني زينه انتي سولفيلي من طلعتي من بيتنا شصار وياج احجي
درر-: صار كل الخير الله مايعوف عبده الحمد لله على كل حال
سلمت على ام غيداء وهي بس انطتني خدها ميخالف هي مرة جبيرة واحترامها واجب بست راسها
درر-: شلونج خالة شخبارج ان شاء الله بخير طمنيني عن صحتج
ام غيداء-: زينه يلا غيداء مافضيتيها
عرفت غيداء على عمتي وهالة سلمت عليهن وام غيداء غلست
ام غيداء-: ولج فضيها عاد تأخرنا
غيداء-: فدوة يمه بس شوي درر بعد كم يوم زواجي ماتكدرين تجين
درر-: عبالي تزوجتي ورى مارحت
غيداء-: لا صارت ضروف مات الهم واحد واجلوا كل شي
درر-: ان شاء الله خير
غيداء-: هذا رقمي الجديد اتواصل وياج امانه درر تعالي للعرس والله العظيم مشتاقتلج وعندي هواي حجي وياج
درر-: اعذريني مااكدر
غيداء-: ليش
درر-: البيت الي انطردت منه وانذليت وشبعت إهانات شلون بعد أدخله
غيداء-: حقج علينا
درر-: يلا إحنا نترخص والف مبروك شايفه كل الخير
غيداء-: لحظه بس انطيني رقمج
انطيتها رقمي ماحبيت افشلها أكثر بس هي لحت على جيتي لعرسها وأمها مبينه ذيج هي معاجبها الوضع
ام غيداء-: أي دكافي مو جاي تكولج مااكدر اجي ماعندج كرامه إنتي عبالك العرس واكف عليها
هزيت أيدي بعدها مامتغيرة الحمد والشكر
رجعنا للبيت عمتي سألتني على غيداء وأمها
درر-: عمه ذولي جيرانا والبنية هاي جانت صديقتي من الصغر بس كلها تغيرت للأسف
ام رفعت-: ولا يهمج خيولن قابل عيشتج يمهن
درر-: ياريت بس هي الحجت عني الناس كلها واقربهم عمه اني الهم بقلبي جبير وترا الحجي بعده لحد الان مأثر على حياتي وشوفه عينج رفعت ماطايقني
ام رفعت-: خايبة شبيج رفعت يحبج ويموت عليج وين اكو رجال يتزوج وماينام وي مرته ترا رفعت بعده ماطاخ زينب
درر-: شنو!!؟
ام رفعت-: يحبج ويغار عليج حتى من أبوه ماتشوفين نظراته عود صارلج سنتين وياه وبعده هو هو ماتغير
من يباوعلج يريد ياكلج بعيونه عبالك ذاك اليوم متزوجج وبعده مشابع منج شوف اني إبني واعرفه لايغرج غروره وعصبيته وكل شي مع الوقت ينحل بس توكلي على الله
درر-: صدك عمه رفعت يحبني
ام رفعت-: هههه يعشكج وانت المفروض تعرفين
فرحت بكلام عمتي ارتاحيت
صار اليل طلعت اغراضي الاشتريتهن مكياج وعطور وسيتات نوم مرتبة
جربتهن كلهن بس حبيت واحد كلش كلت اخلي مكياج واشوفه بالمرايا
هههه طلعت صاكه
فجأه دخلت هالة للغرفه اثاريني ناسية الباب مفتوح
بسرعه لفيت الخاولي على جسمي
هالة-: بعد وقت من هسة تريدين مجهزة نفسج ماتشبعين ليل ونهار بس هنة الاحم احم كلهن هيج
درر-: لو عندج ذرة خجل ومستحى جان مادخلتي هيج بدون ماتدكين الباب وشي ثاني اني أول مرة اشوف بنية بيت تراقب مرة أخوها منين تعرفين ليل ونهار وشنو حظرتج تحاسبيني مرة متزوجه اني مو بنت ملهى وتحجين بهاي الفاظج الخايسة
هالة-: هيهي منين أعرف ليل ونهار تسبحين وين درر تسبح المسعدة ماتمل
درر-: يعني اني متزوجه واستحي من كلامج إنتي شلون تحجين هيج ماادري
هالة-: عوووع مقرفه
درر-: مشكورة ممكن تطلعين من الغرفه
هالة-: ماجاية لوجهج الزفر شايفه روحها ملكه جمال خلف الله على أخوي مدري شبيه حباج وعاف بنات الخلق راح يركض عليج الله اعلم شمسويتله شمشربته
درر-: اففف أستغفر الله تاليها وياج إنتي شتريدين
هالة-: ملابسي الداخلية الي اشتريتها من السوك ماكو طلعيهن
درر-: لا بشرفج واني مدريني بملابسج الزفتية شسويلج إذا إنتي مسربته كلنا تسوكنا وكلمن علاكتها وغراضها بيدها إنتي شبيج خوثه
هالة-: انجبي لج لا اكوم اسحلج سحل
درر-: تسحلينمن ولج ترا والله إذا الشر طب براسي محد يفكج مني
هالة-: شحدج غير ادفنج دفن
درر-: دتعاي
من شعرها لزمتها مطلتها بالكاع طكت روحي ومن صرخت سديت حلكها
درر-: عيديها بعد أدب سز يلا ولي من الغرفه باجر تفضحينا كدام الناس مال زواج إنتي أصلا راح نجازف والله أعلم كمية المسبة والشتايم الراح تجينا من وراج
غبيه
بقت تخوزر بعيونها شكد صلفه
طردتها من الغرفه ولو تروح لأكبر واحد محد يهتم بكلامها يعرفونها جذابة همزين لهذا ماخذة راحتي ومأدبتها
كفشت شعري هالة
دخل رفعت شافني كفشتي وحمرتي ملطخه كام يضحك أريده يسكت ماكو
درر-: تضحك على حظي عود فرحت بنفسي وتمكيجت ماصارت عليا
رفعت-: هههه شموازيج مامحتاجه مكياج ترا
فرحت من كالي هيج هو مثل الي تردد بكلامه وكأنه كال شي مايريد يكوله
كعد عالجرباية ودار ظهره عليا يلعب بموبايله
اني اجيت حضنته من ظهره هو كمز
درر-: أحبك
بقى ساكت بس مابعدني عنه
وخرت منه
درر-: محتاج شي حنام
رفعت-: لا
تمدد هو هم يريد ينام من وقت اليوم
اني كمت طفيت الاضوية
بسته براسه وبخده
درر-: بعد ماكو داعي انتظرك لحد ماتنام عرفت سري
رفعت-: ليش تسوين هيج
درر-: ماينرادلها سؤال طبعا لأن زوجي وحبيبي
سكت وبقى يباوعلي
من التعب بسرعه غفيت
بنص اليل صوت طلق ناري وكلاب تنبح سيارات ياستار ياربي
كعدت رفعت كال هسة اجي أشوف شكو اني كلبي يدك معدتي وجعتني من الخوف
عيالي كلهم كعدوا ورى ربع ساعة أقل رجع رفعت كال عركه صايرة جبيرة بين عشيرتين ومايقبلون أحد يتدخل
اني بقلبي كلتله همزين طردوك
رجعت نمت بس مامرتاحه بنومتي
تحلمت كابوس مرعب أهلي الله يرحمهم وضياء
بالرؤيا من شفت ضياء شكله قبيح ومكلوب وحش انفزعت كعدت مرعوبة أصرخ بهستيريا
رفعت-: شبيج درر
حاطه ايديا على وجهي وابجي عمي وعمتي واكفين بالباب يصيحون شكو رفعت كاللهم ماكو شي
حاول يحجي وياي يهدأني اني بالي مويمه أصلا
كعدني على رجليه مثل الطفل وغسل وجهي وشربني مي شوي هدأت
بقى يقرأ آيات بصوت ناصي
اني مثل الدخت من كد ماصرخت راحت طاقتي وصوتي صار مبحوح
تالي هدأت بس دموعي على خدودي وحاضنه رفعت هو مستغرب
رفعت-: شبيج بشنو حلمتي
وماكدرت اكوله ضياء
عيوني ذبلهن البجي وكمت اغفي
رفعت-: احجي اي شي
درر-: أنت هم راح تتركني مثل بابا؟
رفعت-: لا لاتفكرين بهالامور خلص نامي وارتاحي كان مجرد كابوس مزعج بسبب المشكلة الصارت
صرت مثل الطفل اتنحست ماانام
رفعت-: شلون ماراح ننام اليوم صارت بثلاثه الفجر
تمددي اني يمج قابل وين أروح بهاليل للمريخ
اتكأ على مخدتين وكال امري الله
واني مثل الجاهل المجلب بثياب أمه لازمه ياخه رفعت بثنين ايديا
رفعت-: جاي اتعارك وياي إنتي لازمتني من ياختي
وخرت ايدية
ومخليتها عالصامت ماحجيت اي شي
بقى وياي لحد مانمت
الصبح صوت العصافير مثل الرنه أسمعه
فتحت عيوني
واشوف نفسي محاوطه ركبه الولد باثنين ايديا همزين ماخانكته ورجلي على بطنه
الله أعلم كم ركلة جزاء سويت واني نايمه
مشبعته دفرات
كعدت قبله
أول ما طلعت شفت عمتي باقية بقلق عليا
وكالتلي اجوج خطار !!
*******
رفعت
بعد مااحترق بيت منتظر والظروف إلي صارت
علاقتي بزينب معدومه ولأن مشتاقه لاخوها تنام يمه وهو يعرف اني عاقد عليها بس متجاهل هالموضوع
وهي حالها من حاله وراد يفاتحني بموضوع بس بعد صارت وتأجل كل شي
وبقى محمد وأجل سفرته لمصر
علاقتي بدرر استمرت رغم الكره والحقد وكل تصرفاتي وياها بس مخافه الله بيها لأن يتيمه ماعندي إستعداد أحاول أنسى الي سوته بية وإذا احترمه فهذا بس لأن أخلاقي ماتسمحلي اتجاوز على انسانه تحترمني وتهتم بية هذآ الشي مااكدر انكره إلها تهتم بية كأنما أبنها الوحيد وجايبته بنذور وتعب مرات اصفن واحير بتفكيري شلون وحده هيج تهتم بأدق التفاصيل اني امي مامدللتني هيج
خلتني أستسلم مااكدر اسويلها شي مثل المخدر
طريقتها بالعناية مميز لدرجه صرت مااعرف اسوي اي شي الا هي تسويلياه وحتى الأكل إلا من ايدها
بس رغم كل شي اني ماناسي عملتها وخطأها الكبير والنار بقلبي مثل ماهي مو هينه أبد
رحت لشغلي وهناك صادفني الدكتور محمد وزوجته
بعد السلام
زوجته كالتلي محتاجتك بموضوع مهم
رفعت-: تفضلي أختي ان شاء الله اكدر اساعدج
مرام-: درر
رفعت-: شبيها
مرام-: أريد رقمها أتواصل وياها البارحه أختي الي هي زوجه زيدان اتصلت بية وكالتلي بلكي اكدر أحصل رقمها
رفعت-: بصراحه مافهمت ليش يعني شنو الهدف من هذا التواصل إنتي تعرفين بالمشاكل الي بينها وبين بيت عمها
مرام-: بس تبقى بنت عمهم والي صار صار هذا أمر الله
أختي تأثرت بحالة درر كلش ومن سمعت بالمشاكل الي صارت وياها تناقشت وي زيدان نقاش حاد وزعلت فترة طويلة عند أهلي وبصراحه زوجه أبوي ماحبت تسكت عن موضوع درر لأن الكل يعرفها ويعرف أخلاقها وخابرتني واتفقنا نروح كلنا وويانا بابا وزوجي نحجي وي زيدان مايصير يقطع علاقته ببنت عمه هي مالها ذنب وادري راح تشوف هذا تدخل مومنطقي وقد تكون مشاكل عائلية إحنا مالنا دخل بيها بس تبقى الإنسانية موجودة ودرر مو غريبة علينا بيناتنا زاد وملح مايصير نعوفها هيج وأعرف أنت مامقصر ولا أهلك جزاكم الله ألف خير بس تبقى البنت عينها على أهلها
رفعت-: كلامج صحيح يعني تالي حجيكم وي زيدان جاب نتيجه لو بقى معند وحاقد
مرام-: بصراحه بالبداية كان متشدد وماقبل بأي نقاش بهذا الموضوع بس أختي كالتله إذا هيج اني اعوفلك البيت واطلع ووصلتله فكرة إنه احتمال حتى بنتها تتعرض لنفس الشي الي تعرضتله درر ومااتريد تحس بأي تأنيب ضمير هو تقريباً اقتنع وكال راح ينطي حصة درر من مال وأملاك أبوها الله يرحمه وبس
رفعت-: اها بصراحه درر هم ذكرتلي هيج موضوع
مرام-: ومو بس هيج احتمال حتى بأملاك عمها راح تحصل قسم من الورث لأنه مسجل لكل واحد حصه من املاكه ومن بينهم درر أعرف راح تنصدم بس هذي الحقيقه وزيدان بنفسه كال وهو مستعد ينطيها كل اموالها لأن الرجال حقاني وآخر همه الفلوس
...يتبع
