💕أنت قلبي٢💕

الحلقة ١٠٧

#انت_قلبي٢
#بوسي_مصطفى
_______________
(الحلقة ١٠٧) على الواتباد

في فيلا آسر..
تحت قدام المكتب..
ملك تنظر لأعلى تتأكد إن مفيش حد من البيت شايفها.. تدخل المكتب و هي بتتلفت حولها.
ملك : أنا متأكدة إن بابي بيكون شايل أي فلوس هنا حتى لو لاقيت حاجه ممكن تتباع مفيش مشكلة.. بتدور ملك و بعد كده بتوقف تفكر.
ملك : أنا عارفه إن اللي بعمله دا غلط الأفضل اقول لبابي هو مستحيل يرفض إنه يساعد مامي بس المشكلة إن مامي رافضه مساعدة بابي يمكن علشان كرامتها مش سامحه بـ ده
و إنهم زعلانين مع بعض بس أنا كده حتى لو بابي مكتشفش سرقتي ليه أنا قدام نفسي هكون خجلانه قوي من اللي بعمله غير إن دا حرام اصلا مش عارفه أعمل إيه مامي تعبانه و لو مساعدتهاش ضميري هيأنبني..
بتفتح الدرج مرة تانية و بتدور لاقيت مبلغ بسيط اخدته و بتدور تاني.
آسر : بتعملي ايه يا ملك عندك؟!
رفعت رأسها بقلق و ارتباك و خوف..... بابي أنا!!!
آسر : انتي ايه اللي مصحيكي لحد دلوقت؟!
ملك : مجليش نوم قولت اتمشى في الجنينة و بعدين....
آسر : و بعدين ايه؟؟
ملك : لاقيت الفلوس دي هنا.
آسر : فلوس ايه؟!
ملك : لاقيتهم هنا.
آسر اخد الفلوس ووضعهم على المكتب و قفل النور و هو مش فاهم ايه اللي ملك عايزة تقوله بالظبط لكن كان تعبان و حاول يعدي الموقف.
آسر : طب يلا يا حبيبتي اطلعي علشان تنامي.
ملك بسرعة خرجت : حاضر يا بابي تصبح على خير.
قبلت جبينه و صعدت السُلم سريعاً).

____________
في شقة والد كريم..
فريدة تدخل غرفة سميرة و تقدم القهوة لكريم و علاء و تخرج.
ندى : تعالي يا فريدة اقعدي.
فريدة : تشربوا قهوة و لا شاي؟
شهد : و لا دا و لا دا بس شوفي ندى يمكن تكون عايزة.
ندى : لا مليش مزاج اشرب حاجه خليها للصبح بقى.
شهد : بتعملي ريجيم يا ندى؟
ندى : لأ ريجيم ايه و بعدين أنا كويسه كده مش محتاجه يعني.
شهد : على كده فريدة بقى اللى محتاجه؟! ما هي أقل منك في الوزن و بتعمل ريجيم عادي.
ندى : عادي يعني كل واحد حر هي شايفه إنها مش راضيه على وزنها كده براحتها بس أنا راضيه عادي و حازم يعني مش بيعلق على الحاجات دي.
شهد : ايه دا يعني دكتور كريم بيعلق على وزنك يا فريدة؟؟
ندى : ايه علامات الدهشه اللي على وشك دي و بعدين انا بتكلم عن نفسي متكلمتش خالص عن فريدة و لا جيبت سيرة كريم ابن عمي اصلا..
فريدة : لا كريم مبيعلقش و لا حاجه بالعكس و بعدين مش دي المواضيع اللي بنتكلم فيها في الظروف دي.
شهد : امال هنتكلم في ايه ادينا بندردش... صحيح يا فريدة باباكي متوفي بقاله كتير..
فريدة : اه..
ندى : ايه المناسبة يعني؟!
شهد : لأ عادي بس افتكرت يوم وفاته و كلام كتير كده وقتها.
فريدة : كلام ايه؟؟
شهد : كلام إن باباكي مات بسبب
المشاكل اللي كانت حاصله بينه و بين عمو حلمي علشان انفصلتي عن دكتور كريم و كمان صممتي تتجوزي و هو مكانش راضي عن الجوازه دي.
ندى : مين اللي قال كده؟! 1 عمي كان موافق.
شهد : ازاي بقى دول قالوا وقتها إن الاستاذ عماد مات غضبان على بنته بسبب المشاكل اللي كانت بينها و بين ابن عمها و مستحملش و طلقلك فباباكي تعب وقتها و مات بعدها على طول دا الكلام اللي سمعناه مقولتش حاجه من عندي.
ندى : ياريت تسمعي نصيحتي دي متديش ودنك لحد الناس بتدخل في اللي ملهاش ليه و بتألف و هي قاعدة.
شهد تنادي : علاء هتبات عندك؟
علاء : ايوه.
شهد : طيب تصبحو على الخير أنا هطلع انام بقى.
و تطلع شهد شقتها.
ندى : انتي سكتي ليه و مردتيش عليها؟!
فريدة : ارد اقول ايه بس يا ندى انتي شايفه الظروف عامله ازاي و دي بتفتح في مواضيع مش وقتها خالص و لا انا فايقه اصلا علشان ارد عليها.
ندى : سكوتك هيخليها تصدق فعلاً إن الكلام اللي تقال دا حقيقي.
فريدة : معرفش جابت الكلام دا منين و ايه لازمته اصلا دلوقت؟!
_________