طيب حأوريكم الشخصيات الأساسية :-
إيمان : بنت سمحة شديد شديد لونها قمحي وعندها غمازتين وعيونها زي ما بقولو "فنجانا قهوة" شعرها اسود شديد وطويل ما شاء الله وغالبا بتلفو كعكة "عشان ما يسحروهو ليها😉".. بتقرا علم نفس في جامعة النيلين وفي سنة تالتة ومع الزمن حتعرفو عنها اكتر 😁
فارس : أطيب قلب ممكن يقابلك.. راجل بمعنى الكلمة وما بغلط على زول.. اسمر وبلبس نظارات "احسن زاتو عشان يخبي جمال عيونو العسليات 😉".. حواحبو غزيرة وعندو لحية زايدة جمالو الهادي الرزين.. بقرا طب أسنان في جامعة الخرطوم وفي سنة خامسة
نفيسة : اخت فارس الصغيرة.. زولة حبوبة شديد وبتحب تساعد الناس وطيبة زي اخوها..سمراء وعيونها كحيلة ومحجبة.. عندها مشكلة في اسنانها وكتير في ناس بتضحك عليها لمن تبتسم بس ما بتشتغل بيهم .. بتقرا علم نفس في جامعة النيلين وفي سنة تالتة" يعني في نفس كلية إيمان 😘"
تمنة (محمد) : دا اخو فارس الكبير عمرو 24 سنة وما عندو شهادة ولايص ساي لا شغلة لا مشغلة.. اناني وبحب نفسو شديد وعكس اخوانو الاتنين.. اسمر طويل وملامحو قاسية وعصبي شديد
مجاهد : صاحب فارس وقاموا سوا من صغار.. زول ظريف واخلاقو رفيعة شديد..لونو فاتح وشعرو ناعم واسود وملامحو متناسقة وجميلة.. بقرا صيدلة في جامعة النيلين
بسم الله نبدأ.. الرجاء ربط الأحزمة والاستعداد للانطلاق ✈️
.
.
.
"في كفتريا الجامعة"
إيمان : اسمعني يا احمد الليلة ما حأقدر اطلع معاك بعدين.. أحمد : وليه ان شاء الله ما بتقدري عندك راجل ولا شفع.. إيمان : ما افتكر واجب ابرر ليك انا حبيت اوريك بس.. أحمد : حتطلعي معاي وغصبا عنك فاهمة ولا ما فاهمة.. إيمان : أحمد احترم نفسك عشان ما.. أحمد : عشان ما شنو اها قولي لي.. وبعدين انتي منو عشان تتكلمي عن الاحترام الظاهر نسيتي نفسك يا رخيصة!.. "إيمان قامت وأدت أحمد كف قدام الناس كلها..أحمد بقا بكورك فيها ورفع يدو عشان يضربها بس هي مسكت يدو ولوتها ليهو".. إيمان : ابقى راجل تاني وارفع اليد دي علي او على ااي وحدة تانية من البنات .. وحدة من البنات : شكراً ليك بس نحن ما محتاجين وحدة زيك تدافع عننا.. إيمان : افتكر قلت "بنات" يعني انتي ما ضمن القائمة.." إيمان فكت يد الولد وشالت حاجاتها ومشت سريع من الكافتريا ولمن تزعل ما بتكون شايفة القدامها لحدي ما اتخبطت مع ولد وحاجاتها كلها وقعت.. الولد دنقر ورفع ليها حاجاتها واعتزر مع انو هي الغلطانة.. ردت ليهو : ماف مشكلة ومشت طوالي".." نفيسة شافت الحصل ومشت على الولد وقالت ليهو ".. نفيسة : كيفك يا فارس كويس والله الليلة جيتني بدري عشان تعبااانة ودايرة ارجع البيت سريع والمفروض ابدا قراية خلاص عشان الامتحانات قرربت" فارس ما سمع كلام اختو وقال ليها "...فارس : البت دي بتقرا معاك في نفس الكلية؟.. نفيسة : قصدك البت الخبطتك حسي؟.. فارس : ااي.. شفت الشيتات حقتها زي شيتاتك بس اول مرة اشوفها في كليتك.. نفيسة : ااي بتقرا معاي.. داير بيها شنو انت ارح نمشي البيت سريع عليك الله.. فارس : حاضر يا نفوس..." بعد رجعوا البيت".. فارس : أنا تعبان شديد وماشي ارتاح شوية وانتي زاتك امشي نومي وما تمسكي التلفون حسي سامعة الكلام دا.. نفيسة وهي بتضحك : إن شاء الله 😂.. "فارس نام ونفيسة كانت تعبانة بس برضو مسكت التلفون لحدي ما سمعت صوت كواريك وقامت جارية وصحت فارس من النوم" نفيسة : فارس.. قوم يا فارس سامعة صوت كواريك برا واكيد دا تمنة 😭.. فارس قام ومسح دموعو اختو وقال ليها : ما تخافي يا اختي.. عارفة اخوك بتاع مشاكل ودي ما اول مرة تحصل مشكلة في الحي بس ان شاء الله حاحل المشكلة دي وادعي بس ربنا يهديهو وتاني ما اشوف الدموع دي في عينك سامعة الكلام دا .. نفيسة : حاضر ان شاء الله ربنا يهديهو.. " فارس قام وغسل وشو واستهدى بالله ومرق.. تمنة وهو بكورك وجاايط وبحاول يضرب في الولد المتشاكل معاهو وناس الحي حاجزين بينتاهم".. فارس : تمنة اهدا عليك الله واتكلم براحة ووريني الحاصل شنو.. تمنة لسسة بكورك : ود الحرام دا دينتو قروش من شهر ولسسة ما رجعها لي.. الولد : قلت ليك حارجعها ليك ياخ حأرجعها..فارس بقا بكورك في الولد وبقول ليهو : ماف حاجة اسمها حأرجعها ياخ.. رجعها حسي دي" فارس ساق الولد بعيد وسالو الدين كم ولمن الولد وراهو شال نفس طويل وقال ليهو.. يتبع
