"فارس ساق الولد بعيد وسالو الدين كم ولمن الولد وراهو شال نفس طويل وقال ليهو"..فارس : هاك دي القروش امشي أديها ل تمنة وانت ساكت وأوول ما تلقى قروش رجعها لي طوالي عليك الله عشان انت عارف الظروف واوعك تدين منو تاني فاهم.. الولد : انت ملاك ما زي البشر 🙆♂️.. فارس وهو بضحك : دا وقت غناء حسي.. امشي خلينا نخلص من القصة دي عليك الله.." فارس مشى وكورك في تمنة : مشاكلك حلها براك انا ماشي انوم..بعد فارس مشى الولد أدى القروش ل تمنة والموضوع انتهى.. تمنة مشى دخل البيت وقال ل فارس".. تمنة : صح اني مرات ما بعرف اتصرف بس دا ما بيعني اني غبي.. فارس : حاشاك.. دا منو القال ليك انت غبي.. تمنة : انت يا فارس انت.. فارس : ليه بتقول كدا يا تمنة.. تمنة : عارف انك الأديت الولد القروش الرجعها لي.. شكلك نسيت اني كنت بقرا علم نفس يا ذكي.. فارس اتصدم وسكت مسافة وقال : لو قللت من عصبيتك دي شوية كانت أمورنا حتكون احسن من العايشنو حسي.. تمنة : أنا ذنبي شنو لو الأستاذ ود حرام وسقطتني بدون سبب.. وما تقعد كل مرة تعيد لي الموضوع دا عليك الله.. فارس : لالا حأعيدو.. اتخيل لو ما ضربت الأستاذ كنت حتكون وين حسي.. زول اتزاع في الشهادة ودخل جامعة الخرطوم وحسي ما عندو شهادة وحايم و من مشكلة ل مشكلة بس.. تمنة : دا قدري كدا وانا راضي بيهو.. فارس : عيني في عينك.. راضي بيهو؟ راضي بوضعنا دا؟!.. بعد أمي وابوي اتوفو المسؤولية كلها بقت فوق راسنا نحن وانت ما قاعد تساعدني يا تمنة..كل مرة طالع لينا بمشكلة جديدة وهم جديد.. تمنة : حقك علي يا اخوي.. بوعدك اني حتغير.. فارس : ليك تلاتة سنين بتقول في الكلام دا.. ربنا يهديك يا اخوي.. تمنة : ااي ادعي لي ادعي لي كتير عليك الله.. فارس : خليك قاعد مع نفيسة انا ماشي اشتغل عشان ارجع بدري وابدا قراية.. تمنة : خليني اشتغل معاك طيب.. فارس : عشان تحصل مشكلة زي المرة الفاتت ويطردوني مش.. تمنة دنقر وشو وقال : ما عارف اقول ليك شنو والله.. خلاص يا زول اتوكل وقوم.... "مجاهد اتصل على فارس".. مجاهد : فارس كيفك.. مالك ما انتظروني اخلص ونرجع كلنا سوا.. فارس :معليش والله يا مجاهد نفيسة قالت تعبانة شديد وعايزة ترجع سريع.. مجاهد : ورجعتو بالمواصلات مش.. فارس : ااي طبعا.. مجاهد : في السخانة دي!!.. انت مالك بتحسسني دايما اني ما صاحبك.. فارس : ليه بتقول الكلام دا يا مجاهد.. مجاهد : عشان كل ما احاول اساعدك انت بترفض وتتهابل.. لو وريتني انو نفيسة تعبانة كنت اتصلت على السواق عشان يرجعكم.. فارس : ما بتقصر يا مجاهد.. بس ما مستاهلة والله.. مجاهد : عرفت ليه قلت ليك بتحسسني ما صحبك...فارس : يلا بالإذن حسي ماشي اشتغل.. مجاهد : ربنا يعينك يا فارس..يلا مع السلامة فارس : اللهم آمين.. مع السلامة
نقيف شوية عشان افهمكم الحاصل 😁
نبدأ ب فارس.. شاطر شديد واتزاع في الشهادة ودخل طب جامعة الخرطوم بنسبتو.. أمو وابو اتوفو في حادث من قبل 10 سنين وابوهو كان زول بسيط عندو دكان وبعد ما اتوفى اخوانو باعو الدكان يعني ما فضل شي كدا يتقال عليهو لأولادو.. وفارس من صغير معتمد على نفسو وماف حاجة ما اشتغلها.. غسل عربات واشتغل كمساري وباع طعمية واشتغل عتال واخيرا حاليا استقر في شغل واحد واشتغل "جرسون" في واحد من المطاعم والقروش البتجيهو بصرفها على البيت وعلى جامعة اختو عشان هي ما دخلت ب نسبتها زيو..
تمنة : برضو شاطر شديد وكان بقرا علم نفس في جامعة الخرطوم بس للاسف في آخر سنة ليهو حصلت ليهو مشكلة مع استاذ واتطرد من الجامعة ومن اليوم داك مرات يشتغل ومرات يحوم بس.. وماف شغل اشتغل فيهو وما عمل مشكلة..
مجاهد : غنيان شديد وابوهو عندو شركات وأملاك ما بتتحسب ما شاء الله بس برضو بحب يعتمد على نفسو وعايز يكمل قراية ويبني نفسو بنفسو
"في المطعم الشغال فيهو فارس"
ملاذ : يا جرسون لو سمحت تعال.. "الجرسون كان فارس".. فارس : نعم اتفضلي.. ملاذ : حاسة اني شفتك في حتة ولا ما كدا يا شباب.. وحدة من المعاها : كلامك صح والله..يا ربي شايفنو وين وين.. ولد تاني : بطلو غلاظة واطلبوا شي ناكلو انا جعان شديد.. ملاذ : اهااا اتزكرت.. انت بتقرا معانا في الكلية مش.. طب جامعة الخرطوم.. فارس : ايوة.. ملاذ : بتقرا في الخرطوم وشغال هنا!.. فارس : مرات الظروف بتجبرنا نعمل المستحيلات.. ملاذ : خلاص خلاص بطل فلسفة انا جعانة "قالت الطلبات العايزنها ولمن انتهو ختت" بقشيش".. ولمن جات مارقة نادتو وقالت ليهو وهي بتضحك : امشي الحق شيل البقشيش قبل ما يطير منك.." فارس ما عبرها ولا قال ليها بتقولي في شنو مشى شال القروش بدون ما يرد عليها"..
نوريكم ملاذ دي منو 🥴
ملاذ : بت عم مجاهد صاحب فارس.. بت دلوعة و ما بتعرف حاجة اسمها زوق واحترام.. كل همها تعمل العايزاهو بس وبتحب تتسلط على الناس.. يتبع
