"فارس ما قدر يفهم كلام إيمان.. كيف يعني اسأل اخوك؟!!.. مخو بقى بودي ويجيب والطريق كلو بفكر في كلام إيمان وبفكر في حالة تمنة وبربط في الأحداث لحدي ما اتزكر كلام نفيسة لمن سمعت البنات ديلك بنادوا ل إيمان ماما!!... فارس مع نفسو".. فارس : فارس ما تظن في اخوك.. فارس ما تخلي الشيطان يلعب بيك.. بسس!!.. ماف تفسير تاني.. معقولة تفكيري صح!!.. كيف يعني صح.. مستحيل يكون صح.. وليه مستحيل.. ااي شي ظاهر قدامك يا فارس.. شفع بنادوا ل إيمان ماما.. وتمنة بخش في حالة تانية لمن يسمع اسم إيمان.. عندك تفسير تاني للكلام دا؟؟.."فارس وصل البيت ووقف قصاد الباب مسافة.. ما قادر يخش ويسأل تمنة.. وما قادر يرجع ويسأل إيمان!!..".. فارس : فارس لازم تعرف الحقيقة.. لازم تعرف الحقيقة يا فارس.. بس حاخسر تمنة ولا إيمان لمن اعرف الحقيقة؟! .. ولا حاخسرهم الاتنين؟!.. ولا حاخسر نفسي قدامهم؟؟.. فارس خليك شجاع.. فارس افتح الباب دا عشان تقفل باب شكوك!!.." فارس بعد ما لملم كل الشجاعة العندو فتح الباب ولقى تمنة واقف قدامو ومبتسم في وشو.. فارس مع نفسو".. فارس : هل المفروض افرح عشان تمنة اخيرا رجع يبتسم.. ولا المفروض ازعل عشان الليلة حاعرف الحقيقة وقصتي مع إيمان حتنتهي؟!.. ".. تمنة : مالو شكلك غريب كدا.. في شنو يا فارس؟!.. فارس وهو بحاول يبتسم وما يظهر الجواهو : ماف شي مهم.. تعبان بس وداير انوم.. تمنة : أنا عايزة احكي ليك وافضف.." فارس سكت تمنة واتحاشاهو عشان خايف من الحقيقة وخايف من الخسارة!! 💔.. اتمنى انو ما يعرف الحقيقة نهائي وبس يعيش على احلامو الجميلة مع إيمان".. فارس : قلت ليك داير انوم.. تمنة : مالك بتتكلم معاي بالطريقة دي.. قتلت ليك زول وانا ما عارف؟!.. فارس بصوت عالي ومليان حزن : اااااي.. قتلتني وقتلت أحلامي كلها يا تمنة!!.."تمنة حاول يهدي فارس بس كل ما يقرب خطوة منو فارس ببعد خطوتين ".. تمنة : استعدي بالله يا فارس مالك بتعمل كدا يا اخوي؟!.. فارس : بسببك وبسسبها هي!.. تمنة انصدم وبعد مسافة قال ليهو : يعني هي ورتك الحقيقة؟!.. "فارس لمن سمع الجملة دي فقد كل آمالو في احلامو و قلبو اتكسر 💔! ".. فارس : يعني الاستنتاج الاستنتجتو صاح؟!.. الشفع ديلك أولادك انت وإيمان؟!!.. أولادكم بالحلال ولا بالحر.."تمنة أدى فارس كف قبل ما يتم كلامو..!!"..تمنة : انت واعي ل نفسك قاعد تقول في شنو؟؟.. كيف قدرت تظن فينا ظن زي دا يا فارس!!.. فارس بصوت عالي : يعني عايزني افكر كيف لمن اعرف انو في شفع بنادوا ليها ماما ولمن اشوف اخوي بتوتر وحالو بقلب لمن يسمع اسمها!!!!!.. تمنة : كنت فاكرك سند وكنت فاكرك حتفهمني يا فارس.. بس للأسف طلعت غلطان!.. "تمنة طلع الشارع وبقى ماشي دغري وما شايف القدامو.. وبعد مسافة فارس استوعب الحاصل ومشى ورا تمنة وبقى بنده ليهو".. فارس : تمنة يااا تمنة انا آسف.. اقيف شوية واسمعني عليك الله.. "تمنة ما سامع ولا شايف ااي شي وبقى ماشي لحدي ما حصل الحصل!!!!!.. في لحظة واحدة وسريعة تمنة رحل بعيد وخلى ااي شي وراهو!! 💔.. وهو ماشي وقاطع الظلط ضربتو عربية وفارس شايف كل دا قدامو وبقى مصدوم وما قادر يتقدم لحدي ما استوعب الحصل وجرا ومسك اخوهو المليان دم وبقول ليهو جملة واحدة بس..تمنة : إيمان شريفة يا فارس. إيمان شريفة!!.. فارس وهو ببكي وقلبو محرووووق زي الأم الفقدت جناها : اعفي لي يا اخوي..اعفي لي عليك الله 😭!!..
وقفة
الموت ما بعرف صغير ولا كبير.. الموت قدر لازم نتحملو!!.. وأصعب شعور لمن تفقد زول عزيز.. والأصعب لمن تفقدو بعد لحظة غضب خلتك تزعلوا 💔!.. امسكوا في الناس البتحبوهم شديد.. وما تخلوا الشيطان يفرق بينكم مهما يحصل!.. لانو ما معروف آخر مرة نشوفهم فيها متين.. وما معروف متين نحن نرحل..💔!
ميوس💜
"مرت الشهور والحزن لسسة ساكن بيت فارس 💔!.. هم ما خسروا اخوهم بس.. هم خسروا ابوهم وسندهم وعزوتهم!.. خسروا الضحكة وخسروا الفرحة!.."
"نفيسة وقفت على حيلها ومشت غرفة فارس ولقتو راقد في السرير ومقبل وشو على الحيطة.. مشت قعدت جمبو في السرير وقالت ليهو".. نفيسة : نحن لازم نرجع زي زمان..نحن ما قاعدين نعمل شي غير أننا بنزيذ في عذابو.. قوم يا فارس.. قوم وخلينا نعيش الواقع وندعي ل ابونا وأمنا واخونا بالمغفرة والفردوس الأعلى.. قوم وخلينا نعيش قدرنا ونرضى بيهو عشان ربنا يرضى علينا.. قوم يا فارس قوم!!.." فارس قبل على نفيسة وحضنها وبقى ببكي زي الطفل!!..😭".. فارس : بس انا السبب في موتو يا نفيسة.. اكيد حيكون زعلان مني.. اكيد ما حيسامحني.. نفيسة : حرام البتقول فيهو دا يا فارس حرام!!.. مش قلت آخر شي قالو ليك "إيمان شريفة يا فارس".. يعني اتخيل زول قلبو ابيض ل درجة انو دافع عنها قبل ما يدافع عن نفسو وبدل ما يقول ليك انا شريف قال ليك هي شريفة يا فارس.. يعني زول طيب للدرجة دي ما حيكون سامحك لمن شاف دموع اخوهو لآخر مرة!!.. "فارس هدا لمن سمع كلام اختو وحضنها تاني وقام من السرير واتوضى وصلى ركعتين ودعى ل اهلوا الرحلوا!"
فارس : اول شي نعملوا نتصدق ب ملابسو.. نفيسة : دا اخوي فارس البعرفو 💜.. أثناء ما فارس برتب في الملابس لقى رسالة من تمنة. يتبع
