فارس : إيمان كيفك.. "إيمان انصدمت لمن شافتو وردت عليهو وبعد شوية الدموع اتجمعت في عيونها وقالت ليهو".. إيمان : البركة فيكم.. فارس : البركة في الجميع.. "سكتوا مسافة و إيمان سرحانة مع نهر النيل الهادي.. وفارس مراقب وشها البريء والبقول للدنيا : أنا مظلومة!.. وفي لحظة جنون فارس قال ل إيمان".. فارس : يا أيمان!.." إيمان عاينت ليهو وشافت كلام كتييير في عيونو بس هو اختصر كل الكلام دا وقال ليها".. فارس : إيمان.. تقبلي تتزوجيني💜؟!!.. إيمان بتردد : أ أ أنا؟؟؟
فارس : ااي انتي ومافي غيرك دخل قلبي وحبيتو.. إيمان : بس.. فارس : بس شنو يا إيمان.. انتي البت الأخترتها عشان أكمل معاها باقي عمري الجاي 💜.." دنقرت وشها وقالت ليهو والدموع جارية من عيونها".. إيمان : بس انت ما عارف حقيقتي يا فارس.. فارس : أنا عارف حقيقتك أكتر منك يا إيمان.. وانتي زاتك ظالمة نفسك زي ما باقي الناس ظالمنك.. بس صدقيني حبي ليك حب عادل وحقيقي 💜.. إيمان : بس انا ما بستحق الحب دا 💔.. انت بتستحق الأحسن مني يا فارس.. فارس : ولو قلت ليك عايزك انتي وبس وما عايز الأحسن.. دا لو في أحسن منك..إيمان : حأقول ليك انت الحلم الوحيد الاتمنيت انو مااا يتحقق نهائي.. واتمنيت تفضل حلم جميل.. فارس : وانتي الحلم الوحيد الأتمنيتو من أول يوم شفتك فيهو.. ومنتظر توافقي عشان الحلم يبقى حقيقة..وجوابك حيثبت منو الفينا إرادتو أقوى.. حلمك الما عايزاهو يتحقق ولا حلمي الما عايز غيرو يتحقق 💜.. "إيمان جواها... اااي اااي اااي بقبل بقبل بقبل 😭.. ساعدني يا فارس.. ساعدني اتخلص من عذاب الضمير داااا!!!!".. "بعد شوية فارس قال ليها".. فارس : أنا مادي يدي ليك عشان أساعدك تتخلصي من عذاب الضمير الشايفو في عيونك!.. و صدقيني ما حأخليك براك مهما يحصل.. انتي بس اثقي فيني ولو ذرة بس يا إيمان.. إيمان : انت عارف.. سمعت كلام كتير بشبه كلامك بس.. بس دي اول اقرا الكلام دا من عيون زول وأول مرة احس نفسي متطمنة وواثقة ومرتاحة وأول مرة قلبي يدق بالسرعة دي!!.. قلبي دق ليك يا فارس بس والله الدقة دي حتخرب حياتك.. فارس : لي الشرف انو حياتي تتخرب بسبب إيمان السمحة 💜.. يا ايمان والله انتي صوت الفرح الناداني وانا في بير الحزن.. انتي درب الأمل الاتبنى قصاد سكة الألم.. انتي دنيتي وحأصبر عليك لآخر نفس 💜.. إيمان : توعدني تبقى غفراني يا فارس؟.. فارس : بوعدك انو معاي حيكون غفرانك يا ايمان.. اثقي فيني عشان ارجع ليك ثقتك بنفسك.. إيمان : واثقة فيك والله 💜.. فارس : في سؤال في راسي ومن زمان بفتش للإجابة.. إيمان : إن وجدت تلقاها عندي.. اتفضل اسأل.. فارس : البنات القابلتهم نفيسة وبنادوا ليك ماما ديل منو؟ "إيمان ابتسمت وقالت".. إيمان : ديل السبب المخليني مستحملة نفسي والدنيا.. ديل أخواتي يا فارس.. هوايا البتنفسو.. فارس : اهاا ما شاء الله ربنا يحفظهم.. إيمان :آميين.. مستعد تسمع حكايتي؟!.. فارس : مستعد من زمان.. بس انتي مستعدة تحكي لي؟؟.. "إيمان بدت تبكي"... إيمان : خايفة تكرهني يا فارس.. فارس : اتطمني البحبك بصدق عمرو ما بكرهك.. احكي لي وانا سامعاك وفاهمك قبل تحكي.."إيمان هدت شوية وبدت تحكي".. إيمان : لمن كنت ممتحنة تالتة كانت اسوء سنة في حياتي.. ابوي كان سكرجي وكان كل يوم بضرب أمي بالليل و لمن يجي الليل أمي بتحبسنا انا واخواتي في غرفة وحدة وبنسمع أصوات الضرب والبكا والكواريك بس ما بنقدر نعمل شي.. بنرقد في سرايرنا وعيوننا بتكون على الباب ومنتظرين أمي تجي وتقول لينا ما تخافوا يا حبايبي انا كويسة وتجي تبوسنا وتغني لينا عشان ننوم.. صح انا كنت كبيرة بس ما كنت قادرة أساعد أمي وكنت بساعد اخواتي بس.. لحدي ما جا اليوم الأسود وخلى السواد يستمر لحدي الليلة دي.. نفس الروتين اتعاد بالليل بس المرة دي الباب ما اتفتح.. وأمي ما طمنتنا وما غنت لأخواتي.. اليوم داك ما نمت وانتظرت الصباح يجي ولسسة عندي أمل انو الباب يفتح.. وأخيرا الباب فتح.. بس المرة دي ما كانت أمي كانت مرة الجيران وهي بتعاين لي بنظرة شفقة غريبة!!.. فهمت النظرة بس ما صدقتها.. رفضت أصدقها..جطت وجنيت وبكيت وكوركت!.. ابوي قتل أمي يا فارس.. قتل أملنا وقتل سندنا وقتل عزوتنا.. وفي نفس اليوم داك إيمان ماتت مع أمها.. مرت الشهور وابوي اعدموهو وكدا بيتنا بقى فاضي بدون ابو وبدون أم وانا بقيت الاتنين لأخواتي.. أهلنا كلهم في البلد وانا رفضت اخلي بيتنا وذكرياتنا كلها وامشي البلد.. وكدا قطعت علاقتي مع أهلنا وما فضل لينا زول!.. اتفرضت علي حاجات كتيرة أكبر مني.. بعت ااي حاجة ممكن تتباع ودخلت الجامعة بالغصب!.. وكل سنة تمر الظروف بتبقى أصعب لحدي ما خلاص وصلنا الهاوية.. وانا للأسف اخترت أسهل طريق وازفت طريق في نفس الوقت.. بقيت بطلع مع دا ودا و كل ما تجيني هدية أو كدا ببيعها وكل ما امشي مطعم بشيل باقي الاكل سافري وبوديهو لأخواتي 💔.. كل يوم بكره نفسي زيادة وزيادة وضميري المؤنبني رافض يسكت!.. فارس والعبرة خانقاهو : خليك عارفة انو العيب ما لمن نغلط.. العيب انو لمن نغلط ضميرنا ما يأنبنا يا إيمان.. مادام لسسة جواك إحساس وضمير صاحي اتأكدي واتطمني انك زولة كويسة وطاهرة من جواك.. إيمان : يعني في أمل أرجع إيمان القديمة؟!.. فارس : مادام الإرادة في.. الأمل موجود 💜.. أول خطوة هي.. "فارس عاين ل شعرها وقال ليها".. لبسك ناقصو طرحة بس تزينو.. "إيمان ابتسمت والوجنات ظهرت 😉".. إيمان : حاضر يا الحبيب 💜.. "فارس ما صدق السمعو وحسى الأرض ما شايلاهو بالفرحة!".. فارس : يعني حلمي اتحقق؟!!.. أيمان : حلمنا اتحقق لانو حلمي الجديد اكون جمبك للنهاية.. فارس : وانا بوعدك حاقيف معاك وحأصبر للنهاية 💜.. يتبع
