#جواهر_محطمة
#للكاتب _ محمد_ ابو جود
#البارت_الاول
يم داركم مو صدفة و اخذني الدرب
انه المشيت بحسرتي و مشتاگ أشم ترابكم .
جواهر: كنت كاعدة و صافنة بحياتي الي صارت رماد و باهتة و اني اتحسر على ثلاث اطفال خسرتهم و على حياتي الضاعت و الشباب الي احترك
فززتني من صفنتي رسالة من الفيس دخلت عليها كانت مرة دا تطلب كبة و تريدها بعد يومين اتفقت وياها كانت كل المواد عندي
بس احتاجيت كشمش و طلعت للاسواق حتى اشتري و اول ما طلعت من البيت طبكت سيارة نزل من عدها الماضي الأليم انصدمت و اني اشوفة كدامي
نزل بكل جبروت ضليت مصدومة و واكفة و هوا من شافني هم انصدم ما كان متوقع الدنيا تجمعنا بعد
و هاجر و ريحان نفس حال حسن ما كانن متوقعات يشوفني حبيت اثبتلهم همة لا شيء بحياتي مشيت و عبرت من يمهم حتى ريحان ما اريد اتواصل وياها رغم هية بريئة من كلشي صار
ريحان: جواهر جواهر
جواهر: سمعتها و ما رديت كملت طريقي و رحت جبت الاحتاجهن و رجعت للبيت و بديت احضر للكبة و اني كاعدة احضر بيها صفنت و رجعت بذاكرتي لهذاك اليوم المشؤوم الي كلشي بدا من هذاك اليوم ....
جواهر: مرحبا اني جواهر مواليد 1994 عايشين اني و امي و ابوية و مرت ابوية اسمها امل ابوية اتزوج امل من بعد امي لان ما صار عدهم اولاد غيري و لكن من اتزوج امل صار ويا حادث و صار بي عقم
لكن مع ذالك امل ما تركت ابوية مو حباً بي بس لان ابوية متمكن عندا 3 محلات اثنين مأجرهن و واحد يشتغل بي صايغ ذهب
الحمدلله حالتنا المادية زينة لكن الفلوس ما الهن فايدة اذا كان البشر عديم انسانية
انطيكم تعريف بسيط لعائلتي ابوية محبس عند امل و امل متسلطة حيل و امي تخاف من امل يعني كدام امل امي ما يطلع صوتها
حيل كنت اضوج من ضعف امي فحبيت اني يكون الي صوت فصرت وكحة و لمن امل تحجي وياي حرف اردة عليها عشر مع كل هذا بقت امل متسلطة و خباثتهة تزيد ما تقل
قصتي و دمار شبابي يبدي بسنة 2012 كان عمري 18 سنة كنت صف سادس علمي و ابوية ما قبل يعوفلي مدرسين خصوصين بسبب ست امل تكول ماكو داعي الهن
كانت المواد حيل صعبة اضل اقرة و سهرانة الليل كلة و بيوم رجعت من المدرسة و صعدت بسرعة بدلت و غسلت و تغديت و اني واكفة و صعدت اريد اقرة عندي امتحان فيزياء 3 افصل
اول ما كعدت جبت دفتري و الكتاب و اقلامي و كعدت اول ما فتحت الكتاب اجت الحية شمرت سمهة علية
امل : جواهر ينعااااال وينج
جواهر: هاااا لخاطر الله احترمي نفسج شوية شنو نعال ماكو غيرج نعال
