💕أنت قلبي٢💕

الحلقة ١١٢

#انت_قلبي٢
#بوسي_مصطفى
___________

الحلقة(((١١٢)))
في شقة حلمي (والد كريم)
حازم يحمل جميلة : صباح الفل حبيبة خالو ايه اللي مصحيكي بدري كده؟!
فريدة و هي بتوزع الأطباق على السفرة : بدري!!
دي منامتش اصلا.
حازم : ليه ايه اللي قالقك يا حبيبتي؟!
فريدة : أنا عارفه اسألها.
جميلة : بس متلخبطش في الكلام عايزة شيكولاته.
حازم : هههههههههههه سامعه بنتك تقصد اني مضحكش عليها و اتوهها في الكلام علشان تنسى الشيكولاته بس أنا منستش مقدرش اصلا ادخل هنا من غيرها اتفضلي.
فريدة : تاني يا حازم ماقولنا بلاش.
جميلة : نزلني.
حازم : ليه؟
جميلة : علشان اعرف أكل.
حازم : هههههههههههه طيب اتفضلي انزلي.
تجري جميلة و تدخل جوه.
فريدة : تعالى يا حازم اقعد افطر.
حازم : فطرت فوق.. قوليلي طنط سميرة عامله ايه؟
فريدة بتنهيده : اهي زي ما هيه.
حازم : مين جوه؟
فريدة : كريم و علاء جوه.

علاء يخرج من الغرفة..
صباح الخير..
حازم : صباح النور..
فريدة : رايح فين يا علاء اقعد افطر.
علاء : لا يا فريدة معلش هطلع اغير هدومي.
حازم : خارج؟
علاء : اه عاوز حاجه؟
حازم : لأ بس لو مش هتقدر تسوق يعني ممكن اوصلك.
علاء : لأ علشان معطلكش على شغلك.

و فتح علاء باب الشقة و خرج.
حازم : صباح الخير يا دكتور.
كريم : صباح النور يا حازم.
فريدة : هعمل القهوة بعد ما تفطر.
كريم : لأ اعملي القهوة الأول.
حازم : ما بلاش قهوة على الريق
كل أي حاجه و بعدين ابقى أشرب قهوة براحتك.
فريدة : قولو يا حازم علشان مبيقتنعش بكلامي.
كريم : طيب بس اعملي القهوة.
فريدة : حاضر.
كريم : اقعد افطر يا حازم.
حازم : الحمد لله
فطرت كنت جاي بس اطمن على طنط سميرة و خارج
عندي جلسه في المحكمة.
_______________

في فيلا آسر..
آسر : هي مليكة مسافرة امتى؟
سهر نظرت في الساعة : قدامهم تلات ساعات.
آسر بيشرب اللبن : هو دا اللي مزعلك.
سهر : أنا مش زعلانه.
آسر : طيب امال مالك؟
سهر : مفيش.
آسر بتنهيده : ما هو اكيد في سبب و لو مفيش يبقى مكشره ليه؟
سهر نظرت لـ آسر و سكتت.
آسر : عمار كلمني و استأذن إنه يجي الليلة يقعد مع خطيبته شويه.
سهر : مش أنت وافقت؟
آسر : ايوه ليه هي فيها حاجه؟
سهر : لا أنا بسأل بس.
آسر و و قرب من سهر..
سهر : فيه حاجه؟
آسر : انتي اللي مالك يا حبييتي؟
سهر و هي مدمعه : تعبانه.
آسر : سلامتك ألف سلامة حاسه بـ ايه؟
سهر : مش عارفه.
آسر بتنهيده و بيمسك ايدها اللي بترتعش : سهر انا آسف.
سهر : على ايه؟
آسر : اني سبب وجعك.
سهر : مين قال كده؟
آسر : من غير ما تقولي أنا حاسس بيكي.
سهر : آسر هو مينفعش نسافر و نسيب هنا؟
آسر : ازاي مش فاهم؟
سهر : تبيع الفيلا و تصفي الشركة
و ناخد الولاد و نعيش في مكان تاني و نبعد عن كل الذكريات اللي موجودة في المكان ده.
آسر : حبييتي رغم ان الماضي كان فيه حاجات كتير وجعتنا بس متنسيش إنه كان فيه حاجات كتير حلوة
اولها لما شوفتك و حبيتك و ارتبطت بيكي فرحتنا لما جات مليكة للدنيا اللحظات الحلوة اللي عيشناها مع بعض لمة العيله و الاهل ولادنا اللي بيكبروا كل يوم قدام عينا حتى المجهود اللي بنعمله علشان نسعدهم و نحقق أحلامهم دا فيه متعه حتى لو تعبنا شويه سعادتهم بالدنيا
بلاش ننسى الحلو و نفضل نفتكر في الوحش و لو عايزة تسافري هاخدك لـ أي مكان تحبي تقضي فيه كام يوم و نرجع تاني لحياتنا.
سهر : آسر أنا خايفه انهار و متحملش أكتر من كده انا بحاول بس في حاجات بتبقى فوق طاقتي أنا مش قادرة اتحملها.
يضمها ليه بكل قوته : مع بعض هنتحمل يا سهر و كله بيعدي عارف إنك تعبتي و أنا زيك بالظبط بس طول ما احنا مع بعض هنتحمل.
سهر : طيب سيبني لحد ما الولاد  يشوفنا.
آسر : هو احنا بنعمل حاجه غلط
ههههههههههههه
عارفه انا نفسي العيال دي تكبر بقى و نجوزهم علشان
نعيش براحتنا.
سهر : بتحلم..
آسر : سبيني أحلم..
تعرفي لما اتجوزتك كنت فاكر ان الحياة هتبقى وردي
ههههههههههههه.
سهر : ايه دا يعني ندمان؟
آسر : هههههههههههه لأ متفهمنيش غلط بس اللي حصل لنا
دا عمره ما جه في خيالي
معقول اتجوز عليكي و نعيش كل الظروف الصعبه دي.
سهر : ما بلاش تفكرني بقى.
آسر : طب بقولك ايه؟
سهر : قول يا حبيبي قول.
آسر : تيجي ناخد اجازة من الشغل و الولاد.
سهر : ياريت.
آسر : خلاص سبيني ارتب للموضوع ده.
سهر : ماشي.. اديني مستنيه بس اوعي تكون بتضحك عليه.
آسر : عمري قولتلك حاجه و منفذتهاش.
سهر : بصراحه لأ.
آسر : خلاص اعتبريها أول مرة.
سهر : ايه دا يعني ايه مفيش اجازة زي ما قولت؟!
آسر : هههههههههههه
لا طبعاً بهزر.. فيه اجازة و فيه مفاجأة حلوة كمان.
سهر : مفاجأة ايه؟
آسر : عايزانى احرق المفاجأة يعني.. هتعرفي في الوقت المناسب.
سهر : يا خبر اتأخرت.
آسر : و لا يهمك يا حبيبتي فداكي أي حاجه.
تبتسم سهر : طب يلا بقى علشان متتأخرش أكتر من كده.
___________