عروسة جدى

الجزء الثانى

عروسة جدى
الجزء الثانى

دخلت تسلم علينا وهى عينها فى الارض  كان باين اوى انها مكسوفه ... امى مدت ايدها سلمت وهى مش ناطقه كلمه وخالى المسكين سلم عليها وهو شكله يضحك عشان العصير اللى كان نازل من بقه وهو مسهم للعروسه ومش واخد باله عشان يمسحه وبعدها راحت سلمت على جدى اللى كان ضحكته تقريبا واخده وشه كله وبعد كده قعدت جمب خالها .. انا استغربت قوى

وصعبة عليا البنت المسكينه .. بصراحه مكنتش قادره اتخيل ازاى تقبل بجدى يبقى جوزها بسنه الكبير وشكله اللى ماقبلتش بيه الستات الكبيره .  عدت علينا القعده بهذا الوضع جدى بيتفق مع خالها وامى نازل عليها سهم الله مش ناطقه وخالى على نفس الوضع . دا انا لولا انى شاورتله عشان يمسح بقه لكان فضل على كده بشكله

وقبل مانقوم من مكانا دخلت والدتها ست جميله و بضحكه بشوشه سلمت على امى والظاهر كده انها تعرفها وبعدها سلمت على خالى اللى على وضعه مش ناطق كلمه وبعدها سلمت على جدى وهى بترحب بيه على اساس انه عريس بنتها .. اللى معرفتش احدد ليها سن رغم ان جدى قال لنا ان سنها كبير لكن انا مش شايفه كده خالص

مشينا من عندهم وخالى وامى فضلوا ماسكين نفسهم لحد اما وصلنا بيت جدى وبعد كده قامت حريقه
خالى بعلو صوته : ملقتش غير دى يابا
جدى : ومالها دى ياولا
خالى : يانهار اسود انت مش واخد بالك دى بت " سنيه" انت مش فاكر " سنيه " يابا .
جدى بعلو صوته : لم نفسك ياض انت  . بدل مااوريك. شغلك
امى : مش كده يابا طول بالك معاه دا ابنك الكبير
جدى : مش سامعه اخوكى وقلة حياه
امى : يابا اعذره ماانت عارف اللى فيها

جدى بصوت عاقل شويه : حتى لو كان انا ليه دعوه بالبنت مش امها والبنت انتى شوفتيها
خالى : وانت ضامن بقى انها ماتتطلعش زى امها
جدى رفع العصايا على خالى وهو بيزعق وامى مسكت فيه عشان تحوشهم عن بعض
- على النعمه لو ما لميت نفسك لا اللمك ياولا انت فاكر نفسك كبرت عليا . لا ياحبيبى فوق لنفسك
خالى : اديك قولت بنفسك كبرت .. وانا عندى عيال شباب فى عمر اللى انت عايز تتجوزها دى . اللى محدش عارفها ولا عارف اخلاقها
جدى : بقولك ايه انا سألت عليها واتاكدت من اخلاقها

خالى : اتأكدت من اخلاقها يابا . طب انا معاك ان اخلاقها كويسه طيب مسألتش هى ليه وافقت بيك
جدى وهو بيزعق فيه : وماترضاش ليه ياولا انا اتعايب
خالى مسك نفسه بالعافيه عن الرد لكن امى اتكلمت
- يابا انت لما قولتلنا انها كبيره وفايتها قطر الجواز احنا منطقناش وقولنا تلاقى جمالها على قدها
لكن اللى شوفناها لا وحشه ولا كبيره عشان يفوتها قطر الجواز يبقى لا مؤاخذه ترضى بيك ليه وماتزعلش لما اقولك انك فى عمر جدها يابا

جدى : عندها ٣٠ سنه يبقى فايتها قطر الجواز
امى : لا يابا مش فايتها قطر الجواز البنات دلوقتى بتوصل ل٣٥ واكتر لكن انا حاسه ان الموضوع فيه ان
ادخل خالى فى الكلام
- ياحبيبتى ماهى باينه اهى زى عين الشمس طمعانه فى فلوسه
جدى : بقى هى طمعانه فى فلوسى طب ماتقول انك خايف اجيبلك اخ يورث معاك
خالى : اخ مين يابا انت هاتضحك عليا ولا على نفسك
جدى زعق : طب غور ياكلب من وشى احسنلك
خالى : ماشى يابا هامشى بس انا بقولك اهو جواز من البت دى مش هايتم ولو انت عايز جواز نجوزك احنا ست ستها ماشى .
جدى : غور من وشى غور

مشى خالى واحنا كمان مشينا وراه بناءاً على رغبة جدى اللى ماكنش طايق حد فينا يقعد معاه .
امى خدتنى وروحنا عند خالى . لقيناه بيتخانق مع مراته وعياله ومش طايق حد فيهم .
قربت منه وراحت تهديه قام شاخط فيها خالى

- يعنى عجبك عمايل ابوكى اللى هايجرسنا فى البلد
امى : طب واحنا هنعمل ايه بس ماانت عارف ابوك وراسه الناشفه
خالى : راسه الناشفه عايزايه يتجوز بنت "سنيه "
امى : واحنا هنعمل ايه بس معاه
خالى :  دى هتلهف اللى وراه واللى قدامه . لكن انا بقى  لايمكن اسكت عالجوزه دى ابدا
امى : يعنى هاتعمل ايه ؟
خالى : مش هاسكت هالف واطقس عليها . هاسوق عليه خلق الله هاعمل اى حاجه بس مش هاخلى بنت "سنيه "تتجوز ابويا ولا تخش بيتنا

انا كنت بتفرج اكنى بشوف فيلم سيما مش عارفه ايه اخره . جدى اول مره يعمل معانا كده . دا صبر على عيا ستى سبع سنين . قوم بقى اول ماتموت تطق فى دماغه فكرة الجواز ومن بنت قد احفاده لا والمصيبه البنت موافقه وكله كوم واسم امها " سنيه" اللى بقى لبانه فى السنتهم

بعد مامشينا من عند خالى واحنا فى الطريق مقدرتش اصبر فسألت امى
- هى مين "سنيه " دى ياما
امى : وانتى مالك تتحشرى فى اللى ملكيش فيه ليه
انا : والنبى ياما قوليلى مين "سنيه"
امى : بكره تعرفى يااختى مين " سنيه" شكلنا داخلين على ايام سوده مايعلم بيها الا ربنا

... يتبع
ياترى الجوازه هتم ولا لأ وايه اللى هايحصل تابعونى فى الاجزاء اللى جايه