💕أنت قلبي٢💕

الحلقة ١١٥

#أنت_قلبي٢
#بوسي_مصطفى
______________
الحلقة ١١٥

في شقة مجدي..
مجدي : مفيش مانع بس خليها في اجازة الترم.
آدم : طب ما نعمل الخطوبة قبلها
دا مجرد إقتراح يعني.
مجدي : ما هو مفروض الخطوبة كانت تبقى في اجازة الصيف لكن أنت قولت عندك ظرف ما و مش هينفع.
آدم : يعني كان على أمل إنها تبقى قريب بس اجازة الترم دي هتبقى بعيده شويه.
مجدي : مفرقتش كتير ما هو كده و لا كده انتو مخطوبين و لا ايه؟
آدم : زي ما تحب يا عمي.
مجدي : ايه رايح فين؟
آدم : هستأذن معلش أصل صاحي من بدري.
مجدي ب إبتسامة : عايز تنام يعني؟
لو كده بقى مقدرش اقولك أسهر معانا.
آدم : هعدي على خالتو اطمن عليها و بعدها هروح.
مجدي : تمام يا حبيبي خلي بالك من نفسك.

بعد شويه..
داليا : و فيها ايه يعني يا مجدي؟
ما كنت توافق خلينا نفرح بقى.
مجدي : هتفرق ايه بس يا داليا نعمل حفلة خطوبة و لا لأ
هما مش مخطوبين برضه و لا ايه؟
قسمت : ايوه يا بابي بس أنا مبعرفش ألبس الدبله بتاعتي و كمان لما بتسأل في الجامعة مبعرفش اقولهم إني مخطوبه.
داليا : خلينا نعمل حفلة الخطوبة أهو نفرحهم يا مجدي.
مجدي : مش والدة الدكتور كريم متوفيه قريب برضه و لا ايه؟!
قسمت : الكلام دا من شهر يا بابي و كمان إحنا مش هنعمل زيطه و لا حاجه دي هتبقى حاجه على الضيق كده و ألبس بقى الدبله و الفستان و أفرح.
داليا نظرت لمجدي..
مجدي : خلاص يا داليا موافق بس يستأذن من العيله الأول علشان محدش يكون زعلان و كمان يجوا معاه ميجيش لوحده.
داليا : في دي بقى أنت معاك حق.
مجدي : في دي بس؟!
قسمت و قربت من والدها و طبعت قُبله على خده : في كل حاجه طبعا يا بابي.
مجدي : اممم أنا بتثبت بقى!
قسمت : هههههههههههه عديها يا متر.
مجدي : و أنا ميهمنيش غير سعادتك أنتِ و اخواتك.
رقيه جايه ناحيتهم : حيث كده بقى اطلب اللي أنا عايزاه.
داليا : استقبل بقى.
مجدي : طلباتك أوامر يا روكه.
مروان : ايه دا اشمعنه رقيه يعني و أنا طلباتي الكل مبيبقاش واخد باله منها.
داليا : أسند جدتك الأول و بعدين ابقى أتكلم.
يقوم مجدي مع مروان يسندوا إنتصار.
إنتصار : سيبني في الاوضة لوحدي ليه؟
مجدي : مش قولتي إن تيته نايمه يا قسمت؟
قسمت : ايوه أنا سيبت تيته نايمه.
إنتصار : قومت ملقتش حد حواليه و انتو عارفين إني بقيت اخاف اقعد لوحدي.
داليا : أنا آسفه يا صاصا أصل آدم جه قومت اعمله حاجه يشربها معرفش إن حضرتك صحيتي.
إنتصار : حصل خير خطوبة ايه
انا سمعاكو بتتكلموا بس مفهمتش.
رقيه : أصل آدم عايز يعمل حفلة الخطوبة قريب يا تيته.
إنتصار : طب كويس خلينا نفرح.
داليا : شوفت أهي مامتك كمان موافقه.
إنتصار : ليه هو مجدي مش موافق و لا ايه؟
مجدي : ياخد رأي العيله الأول يا ماما علشان بس حالة الوفاة اللي عندهم.
إنتصار : ايوه يا ابني معاك حق الأصول محدش يزعل منها.
داليا : طيب كلمه و قوله إنك موافق بشرط العيله كلها توافق علشان يحضروا الخطوبة و فهمه إن مش هيكون في زيطه زي ما قالت قسمت علشان هناك برضه ميزعلوش.
إنتصار : ايوه كده تمام كلمه يا مجدي على طول.
مجدي : حاضر.
_____________
أمام العمارة اللي فيها شقة شريف.. هايدي خارجه من الصيدلية.
و شريف بيركن العربية و ينزل.
شريف : كنتي فين؟
هايدي : ليه مش شايف إني خارجه من الصيدلية!!
شريف : مقولتيش ليه و أنا كنت جيبتلك اللي انتي عاوزاه.
هايدي : كده.. علشان مينفعش.
و تركته و قربت من الاسانسير
شريف : اتفضلي.
تدخل هايدي تركب الاسانسير و بعدها شريف.
و نظرات هايدي لشريف من تحت لتحت.
يضغط شريف على الزر الباب يتفتح.
شريف : اتفضلي.
تخرج هايدي.. ترن الجرس.
يمنى تفتح الباب : ايه اللي اخرك كل دا تحت يا هايدي ؟!
و بعدها تتفاجئ بشريف.
تدخل هايدي جوه من غير ما ترد على يمنى.
شريف : هي اختك تحت من امتى؟
يمنى : لسه نازله من شويه.
شريف : قالتلك رايحه فين؟
يمنى : نزلت تشتري حاجه من السوبر ماركت.
شريف : بس أنا شوفتها خارجه من الصيدلية.
يمنى : يمكن اشتريت من السوبر ماركت و افتكرت حاجه تجيبها من الصيدلية.
شريف : يمكن!
يمنى : هتتعشا؟
شريف : الولاد ناموا ؟
يمنى : ايوه أكلوا و ذاكروا شويه و بعدها دخلوا يناموا.
شريف : شوفي اختك كده هتاكل.
يمنى : حاضر.
شريف : هدخل اغير هدومي.