Feng Yin Tian Xia မြန်မာဘာသာပြန် စဆုံး

အပိုင်း (၄)

အပိုင်း (၄)

ဟွားကျူ့ယွီ နိုးထလာတော့ သူမ ကြီးကျယ်ခမ်းနားတဲ့အခန်းတစ်ခုထဲရောက်ရှိနေတာကို သိလိုက်ရတယ်။ သူမ အခု နန်းတော်ထဲရောက်ရှိနေမှန်း သတိရလိုက်၏။ သူမရဲ့အိမ်တော်မှအစေခံမလေးထောင်စဲ့ဟာ အိပ်ခန်းအတွင်းမှာပဲ သူမကို ရပ်စောင့်ကြည့်နေတုန်းပဲ။ ဘုရင်မင်းမြတ်ဟာ ရုတ်တရက်ကြီး အမိန့်တော်တစ်ခုကိုထပ်ခါချမှတ်ပြီး ဒီတစ်ကြိမ်မှာတော့ သူမရဲ့မမလေးကို မြောက်ပိုင်းမြို့တော်ရဲ့အိမ်ရှေ့စံနဲ့လက်ထပ်ထိမ်းမြားဖို့ အမိန့်ချမှတ်လာတော့ သူမ စိတ်တွေရှုပ်ထွေးသွားပြီး ဝမ်းနည်းလာခဲ့တော့သည်။

ဟွားကျူ့ယွီတစ်ယောက် တစ်ကိုယ်လုံးအားအင်ချည့်နဲ့နေဆဲပဲလို့ ခံစားနေရ၏။ အားအင်ချည့်နဲ့နေတာကလွဲလို့ အဆိပ်ရဲ့တစ်ခြားလက္ခဏာတွေတစ်ခုမှ ပြမလာခဲ့ဘူး။ သူမကိုကျွေးလိုက်တဲ့အဆိပ်က အကြောပျော့အဆိပ်မှုန့် ဖြစ်ပုံပေါ်တယ်၊ သူမ မြောက်ပိုင်းမြို့တော်ရဲ့မင်းသားကို လက်ထပ်ဖို့ငြင်းဆန်ပြီး ရန်ရှာမှာကိုတားဆီးဖို့ ဖြစ်လောက်တယ်။

ဟွားကျူ့ယွီ ထောင်စဲ့ကို သူမ၏ဖခင်နှင့်ပတ်သက်ပြီး သတင်းတစ်စုံတစ်ရာကြားသေးလားလို့မေးလိုက်ပေမဲ့ နန်းတော်ထဲမှာ သတင်းတွေဟာအရမ်းတင်းကျပ်လွန်းတာကြောင့် ထောင်စဲ့လည်း ကြားသိခဲ့ခြင်းမရှိခဲ့ဘူး။

အခန်းအပြင်ဘက်မှာ နန်းတော်အစေခံငယ်လေးက ဒေါ်ဒေါ်ချင်းလော့တစ်ယောက် သူမနဲ့တွေ့ဖို့ ခွင့်တောင်းလာကြောင်း သတင်းပို့လာတာနဲ့ ဟွားကျူ့ယွီ ဒေါ်ဒေါ်ချင်းလော့ကို ဝင်ခွင့်ပြုလိုက်တယ်။ ဒေါ်ဒေါ်ချင်းလော့ဆိုသူက သိပ်ပြီးအသက်မကြီးသေးတဲ့နန်းတော်အစေခံတစ်ယောက်ဖြစ်ပြီး၊ အသက်၃၀လောက်ပဲ ရှိပုံပေါ်၏။ မြောက်ပိုင်းသံတမန်တွေ ဟွားကျူ့ယွီကိုလာကြိုပြီး ချက်ချင်းထွက်ခွာကြမှာမို့ ဟွားကျူ့ယွီကို အဝတ်အစားဆင်မြန်းပေးဖို့ ဘုရင်မင်းမြတ်က သူမကို အမိန့်ချမှတ်ခဲ့တယ်။

ဟွားကျူ့ယွီရဲ့ရုပ်ရည်သွင်ပြင်ကိုမြင်လိုက်ရတော့ အစပိုင်းမှာ ဒေါ်ဒေါ်ချင်းလော့တစ်ယောက် အတော်လေး အံ့အားသင့်သွားခဲ့တယ်။ ဟွားကျူ့ယွီဟာရုပ်ဆိုးလွန်းပေမဲ့ ဒေါ်ဒေါ်ချင်းလော့ ဘာတစ်ခုမှပြန်မပြောဘဲ ပုံမှန်အတိုင်း လုပ်ဆောင်နေခဲ့သည်။ မနေ့က ဟွားကျူ့ယွီရဲ့အဘွား ဟွားကျူ့ယွီကို လှပသေသပ်လွန်းစွာ ဆင်မြန်းပေးခဲ့ပေမဲ့ ဝေါယာဉ်ပေါ်ရောက်တော့ သူမရဲ့ဘယ်ဖက်ပါးပြင်ပေါ်မှာ အနက်ရောင်မွေးရာပါအမှတ်အသားတစ်ခုကို သူမ တိတ်တိတ်လေး ရေးဆွဲလိုက်တယ်။ အစကတော့ ကျီဖုန့်လီကိုစနောက်ဖို့ သူမ ဒီလိုပြင်ဆင်ထားခဲ့ပေမဲ့ အခုတော့ သူမရဲ့ရုပ်ရည်ကိုအကြည့်ရဆိုးအောင်လုပ်နေတဲ့ ထိုမွေးရာပါအမှတ်အသားအတုကို ဘုရင်မင်းမြတ်အား အရူးလုပ်ဖို့အတွက် အသုံးချနိုင်သေး၏။ သူမ ရုပ်ဆိုးတာကိုသိရှိသွားရင် ဘုရင်မင်းမြတ်ဟာ ဒီမင်္ဂလာပွဲကို ပယ်ဖျက်လိုက်နိုင်တယ်။ ဒါကြောင့် ဟွားကျူ့ယွီဟာ ဒေါ်ဒေါ်ချင်းလော့ကို သူမရဲ့ဆံနွယ်တွေကိုသာ ထုံးဖွဲ့ဖို့ ခွင့်ပြုပေးလိုက်ပြီး မျက်နှာနှင့်အဝတ်အစားကိုတော့ ဘာမှမလုပ်ခိုင်းခဲ့ဘူး။