رواية فداء الوطن [ مكتملة ]

فصل 29: مات عدُوي

دازت مدة نزل أسد من العمارة وفتح السيارة وركب بهدوء.. شافت فيه نور وهي كتمسح دموعها باش مايشوفهاش كتبكي.. وقالت بتساؤل:
- واش قالت شي حاجة.. ؟؟

حرك أسد راسو بلا وقال:
- للأسف هاد المجرمين كيكونو مخلصين للأسياد ديالهم.. وأكيد مغاديش يعتارفوو..
دورت وجهها لهيه وقالت:
- كنظن خاصنا نقلوها للمقر حسن ماتبقى في دار ستيڤانيو..
شاف فيها أسد وقال:
- لا من الأحسن تبقى هنا.. حيث أكثر أمان
حركت ليه راسها بآه.. بينما هو خدم الطموبيل وكسيرا متاجه للمقر..

دازت مدة قليلة كانو غادين فيها داخل المقر متاجهين للقاعة ديال إجتماع.. فتح أسد الباب ودخل لقاهم كاملين مجموعين من غير علي وستيڤانيو وعامر.. خداو الأماكن ديالهم.. في حين قالت أريانا بجد وهي هازة في ايدها ملف:
- مخداش مني وقت باش نبحث عليها.. هي سميتها ليلي' وملقبة بسپيكترا من أخطر السفاحين على الديپ الويب.. وكنظن أنه في هاد الآونة هي خدامة مع المنظمة..

حرك أسد راسو بآه وقال:
- ومكظنيش أنه خاص تعتارف باش نعرفو شكون صيفطها..
تدخلت نور وقالت:
- كنظن أنه أدهم لي غادي يكون صيفطها.. حيث هو بغا يبدا يقتلنا واحد تابع الآخر..
شاف فيها أسد وقال:
- وأنا مغاديش نسمح ليه بهادشي..

قالت أريانا وهي كتسد الملف:
- النهار لي عاودتي ليا فيه على أدهم بديت البحث عليه.. كيبان رجل أعمال عادي.. لكن الرحلات ديالو لبرازيل كثار بزاف.. وغير البارح باش مشا لبرازيل مرة أخرى.. كنظن أنه تما فين كاين المقر السري ديالهم..
قال أدريان:
- وحتى شاهين نسبة ٩٩% هو مات..
تكملت أريانا وهي كتقول:
- اه وكاين الدليل على هادشي.. أنا قدرت أنني نلقا ڤيديو فيه شاهين مع أحد أعضاء العصابات...  قبل سنوات دخلو للديپو على حساب صفقة اجرامية لكن تفجر وهادشي كيعني أنه مات..

قالت نور بآسى:
- هادشي كيعني أنه مكاينش وجود لشاهين.. يعني أنه العدو ديالي مات في الأصل..
تكا أدريان وقال:
- ولكن هادشي مكيمنعناش أننا نتوقفو على الخدمة.. لأنه مات وخلا من وراه منظمة إجرامية خطيرة خاصنا نحيوها..
شافت فيه نور وقالت:
- اه هاديك المنظمة هي السبب في الدمار ديال بزاف دالناس.. داكشي علاش أنا ولا هدفي هو منظمة أوطلاو..

تنهد أسد وقال:
- حنا كلنا دبا هدفنا هو الأطلاو..
قاطع كلامهم عامر لي دخل وكان من وراه علي.. عامر لي كان هاز في ايدو الكتاب وكيشوف مباشرة في نور.. گلس في الكرسي الرئيسي وقال بجمود:
- أنا دبا قدرت نفهم هادشي كامل..

شافت فيه نور باستغراب قبل مايقول وهو كيتنهد والكل مركز معاه آش باغي يقول:
- نور أنا كنعتاذر منك بزاف.. وكنعتاذر منكم كاملين أنا درت معاكم بزاف ديال الأغلاط لكن أنا درت هادشي فقط لمصلحتكم..
شافو فيه كاملين باستغراب قبل مايكمل:
- أنا باش نقدر نخلي هاد القضية تنجح.. دخلتكم نتوما فيها حيث عارف أن قلوبكم عامرة بالحقد من جهة شاهين.. أسد وعلي نتوما ماتو الأهل ديالكم ونتوما مزال صغار وبديتو كتقلبو على شاهين ومستسلمتوش.. ونتا ا أدريان جيتي هنا باش تنضَم لهاد القضية.. أما نتي انور فهادي قصة طويلة..