Feng Yin Tian Xia မြန်မာဘာသာပြန် စဆုံး

အပိုင်း (၁၅)

အပိုင်း (၁၅)

မှောင်ရီတရောအချိန်ရောက်တော့ ချီတက်လာကြတဲ့စစ်သည်အစုအဝေးဟာ မြောက်ပိုင်းမြို့တော်၏နယ်စပ်ဆီသို့ ရောက်ရှိလို့နေနှင့်ပြီ။ သူမတို့ရဲ့ရှေ့မှာရှိနေတာကတော့ ချင်မင်းမြစ်ပဲဖြစ်သည်။ ရှောင်ယင်တစ်ယောက်ဟာ သူ့ရဲ့စစ်သည်တွေကို တဲငယ်တွေဆောက်ပြီး ခေတ္တအနားယူကြဖို့ ချက်ချင်းအမိန့်ပေးလာလေ၏။ ထို့နောက် သူ့ရဲ့နောက်လိုက်တွေကို စစ်ရေးဗျူဟာတွေ ဆွေးနွေးတိုင်ပင်ဖို့ သူ၏တဲအိမ်ဆီ ဆင့်ခေါ်လေသည်။

ချီတက်လာတာတစ်ရက်ကြာသွားပြီးတဲ့နောက်မှာ ဟွားကျူ့ယွီတစ်ယောက် မြင်းစီးသမားတွေထက်ကို ပိုပြီးပင်ပန်းလာခဲ့တယ်။ သူမ မြေပြင်ပေါ် ခြေလေးချလိုက်တာနဲ့ ခြေထောက်တွေဟာ ခွေယိုင်လဲကျသွားတော့သည်။ သူမရဲ့မျက်ဝန်းတစ်စုံကိုပင့်တက်ပြီး အညီအညာစီရီထားတဲ့စစ်သည်အယောက်၃သောင်းပါဝင်သော စစ်စခန်းကို ငေးကြည့်မိ၏။ ဒီမြင်ကွင်းက တကယ့်ကိုရင်သပ်ရှုမောဖွယ်ကောင်းလှ၏။ တစ်နေကုန်ချီတက်လာကြတာတောင်မှ စစ်သည်တွေမှာ မောပန်းမှုတစ်စုံတစ်ရာရှိဟန်မပေါ်ကြဘူး။ သူတို့ တစ်စက်လေးမှ ငြီးတွားမလာခဲ့ကြဘူး။ စစ်သည်တွေရဲ့ညီညာလှတဲ့ခြေလှမ်းသံတွေသာ ကြားနေရတယ်။

ထိုအချိန်မှာပဲ အစပိုင်းတုန်းက သူမ၊ ဖခင်အပြင် တောင်ပိုင်းမြို့တော်တစ်ခုလုံးကပါ မြောက်ပိုင်းမြို့တော်ကို အထင်သေးခဲ့မိတာလို့ သူမ ရုတ်တရက် သဘောပေါက်လာခဲ့တော့သည်။ မြောက်ပိုင်းမြို့တော် ဖြစ်တည်လာတာ နှစ်ပေါင်း၁၀၀တောင်မကြာသေးဘူး။ အဲ့မတိုင်ခင်တုန်းက သူတို့ဟာ လှည့်လှည်သွားလာနေကြတဲ့လူမျိုးစုအဖြစ်ပဲ ရှိနေခဲ့ကြတာ။ လူမျိုးစုရဲ့အင်အား ကြီးထွားလာတာနဲ့ တဖြည်းဖြည်းချင်း တိုင်းပြည်တစ်ပြည်ဖြစ်တည်လာတယ်။ နောက်ဆုံး ရှောင်ယင်ရဲ့ခမည်းတော်-ရှောင်ကန်းလက်ထက်အရောက်မှာတော့ တိုင်းပြည်တစ်ခုလုံးကို ထိန်းချုပ်နိုင်တဲ့တော်ဝင်မိသားစုအဖြစ် အသိအမှတ်ပြုခြင်းခံခဲ့ရတယ်။ ရှောင်ကန်းရဲ့မူလဇစ်မြစ်မျိုးရိုးက ရှောင် မဟုတ်ဘဲ ဟန်သာဖြစ်သည်။ ရှောင်ယင်ရဲ့ခမည်းတော်ဟာ တော်ဝင်မိသားစုအဖြစ် အသိအမှတ်ပြုခံလိုက်ရတဲ့ အချိန်ကစပြီး သူ့ရဲ့မျိုးရိုးကို ရှောင်အဖြစ်ပြောင်းလဲကာ ပြည်သူပြည်သားတွေကို ခေတ်ရေစီးကြောင်းအတိုင်း ရိုးရာယဉ်ကျေးမှုတွေ၊ ဘာသာစကားတွေလေ့လာသင်ယူကြဖို့ မိန့်မှာခဲ့တယ်၊ နောက်ပြီး မြောက်ပိုင်းက ပြည်သူပြည်သားတွေကို တောင်ပိုင်းမြို့တော်ကလူတွေနဲ့ ထိမ်းမြားလက်ထပ်ခြင်းကိုလည်း ခွင့်ပြုပေးခဲ့သေးသည်။