💕أنت قلبي٢💕

الحلقة ١٢٩

#أنت_قلبي٢
#بوسي_مصطفى
_______________
الحلقة ١٢٩

في منزل وليد.
مها بتزعق : هو انتي و اختك عاملين ربطيه عليا جرا ايه منك ليها أنتو مش لاقيين حد يسكتوا و لا ايه؟
فيروز : بقى أنا اقوم الصبح بدري اعملك الفطار و اخبزلك العيش اللي بتطلبيه سخن كل يوم و انتي تروحي تسمعي بنت اختي كلام زي دا
مالها تربية الستات ما حضرتك ست اهو و بعدين اللي تتحمل مسؤلية بناتها و تربيهم و تعلمهم و تجوزهم دي تتحط على الراس مش تتشتم و تتهان و هي في تربتها عملتلك ايه ماما علشان تقولي عليها كلام زي دا؟!
ياسمينه : معلش أصل البني آدم مبيكرهش غير اللي احسن منه.
مها بسخريه : ها ها احسن مني فيه ايه اتجوزت رجلين زيها مثلا؟!
ياسمينه : ما تتجوز عشره مش بالحلال يا طنط و إن كنتي عايزة تتجوزي ما تتجوزي حد حايشك؟
مها : لأ أنا بحترم سني يا اختي مبروحش اتجوز و أنا عندي حاجه و أربعين.
فيروز : اتجوزت حاجه و أربعين و كانت في عز شبابها و جابتلنا سيف اخويا احلى هدية لينا في الدنيا.
مها : ايوه يعني كانت من دورك كده و لا انتي أصغر منها صحيح طب مش بتحملي انتي ليه كمان و لا خلاص عجزتي؟!
ياسمينه : مش عارفه اجبهالك ازاي بس انتي معندكيش غير وليد ليه بتوجعي غيرك بنفس بوجعك؟
فيروز : أنا مش موجوعه يا ياسمين بالعكس أنا عندي حذيفة بالدنيا كلها و راضيه بحالي بس تسيبنا في حالنا.
مها : اسيبكم في حالكو ليه يا حبيبتي كنت قاعدة فوق دماغك
قال البيت بيت ابونا و يجوا الغرب يطردونا عجايب!
دا بيت ابني يعني انتي و اختك تطلعوا بره خليها يا ست فيروز تشوفلك اوضة عندها في بيتها و لا روحي اترمي في شقة جوز أمك.
ياسمينه : اختي و اشيلها في عنيه بس البيت بيتها و برضو مش هتسيبه.
مها بسخريه : بيتها!
عيشنا و شوفنا الست فيروز بقى لها بيت بكره اجوزه و اجيبلك واحده هنا تطفشك من البيت.
فيروز و اتنرفزت : خلي ابنك يروح يتجوز بس مش هيقدر يجيبها هنا يبقى يشوفلها شقة بقى يقعدها فيها مبدخلش اغراب بيتي.
مها : هههههههههههه بيتك دا ايه يا بنت نادين هي الكلمة عجباكي و لا ايه؟
فيروز : ايوه بيتي تحبي اجيبلك العقد من جوه؟
مها و بدأت تقلق : عقد ايه؟
فيروز : عقد بيع البيت بـ اسمي
يووووه هو أنا مقولتلكيش؟
لأ صحيح مقولتش إن وليد باعلي البيت بيع و شرا و اتسجل كمان استني اجيبلك العقد تشوفيه علشان تتأكدي.
مها : ضحكتي عليه يا بنت نادين و كلتي عقله بكلمتين علشان يطاوعك و يكتبلك البيت بـ اسمك؟!
فيروز : مش محتاجه أكل عقل ابنك هو كاتبه بكامل ارادته من غير ما اطلب منه أصله بيحبني قوي و حب يهاديني بالهدية البسيطه دي.
مها بتخبط كف على كف : أنا هنزل اقعد تحت لحد ما يجي اشوف كدبك دا آخرته ايه؟!
فيروز : معلش المفاجأة شديدة أنا عارفه هههههههههههههههه
_________________

في فيلا آسر.
سهر قامت بسرعه أول ما اسر دخل من الباب و وقفت قصاده.
آسر : ايه فيه ايه؟
سهر : وحشتني.
آسر مردتش.
سهر : ميبقاش دمك تقيل بقى ايه اللي حصل لكل دا مش أنت روحت و فركشت الخطوبة مزعل نفسك ليه دلوقت؟
آسر : سهر وسعي علشان ادخل اغير هدومي.
سهر : طب ما تدخل هو أنا قافله الباب؟!
آسر : سهر لو سمحتي ابعدي بقى.
سهر بعتاب : عاوزني ابعد عنك؟
آسر : عاوز اعدي ممكن؟
سهر بحزن : اتفضل.
قرب آسر اخد لبس علشان ياخد شاور و يغير.