احبني شيعي

دماء في كل مكان ..

بشـارع محلتنا الساعة ٥ العصر ركضت على بيت بيت بالدربونه وجمعت بنات المنطقة سعدية وغفران ومنار وسناء ..
هاا بنات التخطيط عليمن ..
اكيد عليج انتي زينه بالتحديد
ماشي وهذا الطباشير موجود بس بقت الحجارة
واني اخطط بالكاع رسمت ٦ مربعات وبديت ارقمهن واني اغني يا كاع ترابج كافوري عالساتر هلل شاجوري والبنات يصفكن ..
كملت يلا هسة سباق الي تلكه احسن طابوكة الدور يصير الهه ...
١
٢
٣
ابدأ ..
ركضنه كلنه بالمنطقة ندور على احسن طابوكه تفيدنه باللعبه تجمعنه وره ١٠ دقايق خلينه الحكم منار تختار احسن وحدة وصار والفوز جان من نصيبي ..

يعني ميصير نريد يوم نصير احسن منج باللعبه ماكو ملكة التوكي انتي
اييي طبعاً بنات فد يوم نسوي مسابقة احنه وبنات المنطقة الثانيه والي تفوز باللعبه تصير رسميا ملكة التوكي
منار : اني راح اشيع الخبر واوصلهه لبنات المنطقة الثانية
سعدية : واني راح ادربج حتى ترفعين راسنه
غفران : واني احدد الوقت والمكان يصير محايد حتى ميزعل ولا طرف ..

ماشي هسة خلي ابلش بسم الله ..
شمرت الطابوكة على المربع الاول رفعت رجل وصرت بتك رجل كمزت عالمربع الثاني وراها الثالث وراها الرابع والخامس والسادس سوة نزلت رجلي ورجعت تنازلي هم بتك رجل من الرابع ورا الثالث ورا الثاني دنكت اخذت الطابوكة وهم عبرته واني بقمه تركيزي حتى ميختل توازني او ادوس على الخط ..

بلشت بالداس الثاني على نفس الخطوات وبهالاثـناء ماما چانت تسوي عصرونية كالعادة لان حتزوهه جيرانه الي اسـمهه اخلاص وبابا چان طالع للكهوة ووراها يروح للجامع واخوتي چانوا بالمسبح ..

صاحتني امي واني چنت العب كتلهه هسة فد شوية بس اكمل ورجعت صاحتني اكثر من مره واني مرحت اجتي امي وشافتني العب توكي واني مغمضه عيوني واكمز على المربعات مال توكي ويمي صديقاتي  واني العب اكول كبي وصديقاتي يكولن نو كبي نو كبي نو الى ان دست على الخط وصديقاتي صاحن يس وماما جانت تباوع من وراهم وهمة ما شايفيها فامي صاحت يس يس يس وهي تضربني خفيف ..
كتلهه ها ماما ..
كالت چان بعد وكت مو چنت اصيحج
كتلهه ماما مو اخذني الواهس خير رايدة شي
اي هاي الفـلوس روحي ركض جيبي بسكت مال چاي وحب واشتري الج وللبنات وتعالي ..
اني كلت هييي حاضر ماما
وقبل ماروح وصيت البنات .. بنات ماكو غش ماشي العبوا حبل الما اجيب الغراض ما اتأخر
كالوا ماشي ..
ركضت ووصلت للمحل طولت بي شوية الما اختاريت الغراض خلالياها بعلاكة وطلعت وصلت يم الباب شفت بابة واكف براس الشارع بطريقة ديروح للجامع ومنتظر ابن عمتي (ابو سُكينة) ديلم بغراضة واوراقة حتى يروح للجامع وية بابا ويرجع لبيته بهالاثناء صار الي مچنه متوقعي ولا حتى بالخيال ..

اجتي سيارة سريعه كلش وبيضة بيهه اربع مسلحين ملثمين وكفت كدام (ابو سُكينه) ..

وكعت علاكة المشتره من ايدي الي كامت ترجف من الخوف وصيحت باباااا..
وهو اندار عليه وبنفس الثانيه المسلحين رموا لأبو سُكينة من راسة لحد رجلة زرفوا جسمة تزرف من الطلقات بدون اي رحمة وانسانية وكال واحد منهم اي سني يسوي سواية هذا الرجال هيج يكون مصيره ..
وركبوا سيارتهم وانهزموا ..
بابا ظل مصدوم من الي شافة وخوفة عليه بنفس الوقت مبين بعيونه ..
الناس كلهه التمت والي چان بالجامع طلع والي بالمحل كلهه ركضت عليه وابوية ويصيح الحكواا ابن اختي الحكوااا اتصلوا عالاسعاف نزل عليه وخلة راسه بحضنه ويبچي ويصيح وهو غركان بدمة بمنظر مرعب وصدمة چبيره   ..
شوية شوية الخبر تعمم والمنطقة كلهه التمت مبقة واحد ببيته وكل بيت يسمع تطلع عيطة منه ابو سكييينة لاااا ممعقولة شنو هالمصيبه ..

وصلت سياره الاسعاف وره ربع ساعة شالة بابا وويا الولد وراحوا ..
والمنطقة انكلبت كلاب مو طبيعي كل هذا واني نفس مكاني متحركت اجه ابو المحل (رجال چبير)وكلي هبة بنتي انتي قوية لتخافين كلشي حيصير بخير والحجي (ابوية) حيرجع بالسلامة وهو يخض بيه ..

اني بعالم ثاني الدنيا سودة بعيوني مداشوف غير بابا بدشداشته البيضة وابن عمتي الواكع بدمة بحضنه الناس التموا عليه لان جنت البنيه الصغيره الوحيدة بهالشارع وبنت الحجي خافوا عليه من الصدمة .. واني بنص هاي الهوسة اجتي امي بعبايتهه الي سحلت الشارع وصارت كلهه تراب شافت الناس ملتمين وصاحت بنتي ويين كلهم ابتعدوا والرجال كلهه هياتهه هبة لتخافين هي بخير واجتي بسرعة جرتني من ايدي وكالتلي انتي بخير يمة  ابوج بخير شصار احجي اني من سمعت صوتهه حضنتهه وكمت ابجي واشهك واصيح بابا اريد بابا ..
والناس الواكفة كلهم رجعوا يبجون وياية امي شالتني ورجعتني للبيت واني مسكتت الما تعبت ورجعت صارت الدنيا سودة بعيني بس هالمرة مسمعت ولا اي صوت ..

سمعت صوت سياره سرريعه وبيهه نفس الملثمين وشايلين الاسلحة بس هالمره وكفوا كدام ابوية وضربوا اله طلقات ووكع غركان بدمه ..

صيحت باباااااااا..

فزيت من النوم واني اصيح بابا وابچي وجانت الساعة بــ ١ بالليل .. كال مصطفى هاي هبة دتصيح .. ليث جاوبة اي هية الحكوا خاف بيهه شي وعمر كال اني حصيح ابوية وامي خاف متسكت الا بيهم وعلي نايم

وره شوية لكيتهم كلهم يمي واني اكلهم اريد بابة وين اريدة مصطفى شالني من الچرباية وكلي حبيبتي بابة نايم وهسة ب١ باجر من يكعد شوفي ..
كتلة لاا اريدة هسة خما بي شي الدم شفت الدم ينزل منه ..
واني احجي اجة ابوية وكال ها بابا اني هنا حبيبتي بنيتي لتبجين شو مصطفى انطينياها ..

شالني واني مصدكت حضنته حييل وابجي كتله بابا احجي واني اتأتأ .. ششش ففت شششفت ضربوك طلقات ودمم دمم هواية نزل منك ..
كلي بابة اشش حبيبتي هذا كابوس اني هياتني يمج شفتي بيه شي ..
كتلة لا بس لتعوفني اريد ابقة بحضنك ..
كلي لا ماعوفج اهدي وبطلي بجي تعاي نامي وياية بحضني ..
اني هديت خليت راسي على چتفة ومحاوطته من ركبته بأيدي واني خايفة ..
شلون الطفل من عندة لعبة وخايف احد ياخذهه منه
هيج حسيت ابوية بالضبط مالتي والي ماريد احد ياخذه مني ويحرمني منه ولا اشوفة بهيج منظر ..
شالني لغرفتة وماما چانت نايمه .. حاول ينزلني اني مهديتة ظليت مچلبه بركبته حاول واخر شي استسلم عافني على وضعي وتمدد هو هم الما غفيت ونمت ..

كعدت الصبح فتحت عيوني واتلمس الچرباية و ملكيت احد بصفي رفعت راسي بصدمة نزلت بسرعة من الچرباية وفتحت الباب وصلت للكيلدور وهنا الصدمة الـثانية ..

شنو ذكرياتكم وية لعبة التوكي ؟
صديقات الطفولة بعدچ متواصلة وياهم لا؟
كم وحدة تتمنى ترجع هاي الايام المابيهه تلفونات..!؟
ذكرياتكم بعد السقوط شنو غيرت بيكم وخلت بيكم غصة متنسي لو لا؟
اهم سؤال شتتوقعون الصدمة الثانيه ..!