عائله ليست من البشر .............. (1)
ــــ
المكان : قرية من قرى محافظة الغربية
الزمان : مايو 2013 م
كنت خلصت الإمتياز وإستلمت التكليف فى وحده صحية فى الأرياف فى قرية من القرى والتكليف بيكون سنتين وبتشتغل ممارس عام !! المبنى اللى فيه الوحدة الصحية كان مبنى
قديم نوعاً ما وسط مبانى سكنية فاضية كانت متقسمه تتعمل مدرسة ومكتب بريد وخدمات بس مكملتش واتهجرت المبانى دي لحد ما يكون فيه تمويل من الدولة واللى فضل شغال وسطهم هى الوحدة الصحة بس .
الوحده الصحية كان مرفق معاها مبنى سكنى ودا للأطباء اللى هيباتو فى الوحده سواء كانوا نبطشيات أو هيقيم إقامه كاملة لو هو من مكان بعيد كانت المسافة بين الوحدة الصحية وبيتى ساعتين بالعربية مكنش مستهله إنى أبات بس فيه أيام كنت ببات فى المبنى السكنى بتاع الوحده حتى لو مش عندى نبطشيات !!
ودا لإن الوحده الصحية كانت وسط أراضى زراعية قريبة من ترعة كبيرة كنت بروح اصطاد فيها !! طبعاً بعض الناس هتستغرب يعنى ايه ترعه !! وتصطاد فيها !! هشرح لكم الكلام دا :
فى الفلاحين عندنا واقصد هنا بالفلاحيين البلاد والقرى اللى فيها أراضى زراعيه دى بتكون مساحات أرض زراعيه كبيرة أوى وعشان نروى الأراضى دى بيكون عن طريق حاجتين :
1- يا ميه " معين " يعنى ميه من تحت الأرض وبنطلعها بمكن الرى
2- عن طريق الترعه ودى بتكون حاجة كدا زى البحر بس على أصغر
وبيكون فيها سمك ........ تمام كدا
.
غير بقى المنطقة كانت هادية خالص لأن الوحدة الصحية وسط أراضى زراعيه وجنبها شجر توت ونبق كتير فالمكان مغرى كدا للناس بقى اللى عايزه روقان وهواء نضيف وخضرة وتاكل توت ونبق وتصطاد سمك حاجة فخامه اوى يعنى ....كنت أنا أصغر حد فى العاملين فى الوحده الصحية سواء كان اصطف أطباء أو تمريض كان السن بيتراوح ما بين خمسينات وأربعينات كنت أنا بس اللى لسه عشرينات 26 سنه فى الحدود دى .
وطبعاً أهل القريه يعنى متعودين الدكتور بيروح الوحده ساعتين الصبح ويخلع مش متعودين الدكتور يطلع من الوحدة الصحية يروح يصطاد سمك وياكل توت ويتمسى وسط الأراضي
مع الوقت بدء يحصل بينى وبين الناس توليفة كدا يعنى أبقى قاعد بصطاد تلاقى واحد جاى
يقولك يا دكتور عينى ورمه شوفها واللى طالع له خراج عايز دوا واللى دراعه وقع عليه الخ
.
وغالبا بتكون كل المشاكل مش حالات طارئة فأى ممارس عام يقدر يتعامل معها فكان الموضوع بالنسبة ليا بسيط غير بقى كان فيه حاجات لطيفة كدا عندنا فى القرى والأرياف لسه فيه طباع حلوة طباع الود والتألف يعنى كل يوم بقى اللى عامل فطير وجايب لك اللى جايب لك حليب لسه طازه اللى كان زراع خيار وطماطم وجايب لك شنطة !!!
ودا بكرم وفطرة الناس الطبيبة اللى انا بتمشى وسط أرضهم وزرعهم ومينفعش تكسف حد أو ترد اللى جايبه لك ...
فكان طه ودا تمرجى الوحده ومعاه صبحى ودا أمن الوحده كل يوم يستنونى يشوفنى راجع بايه ويخدوه لإنى مكنتش باكل الحاجات كنت بخدها من الناس على سيبل جبر الخاطر .
.
عدت بقى الأيام هكذا عدي 7 شهور من فتره وجودى فى الوحده لحد ما حصل حاجة غيرت مجرى الأحداث خالص... فيه بيت بينه وبين الوحده الصحية بتاع 200 متر كدا هو البيت تحس مش ساكن مافهوش فيه حد يعنى !! انا مكنتش بشوف حد فيه الا بالليل لو انا سهران كانوا صحابه على طول فتحين الشبابيك وديما كان صوتهم عالى مكنتش بشغل بالى إلا فى مرات قليله لو انا طالع البلكون كنت بلمح الست مرات صاحب البيت اظنها فى الاربعينات مثلا وكانت حاجة جامدة ...
صراحة جمال وحلاوه اللى كنت بستغرب له انها كانت بتطلع بلبس مكشوف يعنى حاجات قصيرة وعريانه ودى مش عوايد وطباع القرى يعنى ..
والست كانت تقعد تبصلى وانا بصراحه شغلتننى شوية بس مكنش ينفع طبعا هتحط نفسك فى مشكلة والناس بتثق فيك وتحترمك ولو حصل حاجة هتبقى فضحتك وسخه قدام نفسك وقدام الناس كلها من الأخر كدا كنت بقصر والم الدور لو هى واقفه فى البلكونه كنت بدخل جوه بس دا مكنش يمنع انى كنت ببص عليها من ورى الشيش !!
.
لحد ما فى ليله كنت بايت نبطشى اليوم دا كان يدوبك لسه الساعه 10 بالليل لقيت باب غرفتى بيخبط اكيد طه المزعج جايب ليا العشا اللى اساسا واكل نصه وهو طالع على السلم !! المهم بفتح الباب لقيت راجل خمسينى لابس جلبايه وبيقولى انت دكتور الوحده !!!
صراحه كنت مضايق إزاى حد يطلع السكن كدا المفروض يبقى فى الاستقبال والإدارى هيسجل بياناته وبما ان مافيش ادارى فــ طه هو اللى كان هتيولى التسجيل ويتعامل معاه لو حاجة مش مستهله لو فيه حاجة كان هيتصل بيا انزل ...
قولت له ايوه انا دكتور الوحده انت مين وايه جابك هنا ؟
قالى معلش يا دكتور مراتى تعبانه جامد بتعيط من المغص وانا دخلت المستشفى ملقتش حد فطلعت لك على طول!!
وقعتك طين يا طه لما اشوفك انت والبغل صبحى تلاقيهم بيشربوا حشيش فى اى ركن !! المهم نزلت مع الرجل وقولت له فين المريضه فين مراتك قالى فى البيت يا دكتور معلش تعالى معايا هو صراحه انا عملت دا اكتر من مره يكون حد كبير فى السن او تعبان جامد فكنت بقول نعمل خير وكنت بروح له البيت ..
قلى معلش يا دكتور هى تعبانه جامد وكمان البيت مش بعيد دا البيت اللى قدام الوحده الببيت هناك اهو .. وشاور على البيت اللى كنت بشوف فيه الست فى البلاكونه !!
صراحه كدا جه فى بالى كذا تفكير ياترى الست تعبانه فعلا ولا دى حركه بقى عشان تشوفنى ونشوف بعض ونبدء بقى الدلع مع بعض !!
تفكير شاب لسه واكيد يعنى تفكير شمال !!
المهم قررت اروح معاه طلعت لبست واتبرفنت واخدت شطنتى ومشيت مع الرجل لحد ما وصلنا البيت الرجل خبط على الباب ودخلنا بيت بسيط بس مرتب ونضيف وتحس فيه بالدفء كدا وريحه البخور فيه تجنن صراحه اول ما دخلنا كان فيه ولدين صغيرين اظنهم ولاد الرجل لانه قال لهم متعملوش شقاوه عشان معانا ضيف ..
دخلنا غرفه النوم كانت الست نايمه على السرير ولابسه جلابيا بيتى وطرحه بصراحه فعلا كانت ست جميله ملامحها هادية وريحتها حلوه مع انها مش ريحه برفان يعنى المهم قعدت جنبها على طرف السرير وقولتها خير ياست الكل مالك وكانت اولى مره عيننا تجى فى عيون بعض من قريب وكانت اول مره اشوف ملامحها من قريب برضه ...
ردت الست عليا بصوت مبحوح ولهجه اقرب للكسوف بطنى يا دكتور تعبنى اوى وفيها مغص شديد وبروح الحمام كتير وكمان برجع اللى فى بطنى !!
كان اللى عندها نزلة معوية بسيطة بكتيريا السالمونيلا واضح انها اكلت اكل مش نضيف
كتبت لها العلاج وكان معايا فى الشنطة انتينال واستربتوكين اقراص اديت لها منهم مؤقتا
وطمنتها وكدا .. طلع جوزها من جيبه فلوس وبيحطها فى جيبى مرضتش اخد منه حاجة وان دا امر بسيط ونعتبر فى الاساس جيران يعنى وحاجة مش مستهله ..
.
شكرنى الرجل جدا وبحراره وقالى طيب لازم نضيفك بقى .. تشرب ايه يا دكتور ؟
مردتش اكسف الرجل وقولت له شاى لو تكرمت قعدت فى الصاله ودخل الرجل المطبخ يعمل الشاى .. كان الولدين قعدين على الكنبه اللى قدامى بيلعبوا وكانوع من تمضيه الوقت كنت مركز معاهم اشوفهم بيلعبوا ايه ؟؟
وانا مركز معاهم لوهله كدا من الزمن اتخليت انهم مش ولدين انهم شخصين كبار فى شكل اقزام مثلا !! حسيت مره وحده ان ملامح الطفلين دول اتغيرت فى ثوانى ورجعت تانى بس اتغيرت لشخصين كبار عواجيز مش أطفال !!
محطتش فى بالى صراحه لأن دا غالبا بيتهيألى .. لا دا اكيد يعنى بيتهيألى !!
بغض النظر عن حرارة البيت اللى تحس ان دفاية شغاله فيه بس انا مش شوفت دفيات ولا حاجة مع ان الجو كان ربيعى حلو !!
المهم جه الرجل زوج الست ومعاه الشاى وناولنى كوبايه الشاى
صراحه كان طعمها حلو جدا كأنها بنكهه الزعفران او القرفه او القرنفل مش قادر احدد صراحه حتى أن سألته نوع ايه الشاى دا يا حاااج ؟ هو اسم الكريم ايه ؟
قالى رشوان يا دكتور
اهلا وسهلا يا حاج رشوان بس الشاى دا طعمه حلو اسمه ايه ؟
قالى دا شاى عادى زى اللى بتشربه بس ادام عجبك الشاي بتاعنا تعالى كل يوم اشرب معانا!!
خلصت كوبايه الشاى وشكرته ونزلت من البيت لحد ما وصلت الوحده
.
وكالعادة لقيت البيه صبحى قاعد على الدكه الخشب اللى جنب بوابه المستشفى وجنبه الشيشة
ممكن اعرف انت كنت فين يا بيه لما الناس تدخل المستشفى وتطلع ليا فوق اوضتى ؟
- ناس مين دكتور اللى دخلوا المستشفى ما انا قاعد اهو بقالى 5 ساعات مشفتش حد؟!!
ياسلام والرجل اللى طلعى فوق وخدته ونزلت دا ؟ مش ناوى تفوق يا صبحى يعنى ؟
- راجل مين يا دكتور لا حد دخل ولا خرج مافيش الا انت من ساعتين خرجت من المستشفى
وسألتك رايح فين يا دكتور مردتش عليا حتى وخدت بعضك ومشيت !!
انت بتهزر صح ؟ يابنى ادم بقولك خرجت انا والرجل اكشف على مراته ؟
- راجل مين يا دكتور ؟
الرجل اللى بيته هناك اهو اسمه رشوان ( وشاورت له على البيت اللى قصاد الوحده )
بص ليا صبحى نظرة استغراب بهلع ورعب وعينه كانت هتخرج من دماغه وهو بيقولى بيت ايه يا دكتور دا بيت مهجور من 15 سنه ومحدش عايش فيه !!!!!!!!!!!!!!!!
.
نكمل المره الجايه
د. شريف على
amira6wagih
