Sakay sa usa ka bus, naglatagaw ang hunahuna ni Skipper. Gubot kaayo ug walay insaktong paminsar ug mao kini ang naa sa iya hunahuna:
"Ikaw na lang Ginoo ang magbuot kon asa ko nimo ipahiluna sa ako pag-abot sa akong padulngan karon." Kalit lang nangutana ang iya abay sa paglingkod, usa ka babaye nga anaa sa panuigon nga 40 anyos.
"Dong, taga asa ka ug asa pod ka mo-adto?"
"Taga Butuan ko nang.. ug wala pay klaro kon asa ko padulong."
"Ha? Unsa gud walay klaro asa ka paingon Dong? Kini nga bus nga ato gisakyan karon adto ni sangko sa Cagayan de Oro. Wala diay kay kasak-an sa Cagayan de Oro?"
"Wala lage nang.Pag-abot didto karon mangita pako kasudlan sa trabaho aron ko makakaon."
"Hala, maluoy pod ta nimo.. Dili ka ba mamili ug trabaho Dong? Ang ako amo sa Cagayan de Oro manginahanglan ug helper kon boy. Kay ang una namo nga boy nasakit man gud, Tigulang napod ug dili na makasugakod sa trabaho-on mao gipapauli sa ako amo sa ilaha. Pwedi ka ba?"
"Oo nang,bahala wala sweldo basta makakaon lang ko matag adlaw."
"Ayaw pod anang wala sweldo uy.Buotan kaayo ako amo dong..Lima ra mi nagpuyo sa dakong balay kami tulo ka katabang,si sir Edmond ug iya anak dalaga nga si Clarissa."
"Ang asawa diay sa imo sir nang,asa diay?"
"Ay... dugay nang patay dong uy.. Tabi una dong, unsa to imo pangalan? Sampita lang ko nang Mona dong."
"Si Skipper ko nang, pwedi tawgon ko nimo sa ako angga nga Kipper, mao pod na ila itawag sa ako mga higala nga nakaila dinhi kanako."
Sa kadugayan miabot ra gyud sila didto sa bag-ong kapoy-an ni Skipper. Human gipaila-ila si Kipper ni nang Mona sa iya amo, Walay duha-duha gidawat si Skipper isip usa ka boy sa balay.Walay problema si Skipper sa iya bag-ong mga amo tungod kay mga buotan kini.
Usa ka gabii niana, atol human na iya mga trabaho miadto si Skipper sa kusina ug iya gipangutana si nang Mona sama niini. "Nang, naa koy nakita nga guitara sa grahi-an.Kinsa tag-iya adto nang?"
"Ay,kang Tirso kadto nga guitara dong Kipper, ang amo boy sa una sa wala kapa. Sa iyang pagpauli iya gibilin iya guitara kay basin daw maulia-an siya sa iya sakit ug makabalik ra kuno siya dinhi.Apan sa ako pangagpas murag dili nato mobalik kay taudtaud naman sa iya pag-uli unya wala pa man nakabalik dinhi dong Kipper."
"Ah.. pwedi nato mahulaman ang maong guitara nang? Mag-guitar guitar unta ko. Sa dili pako matulog ganahan ko mag-guitara, aron mawala pod ako kamingaw sa ako mga ginikanan."
"Hala gamita lang gud dong.."
"Salamat kaayo nang ha."Wala dayon naglangan si Skipper gibitbit niya ang guitara paingon sa wanang kaayo nga hardin ug miplastar paglingkod sa usa sa mga bench didto dapita ug mikutingkuting dayon siya sa guitara.Samtang nagkantakanta si Skipper dinuyugan sa guitara, naa diay nakadungog sa iya pagkanta..Walay lain si Clarissa nga adtong tungora naglingkod sa beranda sa ila hari-anong panimalay. Wala na maka-agwanta si Clarissa ug miduol kini kang Skipper.Matod pa niya ngadto kang Skipper. "Hello..maayong gabii..nice kaayo ka mokanta ug mo-guitara.. Uy tuod ako diay si Clarissa. Ikaw? Kinsa ka?"
"Maayong gabii pod ma'am..ako si Skipper ma'am inyong bag-ong boy. Tabi, naa kay ipabuhat nako ma'am?"
"Wala uy.. Wala koy isugo nimo. Miduol lang ko nimo kay na-impress ko sa imo pag-guitara ug pagkanta."
"Salamat ma'am. Didto gud sa amo-a ma'am sa dili pako matulog mag-guitara sa ko ayha matulog, mura mao nani ako naandan ma'am."
"Pila na imo edad Kip?"
