وقابلتك إنت لقيتك بتغير كل حياتي
ما عرفش إزاي حبيتك
ما عرفش إزاي يا حياتي!
.....
_تعرفي أنك جميلة اوووي النهاردة و مش بس النهاردة انتي جميلة في عيني كل يوم وكل دقيقة بس النهاردة فيكي حاجة مختلفة في تفصيلة من تفاصيلك متغيره وده عرفته من ضحكتك حسيت أنك فرحانه و ياريت تشاركيني سبب فرحتك و سعادتك يا نور هانم
_انت هي سعادتي حاجة بسيطة منك كفيلة أنها تسعدني عمري كله طب انت عارف النهاردة يبقا كام ؟
_النهاردة يا ستي 8يوليو يومي و شهري المفضل عشان ده اليوم اللي شوفتك فيه اول مرة
_في الوقت ده انا مكنتش عاوزة احب تاني لأني جربت مرة واتنين و تلاتة و في كل مرة كنت بفشل و بخسر جزء من روحي و طاقتي و مشاعري و بعد ما كان اليوم ده أسوأ يوم في حياتي في ساعاته الأولي إلا أنك جيت في الوقت المناسب وغيرت نظرتي لكل حاجة حواليا انت غيرت نظرتي لنفسي حولتني من انسانة هشة لانسانة واثقة في نفسها و الأهم واثقة فيك
_اليوم ده بالنسبالي كان مرهق و كنت مقرر اروح اقعد علي البحر شوية و انسي كل حاجة حواليا و يمكن كمان أنسي نفسي واقدر أجدد طاقتي و فعلا روحت هناك و اول حاجة عيني جت عليها كانت انتِ شوفتك فضلت واقف مش بعمل حاجة غير أني باصص عليكي من بعيد كنتي قعدة زي الملاك محتوية نفسك كأنك بتحاولي تحميها من هوا البحر و صوت المياه وفعلاً نسيت كل حاجة و كمان نسيت نفسي و قربت منك و قعدت جنبك
_كنت بفكر في كل ذرة مشاعر ضحيت بيها مع حد ميستهلش تحت مسمى واحد اسمه الحب قد ايه كرهته و قررت أني اقفل قلبي و مش هسمح لحد ياخد منه ومن روحي تاني بأسم الحب بس كل ده اتغير بسببك غيرت وجهة نظري في الحب عرفتني انه إختيار مش دقة قلب. علمتني أني أختار الشخص الصح عشان قلبي يحب بجد عشان كدة اختارتك انت
_ يمكن علمتك أن الحب اختيار مش دقة قلب عشان يومها حسيت أنك مكسورة وأنك يستحيل تصدقي أن الحب عبارة عن قلب بس قلوبنا لو العقل متحكمش فيها هتحب الشخص الغلط و قررت اقولك انه إختيار مع انه كان دقة قلب و انا حبيتك بقلبي قبل حتي ما عقلي يسمح ليا اني أحبك
_ يمكن جيت في الوقت الغير مناسب الوقت اللي فيه كنت ضايعة مُشتتة تايهة مش عارفة اعمل ايه و مصدقت لقيتك طوق نجاة و مسكت فيك كصاحب و الغريبة انك بقيت صاحب و حبيب
_غلبتيني معاكي يا نور قعدت سنتين بقرب منك سنتين بحاول ابعد عنك اي أفكار سلبية عن الحب عشان يوم ما اخد الخطوة يكون عندك استعداد ليها و مخسركيش فضلت اعافر معاكي لحد ما وصلت بيكي لبر الأمان
_في السنتين دول انا اتأكدت فيهم أني كنت غبية وإني كنت بضيع وقت ومشاعر مع ناس لو عقلي فكر شوية كان عرف انهم كدابين ببساطة.بس برضو في السنتين دول اكتشفتك و اكتشفت أنك الانسان اللي بدور عليه وانك الشخص الصح الشخص اللي قلبي و عقلي اختاروه من غير نقاش الشخص اللي اول مرة عقلي يرفع بسببه لقلبي راية الاستسلام و يعلن الهزيمة
_واظن أن الهزيمة المرة دي كانت مكسب لقلبك و لعقلك ؟
_المكسب الوحيد هو انت لأنك غيرت حياتي
_اليوم ده بقاله خمس سنين منهم تلات سنين وانتِ في بيتي و في حضني
_بس قريب حضنك ده مش هيكون ليا لوحدي
_تقصدي ايه
_اقصد أنك هتكون احلي واحن بابي في الدنيا و زي ما كنت اب و سند ليا هتكون سند و عزوة ليهم
_و انا أوعدك زي ما كنت سبب رجوع ثقتك بنفسك وحبك ليا هكون سند ليكي اللي باقي من عمري
_ اسمها اللي باقي من عمرنا
.....
(من همسة حب لقيتني بحب
لقيتني بحب وأدوب في الحب
وأدوب في الحب ...)
#مها_محمود
