💕أنت قلبي٢💕

الحلقة ١٣٧

#أنت_قلبي٢
#بوسي_مصطفى
_____________
الحلقة ١٣٧

في التليفون 📞
مي بتزعق : انتي بتتصلي بيه ليه؟
أنسي الرقم دا خالص اقولك أنا هعملك بلوك علشان مش عايزة حاجه تفكرني بيكي.
سيف ياخد الموبايل من مليكة.
سيف : انتي ازاي تكلميها بالاسلوب ده؟!
مي : سيف!
سيف : ايوه سيف انتي كمان ليكي عين تتكلمي و تزعقي كمان؟!
بقى انا اللي كلمتك و قولتلك الكلام الفارغ اللي قولتيه لمليكة ده؟!
حسك عينك رجلك تهوب ناحية بيتنا و مش انتي اللي تعملي بلوك احنا اللي بنعمل و لا نسيتي أنا مش عايز اجرح فيكي لإن عندي اخوات و لو إن اخواتي ميطلعش منهم كده بس
أهلي ربوني إني مردش الإساءة بالاساءة و هكتفي إن كشفتك قدام صاحبتك عارفة يعني ايه صاحب روحي اسألي اهلك و هما يقولولك و مش هقولك متتصليش بملكية تاني لإن البلوك هيرد عليكي.
و قفل سيف و راح عملها بلوك..
سيف : اوعي بقى قلبك يحن و تروحي تفُكي البلوك
و تكلميها سمعاني؟
مليكة : حاضر بس اهدا.
سيف : أنا كنت ناقص مي دي كمان!
مليكة : خلاص يا سيف أنا آسفه.
سيف : لا مي و لا غير مي يدخلوا بيتنا مفهوم يا مليكة؟
مليكة : حاضر خلاص عرفت.
سيف : تسمعي الكلام و بلاش تقاوحي معايا.
مليكة : طب علشان خاطري بطل العصبيه اللي انت فيها
دي بجد خايفه منك.
بتبكي مليكة.. بيطبطب عليها.
سيف : ابوس ايدك بلاش الطيبه الزايدة دي اللي هتخرب بيتنا.
مليكة : لا لا اطمن أنا خلاص اتعلمت.
سيف : ياريت.
مليكة : سيف أنا جعانه قوي مفطرتش.
سيف : حاضر احلى فطار لملوكه.
مليكة ابتسمت : بلاش تتعصب تاني علشان خاطري.
سيف : حاضر يا حبيبتي
يا خبر انتي بتترعشي كده ليه؟
خلاص أنا آسف.
___________
في الشركة..
شادي يخبط على باب مكتب والدة.
هشام : ادخل.
شادي : بابي كنت...
ينظر له هشام و بعدها شادي يعدل كلامه.
شادي : دكتور هشام كنت عاوز اتكلم مع حضرتك.
هشام : لو الموضوع اللي هتتكلم فيه هيكون بصفتي بابي يبقى الكلام يكون في البيت اما لو بصفتي مديرك في الشغل يبقى اتفضل اتكلم.
شادي : ما هو أنا بصراحه مش هقدر أاجل الكلام في الموضوع دا لبعدين.
هشام : اه فهمت.
شادي : بابي أنا غلطت في ايه امبارح علشان أنا مش فاهم؟
هشام : مصمم انك تتكلم في مواضيع شخصية برضو؟!
شادي : انا جاي علشان افهم من حضرتك الغلط بتاعي لو غلطان فعلا راضي بعقاب حضرتك.
هشام : يصح إنك تقولي هاخد خطيبتي نتغدا بره
ومعترضتش وقتها و قولت و ماله انتو برضو مكتوب كتابكم و مفيش مشكلة لما تخرجوا لوحدكم لكن تتأخر لبعد واحدة بالليل ليه قولي؟
شادي : احنا مكوناش هنتأخر بس الوقت اخدنا.
هشام : أكتر من اتناشر ساعة بره البيت ليه يا شادي؟
لو فاهم إني ببالغ في رد فعلي  فأنا هقولك إن ليلى بنتي 
تخيل أنت خاطب و كاتب كتابك
علشان نبقى واضحين بس لسه البنت في بيت باباها فاستأذنت منه و خرجتوا و رجعتهاله في الوقت دا هيكون رد فعله ايه
أنا عايزك تتخيل و مفيش حاجه اسمها أصلنا عايشين في مكان واحد و عادي و الكلام دا
اتفضل قولي مفروض الأب دا يكون ايه رد فعله؟
شادي : هيكون رد فعله زي ما حضرتك عملت و يمكن أكتر كمان.
هشام : لا مفيش يمكن دا أكيد.
شادي : أنا آسف يا بابي مش هتتكرر تاني.
هشام : قدامك شهر و تتجوز ابقوا اخرجوا زي ما انتو عايزين و لو حتى رجعتوا الصبح مش هتكلم معاكم بس احتراما لإنها لسه في بيتي فلازم يا أخي تحترمني.
شادي : حاضر يا بابي انا متأسف
و فهمت وجهة نظر حضرتك.
هشام : اتفضل روح شوف شغلك بقى.
شادي : يعني حضرتك مش زعلان؟
هشام : لا يا حبيبي مش زعلان طالما دي كانت غلطه مش مقصودة و مش هتكرر لحد ما تروح معاك شقتك فاهمني؟
شادي : فاهم حضرتك بعد اذنك.
هشام : اتفضل.
___________
أمام العمارة اللي ساكنه فيها فوزية جات عربية الإسعاف و الشرطة قبضت على فوزية و هايدي و اخدت الجيران اللي شافوا الجريمة علشان يدلوا بـ أقوالهم.